కొడంగల్, నవంబరు 17: కాంగ్రెస్కు ఓటేస్తే.. సంక్షేమం, అభివృద్ధి ఆగం కావడం ఖాయ మని ఎమ్మెల్యే పట్నం నరేందర్రెడ్డి అన్నారు. శుక్రవారం మున్సిపల్ పరిధిలోని పలువార్డుల్లో ఎమ్మెల్యే పట్నం నరేందర్రెడ్డి ఎన్నికల ప్రచారం నిర్వహించారు. ఈ సందర్భంగా ఎమ్మెల్యే మాట్లాడుతూ 2018కి ముందు కొడంగల్ ఏవిధంగా ఉండేది..? నేడు ఏవిధంగా మారిందో ప్రజలే గుర్తించాలన్నారు. కొడంగల్ మున్సిపాలిటీగా ఏర్పడి రూ.100కోట్లతో అభివృద్ధి పనులు జరిగి నేడు వీధుల్లో పెద్ద సీసీ రోడ్లు, అండర్గ్రౌండ్ డ్రైనేజీ వంటి ఎన్నో సదుపాయాలు ఏర్పడినట్లు పేర్కొన్నారు.
గతంలో రేవంత్రెడ్డి కొడంగల్లో గెలిచి హైదరాబాద్లో మకాం వేసి ఇక్కడి అభివృద్ధిని పట్టించుకోలేదని ఆరోపించారు. ప్రజలకు అందుబాటులో లేకుండా, కబ్జాలు, సెటిల్మెంట్లు చేస్తూ కోట్లు గడించినట్లు తెలిపారు. గత ఎన్నికల్లో మాజీ ఎమ్మెల్యే గుర్నాథ్రెడ్డిని నోటికి వచ్చిందల్లా తిట్టి, వంద మీటర్ల లోతులో పాతిపెడతానని శపథం చేసిన విషయాన్ని కొడంగల్ ప్రజలు ఇప్పటికీ మర్చిపోలేదన్నారు.
రైతు బంధు పథకం నేడు వ్యవసాయాన్ని పండుగ చేసిందని, ఒక్క కొడంగల్ మున్సిపాలిటీలోనే ఐడేండ్లల్లో 2062 మంది రైతులకు గాను రూ.31కోట్ల 36లక్షలు రైతుల ఖాతాలో జమ చేసినట్లు తెలిపారు. ప్రతి నెల కొడంగల్ మున్సిపాలిటీలో రూ.32లక్షలు మంజూరు అవుతున్నట్లు పేర్కొన్నారు. రైతు బీమా పథకం క్రింద 41 మందికి రూ. 2కోట్లు అందించిన ఘనత బీఆర్ఎస్ ప్రభుత్వానిదని తెలిపారు. కల్యాణలక్ష్మి, షాదీముబారక్ పథకం కింద ఇప్పటి వరకు కొడంగల్ మున్సిపాటిలో ఐదువందల మంది వివాహాలకు గాను రూ.4కోట్ల 61లక్షలు అందినట్లు తెలిపారు.
సీఎంఆర్ఎఫ్ పథకం కింద115మందికి గాను రూ.కోటి 63లక్షలు అందించడం జరిగిందన్నారు. ప్రజలు ఒక్కసారి ఆలోచించి అభివృద్ధి, సంక్షేమానికి సహ కరిస్తున్న బీఆర్ఎస్ పార్టీ కారుగుర్తుకు ఓటేసి భారీ మెజారిటీతో గెలిపించాలని కోరారు. రానున్నది మళ్లీ కేసీఆర్ ప్రభుత్వమేనన్నారు. ఈ కార్యక్రమంలో తెలంగాణ స్పోర్ట్స్ అథారిటీ మాజీ చైర్మన్ అల్లీపురం వేంకటేశ్వర్రెడ్డి, మార్కెట్ కమిటీ వైస్ చైర్మన్ శ్రీవాణి, మున్సిపల్ కౌన్సిలర్ మధుసూదన్రావు యాదవ్తో పాటు బీఆర్ఎస్ నాయకులు రమేశ్బాబు, నవాజొద్దీన్, డా.కన్నోకి వెంకటేశ్వర్లు, పవన్ తదితరులు పాల్గొన్నారు.