వికారాబాద్, జూలై 23 : మత్తును చిత్తు చేసేందుకు అందరం కలిసికట్టుగా కృషి చేద్దామని వికారాబాద్ ఎస్పీ నారాయణరెడ్డి అన్నారు. జిల్లాలో 31 గంజాయి కేసుల్లో 104 కేజీల 530 గ్రాములు గంజాయిని పట్టుకొని సీజ్ చేసిన తర్వాత వికారాబాద్ కోర్టు ఆదేశాల మేరకు మంగళవారం సంగారెడ్డి జిల్లా ఇస్నాపూర్ గ్రామంలోని మెడికర్ ఎన్విరాన్మెంట్ మేనేజ్మెంట్ ప్రైవేటు లిమిటెడ్ కంపెనీలో కాల్చి వేశారు. ఈ సందర్భంగా ఎస్పీ మాట్లాడుతూ జిల్లాలో ఎవ్వరూ గంజాయి, ఇతర మత్తుకు అలవాటు పడవద్దన్నారు. ముఖ్యంగా యువకులు చెడు వ్యసనాలకు లోనుకాకుండా మంచి మార్గంలో నడువాలని సూచించారు. ఎట్టి పరిస్థితుల్లోనూ మత్తు పదార్థాల జోలికి వెళ్లవద్దని, గంజాయి వంటి మత్తు పదార్థాలు ముందుగా ఆనందాన్ని కలిగించినా.. చివరకు జీవితంలో విషాదాన్ని మిగిలిస్తాయన్నారు.
జిల్లావాసులు గంజాయిపై ఉక్కుపాదం మోపాలన్నారు. తల్లిదండ్రులు తమ పిల్లల అలవాట్లపై దృష్టి సారించి మత్తు పదార్థాలు ఇతర చెడు వ్యసనాల జోలికి వెళ్లకుండా జాగ్రత్త పడాలన్నారు. పోలీస్ డిపార్ట్మెంట్ తరఫున గంజాయి వంటి మత్తు పదార్థాల రవాణా, వ్యాపారం, సేవించే వారిపై దృష్టి పెట్టామని వివరించారు. ఎవరైనా మత్తు పదార్థాలను ప్రోత్సహించినా, సేవించినా కఠిన చర్యలు తీసుకుంటామని హెచ్చరించారు. జిల్లాలో ఎవరికైనా మత్తు పదార్థాలకు సంబంధించిన సమాచారం ఉంటే పోలీస్ అధికారులకు అందించాలని, మత్తు పదార్థాల రహిత జిల్లాగా మార్చుకుందామన్నారు. ఈ కార్యక్రమంలో జిల్లా అదనపు ఎస్పీ రవీందర్రెడ్డి, వికారాబాద్, పరిగి, తాండూరు డీఎస్పీలు అధికారులు, సీఐలు, పోలీసు అధికారులు పాల్గొన్నారు.