బొంరాస్పేట, మే 28 : అంగన్వాడీ కేంద్రాల ద్వారా గర్భిణులు, బాలింతలు, చిన్నారులకు ప్రభుత్వం అందిస్తున్న పౌష్టికాహారం పక్కదారి పట్టకుండా ప్రభుత్వం చర్యలు తీసుకుంటున్నది. పౌష్టికాహారం నేరుగా లబ్ధిదారులకు అందేలా ప్రత్యేక సర్వే చేపడుతున్నది. దీనిద్వారా లబ్ధిదారులకు పాలు, గుడ్లు, బాలామృతం వంటివి అందడంతోపాటు తీవ్ర పోషకాహార లోపం ఉన్న చిన్నారులను గుర్తించి ప్రతినెలా బరువు, ఎత్తు వంటివి గమనించనున్నారు. ఇందుకోసం మహిళా, శిశు సంక్షేమ శాఖ ఆధ్వర్యంలో న్యూట్రిషన్ హెల్త్ ట్రాకింగ్ సిస్టం(ఎన్హెచ్టీఎస్) పేరుతో సర్వేకు శ్రీకారం చుట్టింది. ఈ సర్వే మార్చిలో ప్రారంభం కాగా అంగన్వాడీ టీచర్లు ఎన్నికల్లో బీఎల్వోలుగా విధులు నిర్వహించిన కారణంగా మధ్యలో నిలిచిపోయింది. ఎన్నికలు పూర్తి కావడంతో మళ్లీ సర్వేను కొనసాగిస్తున్నారు. గర్భిణులు, బాలింత లు, చిన్నారులకు ఇవ్వాల్సిన పాలు, గుడ్లు, బాలామృతం వంటి పౌష్టికాహారం పక్కదారి పట్టకుండా ఈ సర్వే ఉపయోగపడుతుంది. లబ్ధిదారులు రెండుచోట్ల పౌష్టికాహారం తీసుకోకుండా సర్వేతో అడ్డుకట్ట వేయడంతోపాటు అంగన్వాడీ టీచర్లు ఎక్కు వ మంది పేర్లను రాసి పౌష్టికాహారం దుర్వినియోగం కాకుండా అరికట్టొచ్చు.
ఇంటింటికెళ్లి వివరాల నమోదు..
వికారాబాద్ జిల్లాలోని అంగన్వాడీ టీచర్లు ఇంటింటికెళ్లి సర్వే చేస్తున్నారు. ప్రతి అంగన్వాడీ కేంద్రంలోని టీచర్ తన పరిధిలోని ఇండ్ల వద్దకెళ్లి కుటుంబ సభ్యుల వివరాలను తీసుకుని మొబైల్లోని యాప్లో పొందుపరుస్తున్నారు. ఇంటి యజమానితోసహా కుటుంబంలో ఎంతమంది సభ్యులున్నారు, వారి వయసు, ఆధార్ సంఖ్య, పుట్టిన తేదీ, గర్భిణులు, బాలింతలు, కులం, దివ్యాంగులు, పిల్లల బరువు, ఎత్తు వంటి వివరాలను నమోదు చేస్తున్నారు.
జిల్లాలో ఐదు ప్రాజెక్టులు
వికారాబాద్ జిల్లాలోని పరిగి, తాండూరు, వికారాబాద్, మర్పల్లి, కొడంగల్లో ఐసీడీఎస్ ప్రాజెక్టులున్నాయి. వీటి పరిధిలో బాలింతలు-5359, గర్భిణులు -6121, ఏడు నెలల నుంచి మూడేండ్లలోపు చిన్నారులు- 33157, మూడు నుంచి ఆరేండ్ల లోపు చిన్నారులు- 19,655 మంది ఉన్నారు. వీరందరికీ ప్రభుత్వం ద్వా రా ప్రతినెలా పౌష్టికాహారం అందుతున్నది. ఎన్హెచ్టీఎస్ సర్వేతో లబ్ధిదారుల వివరాలు ఆన్లైన్లో నమోదై ఉండడంతో పౌష్టికాహారం పంపిణీ పారదర్శకంగా ఉంటుంది.
జిల్లాలో 90 శాతం సర్వే పూర్తి
జిల్లాలో ఎన్హెచ్టీఎస్ సర్వే 90 శాతం పూర్తైంది. వంద శాతం పూర్తి చేసేలా టీచర్లకు ఆదేశాలు ఇచ్చాం. ఇంటింటికెళ్లి అంగన్వాడీ టీచర్లు సర్వే చేస్తున్నారు. ఈ సర్వే తో ప్రభుత్వం అంగన్వాడీ కేంద్రాల పరిధిలోని లబ్ధిదారులకు పంపిణీ చేసే పౌష్టికాహారం పక్కదారి పట్టకుండా ఉంటుంది. లబ్ధిదారుల వివరాలు ఆన్లైన్లో నమోదై ఉండడం వల్ల సరుకుల పంపిణీ పారదర్శకంగా జరుగుతుంది.
– జ్యోతీపద్మ, జిల్లా సంక్షేమ శాఖ అధికారిణి