వికారాబాద్, జూన్ 25 (నమస్తే తెలంగాణ) : ఎట్టిపరిస్థితుల్లోనూ కౌలు రైతులకు రైతు భరోసా కింద అందించే పెట్టుబడి సాయం ఇవ్వొద్దనే అభిప్రాయాన్ని జిల్లా రైతాంగం వెల్లడించింది. ఒకవేళ నిజమైన రైతులకు కాకుండా కౌలు రైతులకు పెట్టుబడి సాయమందించడంతోపాటు ప్రాధాన్యతిస్తే రాష్ట్ర ప్రభుత్వానికి తగిన బుద్ధి చెబుతామని రైతులు ఆగ్రహం వ్యక్తం చేశారు. పట్టాదారులకు కాకుండా కౌలు రైతులకు పెట్టుబడి సాయం అందించే ఆలోచనపై ఏకపక్షంగా రైతులు వ్యతిరేకించారు. కౌలు రైతులకు రైతు భరోసా ఇచ్చేందుకు నిర్ణయం తీసుకుంటే తమ భూములను బీడు భూములుగానైనా ఉంచుతాం కానీ కౌలుకు ఇవ్వబోమని తెగేసి చెబుతున్నారు. వర్షాలు పడకముందే రైతు భరోసాను అందజేయాలని, విత్తనాలు, ఎరువులను అప్పులు చేసి తెచ్చుకున్నామని రైతులు ఆవేదన వ్యక్తం చేస్తున్నారు. కేసీఆర్ ప్రభుత్వంలో మాత్రం సాగుకు ముందే పెట్టుబడి సాయాన్ని రైతుల బ్యాంకు ఖాతాల్లో జమ చేసేవారని రైతులు గుర్తు చేసుకున్నారు. ఐటీ చెల్లించే వారికీ రైతు భరోసాను అమలు చేయాలని, పిల్లల చదువులు, పెండ్లిళ్లకు బ్యాంకుల నుంచి రుణాలు పొందేందుకుగాను ప్రతి ఒక్కరూ ఐటీ చెల్లిస్తున్నారని.. కాబట్టి తప్పనిసరిగా అమలు చేయాలని కోరారు. ఖాళీ భూములకు రైతు భరోసా ఇవ్వద్దనే ప్రచారం జరుగుతుండడంపై రైతులకు ఉన్న ఒకట్రెండు ఎకరాలకు అందే సాయాన్ని కూడా నిలిపివేసేందుకు ఆలోచించడం సరైంది కాదన్నారు. జిల్లాలో పూడూరు, మోమిన్పేట, తాండూరులలోని రైతు వేదికల్లో రైతు భరోసాపై అభిప్రాయ సేకరణ జరిగింది.
ఆధార్ కార్డుల సేకరణ..
రైతు భరోసా అమలుకు సంబంధించి రాష్ట్ర ప్రభుత్వ ఆదేశాల మేరకు నిర్వహించిన అభిప్రాయ సేకరణ నామమాత్రంగా జరిగింది. జిల్లాలోని మోమిన్పేట మండల కేంద్రంలోని రైతు వేదికలో జరిగిన అభిప్రాయ సేకరణ కార్యక్రమంలో రైతుల అభిప్రాయాలు సేకరించకుండానే వ్యవసాయాధికారులు వెనక్కి పంపారు. అభిప్రాయ సేకరణకు ఏఈవోలు అతికష్టం మీద తీసుకొచ్చిన ఐదారు మంది రైతుల అభిప్రాయాలను కూడా వ్యవసాయాధికారులు పట్టించుకోకుండా ప్రభుత్వానికి అనుకూలమైన అభిప్రాయాలను మాత్రమే ప్రభుత్వం సూచించిన ఫార్మాట్లో వివరాలను పూర్తి చేసి పంపారు. రైతు వేదికకు వచ్చిన రైతుల నుంచి ఆధార్ కార్డులను మాత్రమే తీసుకొని, ప్రభుత్వానికి అనుకూలంగా ఉన్న వారితో మాట్లాడారని రైతులు అసంతృప్తి వ్యక్తం చేశారు. తమ అభిప్రాయాన్ని వెల్లడించేందుకు వస్తే కేవలం ఆధార్ కార్డులు ఇచ్చి వెళ్లండని చెప్పడం ఏమిటని ఆవేదన వ్యక్తం చేశారు.
పెట్టుబడి సాయం అదునుకు ఇవ్వాలి
పెట్టుబడి సాయాన్ని అదునుకు ఇవ్వాలి. గత ప్రభుత్వం సాగు సమయానికి రైతుల ఖాతాల్లో డబ్బులు జమ చేసింది. 10 ఎకరాల్లోపు ఉన్న రైతులకు రైతుభరోసా అందజేస్తే సరిపోతుంది. అంతకు మించి ఉన్న రైతులకు అవసరం లేదు. ఉన్నతాధికారులు స్థానిక రైతుల నుంచి అభిప్రాయాలు సేకరించి పంపించాలి.
– వెంకట్రెడ్డి, పూడూరు
వందల ఎకరాలు ఉన్నోళ్లకు సాయమెందుకు..
ఇరవై, ముప్పై, అంతకంటే ఎక్కువ.. వందల ఎకరాలు ఉన్న రైతులకు పెట్టుబడి సాయం ఎందుకు. చిన్న, సన్నకారు రైతులకే రైతుభరోసా ఇవ్వాలి. రియల్ ఎస్టేట్ భూములకు ఇవ్వొద్దు. కౌలు రైతులకు రైతు భరోసా ఇస్తే ఒప్పుకోం. వరిలో దొడ్డురకం, సన్నరకం అనకుండా అన్ని రకాల వడ్లకు బోనస్ ఇవ్వాలి.
– కావలి సత్యయ్య, మెట్లకుంట, బొంరాస్పేట మండలం
కౌలు రైతులకు పెట్టుబడి సాయం ఇవ్వొద్దు..
కౌలు రైతులకు ఎట్టిపరిస్థితుల్లోనూ పెట్టుబడి సాయాన్ని ఇవ్వొద్దు. పట్టాదారులను కాకుండా కౌలు రైతులకు ఇస్తే భూములను బీడుగా అయినా ఉంచుతాం. ప్రభుత్వం కౌలు రైతులకు ఇస్తానన్న నిర్ణయాన్ని మార్చుకోవాలి. వానకాలానికి ముందే పెట్టుబడి సాయాన్ని అందించాలి.
– మల్లారెడ్డి, రైతు మోమిన్పేట
సీజన్ కంటే ముందే పెట్టుబడి సాయం ఇవ్వాలి
యాసంగి, వానకాలం సీజన్ల కంటే ముందే పెట్టుబడి సాయాన్ని అందించాలి. తీరా సాగు పనులు మొదలు చేశాక అదును దాటాకా సాయమిస్తే ఏం లాభం. ముందుగా సాయమందిస్తే ఎరువులు, విత్తనాలను కొనుగోలు చేసి సమయానికి సాగు చేసుకుంటాం. అప్పుడే రైతులకు మేలు జరుగుతుంది.
– నర్సింహులు, తుంకిమెట్ల, బొంరాస్పేట మండలం
పది ఎకరాల వరకు రైతు భరోసా ఇవ్వాలి..
పది ఎకరాల్లోపు రైతు భరోసా ఇవ్వాలి. సాగు వివరాలను వ్యవసాయ శాఖ అధికారులు సేకరించి, సాగు భూములకే వర్తించేలా చర్యలు తీసుకోవాలి. రియల్ ఎస్టేట్ భూములు, ఎకరాలకొద్దీ గుట్టలున్న భూములకు రైతు భరోసా ఇవ్వొద్దు. ఇచ్చే సాయమేదో సమయానికి ఇస్తే బాగుంటుంది.
– శ్రీనివాస్ గౌడ్, మంచాల