బొంరాస్పేట, జూలై 16 : ప్రభుత్వ పాఠశాలల్లో విద్యాభ్యాసం చేస్తున్న విద్యార్థులకు 2024-25 విద్యా సంవత్సరంలో ఏకరూప దుస్తులు సరఫరా చేసేందుకు ప్రభుత్వం నిధులను విడుదల చేసింది. ఈ విద్యా సంవత్సరం సర్కారు బడుల్లో చదువుతున్న విద్యార్థులకు ఒక జత దుస్తులు కుట్టడానికి అవసరమైన కుట్టుకూలీ చార్జీలను పాఠశాల విద్యాశాఖ జిల్లాకు విడుదల చేస్తూ ఉత్తర్వులు జారీ చేసింది. ఒక్కో జతకు రూ.50ల చొప్పున స్వయం సహాయక సంఘాల ఖాతాల్లో జమ చేయనున్నారు. ఏకరూప దుస్తులు కుట్టడానికి అవసరమైన వస్ర్తాన్ని ప్రభుత్వం సరఫరా చేసింది. విద్యార్థుల సంఖ్యకు అనుగుణంగా వస్ర్తాన్ని జిల్లా అధికారులు పాఠశాలలకు సరఫరా చేశారు. యూనిఫాం కుట్టడానికి ఎంపిక చేసిన మహిళా సంఘాలకు ఈ వస్ర్తాన్ని అందజేసి ఏకరూప దుస్తులు కుట్టిస్తున్నారు.
వికారాబాద్ జిల్లాలోని 1047 పాఠశాలల్లో 1 నుంచి 12 తరగతి వరకు చదువుతున్న 85,988 మంది విద్యార్థులకు ప్రభుత్వం ఏకరూప దుస్తులు కుట్టించి వాటిని విద్యార్థులకు పంపిణీ చేశారు. వీటిని కుట్టడానికి కుట్టుకూలీ నిధులు రూ.42,99,400లను ప్రభుత్వం విడుదల చేసింది. మంజూరైన నిధుల్లో 28 పీఎంశ్రీ పాఠశాలలకు రూ.5,50,350లు, 1019 పాఠశాలలకు రూ.37,49,050లు మంజూరయ్యాయి. యూనిఫాం అందినట్లు ఆయా పాఠశాలల హెచ్ఎంల నుంచి రాతపూర్వకంగా డిక్లరేషన్ తీసుకుని మహిళా సంఘాల ఖాతాల్లో కుట్టుకూలీ నిధులు జమ చేస్తున్నారు.
మహిళా సంఘాలకు యూనిఫాం కుట్టే బాధ్యతలు..
ఈ ఏడాది నుంచి యూనిఫాం కుట్టించే బాధ్యతను మహిళా స్వయం సంఘాలకు ప్రభుత్వం అప్పగించింది. వికారాబాద్ జిల్లాలోని 19 మండలాల్లో 94 మహిళా శక్తి కుట్టు కేంద్రాలను ఏర్పాటు చేసి యూనిఫాం కుట్టించారు. ఏటా రెండు జతల యూనిఫాం అందించాల్సి ఉండగా, మొదటగా ఒక జత యూనిఫాం కుట్టించి విద్యార్థులకు పంపిణీ చేశారు. 85,988 మంది విద్యార్థులకు రెండోజత కుట్టడానికి అవసరమైన 1,85,135 మీటర్ల వస్త్రం కూడా జిల్లాలోని మహిళా సంఘాలకు సరఫరా చేశారు.
కుట్టుకూలీ పెంచినా పాత ధర ప్రకారమే చెల్లింపు..
యూనిఫాం కుట్టడానికి ప్రభుత్వం ఒక జతకు రూ.50లు చెల్లించేది. ఈ ధర తమకు గిట్టుబాటు కాదని ధర పెంచాలని మహిళా సంఘాలు కోరాయి. దీంతో స్పందించిన ప్రభుత్వం కుట్టుకూలీ ధరను రూ.50 నుంచి రూ.75కు పెంచింది. కానీ మహిళా సంఘాలకు మాత్రం పాత ధర ప్రకారమే నిధులను విడుదల చేసింది. పెంచిన కూలీని కూడా తరువాత మంజూరు చేస్తారని అధికారులు పేర్కొంటున్నారు.