వికారాబాద్, జూలై 9 (నమస్తే తెలంగాణ): జిల్లాలో సీఎంఆర్(కస్టమ్ మిల్లింగ్ రైస్) బియ్యం ఇవ్వడంలో తీవ్ర జాప్యం జరుగుతున్నది. రైస్ మిల్లర్లు ఇష్టారాజ్యంగా వ్యవహరిస్తూ కావాలనే ఆలస్యం చేస్తున్నారు. పౌరసరఫరాల శాఖ ఇచ్చిన ధాన్యాన్ని మిల్లింగ్ చేసి బియ్యంగా ఇవ్వకుండా బ్లాక్ మార్కెట్కు తరలిస్తూ అక్రమంగా ఆర్జిస్తున్నారనే ఆరోపణలు వస్తున్నాయి. ప్రభుత్వ నిబంధనల ప్రకారం రైస్మిల్లుల నిర్వాహకులు సీఎంఆర్ కింద ఇచ్చిన ధాన్యాన్ని మిల్లింగ్ చేసి తిరిగి బియ్యం రూపంలో పౌరసరఫరాల శాఖకు నిర్ణీత గడువులోగా ఇవ్వాల్సి ఉంటుంది.
కానీ ఒకరిద్దరు మిల్లర్లు మినహా.. మిగిలిన వారంతా బ్లాక్లో విక్రయిస్తూ సర్కార్కే టోకరా వేస్తున్నారని, ఎలాంటి అనుమానం రాకుండా విడుతల వారీగా పౌరసరఫరాల శాఖకు నాసిరకం బియ్యాన్ని అందిస్తున్నారనే విమర్శలున్నాయి. ఇంత జరుగుతున్నా అధికారులు నిమ్మకునీరెత్తినట్లుగా వ్యవహరిస్తుండడం విడ్డూరమని విమర్శలు వెల్లువెత్తుతున్నాయి. అయితే రెండేండ్లుగా మిల్లర్ల నుంచి సీఎంఆర్ బియ్యం ఇంకా క్లియర్ కాకపోవడం గమనార్హం.
పెండింగ్లో 24,285 మెట్రిక్ టన్నుల సీఎంఆర్ రైస్…
సీఎంఆర్ రైస్ విషయంలో మిల్లర్లు ఇష్టార్యాజ్యంగా వ్యవహరిస్తున్నారు. గత రెండేండ్లుగా తీసుకున్న ధాన్యానికి సంబంధించి ఇప్పటివరకు పెండింగ్లోనే ఉండడం గమనార్హం. 2022-23 వానకాలం నుంచి 2023-24 యాసంగి సీజన్ వరకు మిల్లర్లు తీసుకున్న ధాన్యానికి సంబంధించి 24,285 మెట్రిక్ టన్నుల సీఎంఆర్ రైస్ పెండింగ్లోనే ఉన్నది. అయితే 2022-23 వానకాలంలో 95,095 మెట్రిక్ టన్నుల ధాన్యాన్ని మిల్లర్లకు ఇవ్వగా వారు ఇవ్వాల్సింది 4,889 మెట్రిక్ టన్నులు.. అదేవిధంగా 2023-24 వానకాలంలో 44,251 మెట్రిక్ టన్నుల ధాన్యం మిల్లర్లకు ఇవ్వగా ఇంకా రావాల్సింది 13,099 మెట్రిక్ టన్నులు, 2023-24 యాసంగిలో 13,696 మెట్రిక్ టన్నుల ధాన్యాన్ని మిల్లర్లకు ఇవ్వగా ఇంకా 6297 మెట్రిక్ టన్నుల సీఎంఆర్ రైస్ మిల్లర్ల నుంచి రావాల్సి ఉన్నది.
ప్రభుత్వ నిబంధనల ప్రకారం ధాన్యం ఇచ్చిన 15 రోజుల్లోగా రైస్ తిరిగివ్వాలని నిబంధనలున్నా అవి కాగితాలకే పరిమితమయ్యాయి. గోదాంలు ఖాళీలేక ఆలస్యమైందంటూ పౌరసరఫరాల అధికారులు చెబుతుండడంతో ఇదే అదునుగా భావించిన రైస్ మిల్లుల నిర్వాహకులు బియ్యాన్ని నల్లబజారుకు తరలిస్తున్నారన్న ఆరోపణలు వెల్లువెత్తుతున్నాయి. సీఎంఆర్ బియ్యం జాప్యంపై గతేడాది మిల్లర్లకు 25 శాతం మేర ప్రభుత్వం జరిమానా విధించినా వారిలో ఎలాంటి చలనం లేకపోవడం గమనార్హం.
45 రైస్మిల్లులకు జరిమానా..
రెండేండ్లుగా పెండింగ్లో ఉన్న సీఎంఆర్ రైస్ను అందించేందుకు గడువు ఇచ్చినా అందించని మిల్లర్లపై ప్రభుత్వం పెనాల్టీ విధించింది. సీఎంఆర్ రైస్ నిర్ణీత గడువులోగా ఇవ్వని 45 రైస్ మిల్లర్లకు లెవీ బియ్యానికి అదనంగా 25 శాతం మేర బియ్యం లేదా డబ్బులు చెల్లించాలని ప్రభుత్వం ఆదేశించింది. జిల్లావ్యాప్తంగా 45 రైస్ మిల్లర్లకు పెనాల్టీ విధించగా ఇప్పటివరకు 18 రైస్ మిల్లర్లు మాత్రమే 125 శాతం మేర సీఎంఆర్ను పూర్తి చేశారు. ఏడుగురు రైస్ మిల్లర్లు చెక్కుల రూపంలో పెనాల్టీని చెల్లించారు. అయితే 25 రైస్మిల్లర్లు 125 శాతం మేర పెనాల్టీతో సీఎంఆర్ అందజేయాల్సి ఉన్నది. ప్రభుత్వ నిబంధనల ప్రకారం కిలోకు 35 రూపాయల చొప్పున రైస్ మిల్లర్లు ప్రభుత్వానికి చెల్లించాల్సి ఉన్నది.