‘మహారాజా..! కూటకార్యం మహా గుప్తం. నూరు మాయోప వేషాలతోనైనా జనుల దృష్టి మరల్చాలె. శత్రువు లోభి అయితే ఆశ చూపి వశపరుచుకోవాలె.సమబలుడైతే నిందలు వేసి, మోసం చేసి కడతేర్చాలి’ అని మహాభారతం ఆదిపర్వంలోని ఉప పర్వమైన సంభవ పర్వ ముగింపులో ధృతరాష్ర్టునికి బోధిస్తడు కణికుడు. ఇదే కణిక నీతి. కణికుని నీతికి అప్డేటెడ్ వెర్షనే నిన్నటి మాజీ మంత్రి పోచారం శ్రీనివాసరెడ్డి పార్టీ ఫిరాయింపు. మొన్నటి విద్యుత్తు కొనుగోళ్ల మీది విచారణ కమిషన్. మాయపుటెత్తుతో జాతీయ యవనికలో కేసీఆర్ కీర్తికి మసిపూసే కపట నాటకానికి విచారణ కమిషన్ తెరలేపితే.. ఆయన్ను అస్థిరపరిచి కార్యభంగం లేకుండా బొగ్గుట్టను ఎత్తుకుపోయే కలి పురుష వ్యూహమే పోచారం కప్పగెంతులు.
తెలంగాణకు ఆపద వస్తే.. ఎన్నిసార్లయినా చావు నోట్లె తలపెట్టి ఆపగలిగే గండర గండడు కేసీఆర్. గద్ద దొంగ దెబ్బ నుంచి పిల్లలను కాయగల్గేది తల్లికోడి రెక్క బల్కరమే గానీ.. తువ్వలు, తుప్పల చాటు లెప్పుటికీ దాపు కాదు. తెలంగాణ జోలికొస్తే కేసీఆర్ తల్లి కోడై కాదు, బెబ్బులి పులై లేస్తడు. అందుకే బలవంతుడైన యోధుడిని ఎదుర్కోవటం కంటే ప్రజల్లో పలుచన చేసి, అతని శక్తియుక్తులను నిర్వీర్యం చేసే కూటపుటెత్తే కణిక నీతి. ఈ మాయోపవేశం నుంచి పుట్టినవే కప్పదాట్లు, విచారణ కమిషన్లు.
తెలంగాణనే బలిపీఠం చేసి.. మన బిడ్డల చేతికే కత్తి ఇచ్చి.. సింగరేణిని బలిచ్చే తంతుకు అంకురార్పణ జరిగింది. వందేండ్ల సంస్థ భవిష్యత్తును చీకట్లోకి నెట్టి.. వేల మంది కార్మికుల పొట్టగొట్టే దుష్ట క్రతువుకు అటు కేంద్ర బొగ్గు మంత్రిగా మన బిడ్డే.. ఇటు డిప్యూటీ సీఎంగా మన బిడ్డే దగ్గరుండి రతి (క్షుద్ర ముగ్గు) పోశారు. తెలంగాణ సమాజానికి కోటి కాంతులిచ్చే నల్ల బంగారు సిరుల గనికి ఎగబడి మరణశాసనం రాస్తుంటే.. తెలంగాణ ప్రజలు, ముఖ్యంగా సింగరేణి జనులు ఆందోళనలు, నిరసనలు చేయాల్సిన సమయం. కానీ, పాలకులు తెలివిగా దృష్టి బందనం చేశారు. కేంద్రం మౌఖిక ఆదేశమే అందిందో.. రాజ్య పన్నాగంలో భాగమో ఏమో! కానీ, స్వయంగా ముఖ్యమంత్రే సీన్లోకి వచ్చి రాష్ట్ర ప్రజల దృష్టి పోచారం శ్రీనివాసరెడ్డి ఇంటి మీదికి మళ్లించారు. అక్కడ మహాద్భుతమేదో జరుగబోతున్నట్టు సీన్ క్రియేట్ చేశారు. ‘జన్మలో మిమ్మల్ని మరువం సార్.. ప్రాణం ఉన్నంత వరకు మీరే మా నాయకుడు సార్.. ఇంకొకరు లేరు’ అని గుండె మీద ఒట్టేసి చెప్పిన మాజీ స్పీకర్ పోచారం శ్రీనివాసరెడ్డి.. ఎద మీద తన్ని కాంగ్రెస్ గోడ దూకిన తీరుపై మీడియా ఫోకస్ పెట్టిన వేళ.. కేంద్ర బొగ్గు గనుల శాఖ మంత్రి, ఉప ముఖ్యమంత్రి అప్రతిహతంగా సింగరేణి గనులను వేలం వేసే క్రతువును పూర్తి చేశారు.
స్వరాష్ట్రం సిద్ధించేనాటికి తెలంగాణ రైతు ఆత్మహత్యల మాగాణి. బోరుబాయిల కింది వ్యవసాయం. కరెంటు ఉంటేనే పంట. లేకుంటే తంటా. సాగు చేయకపోతే మానం పోతది.. సాగు చేస్తే పాణం పోతది అన్నట్టు ఉండేది రైతు పరిస్థితి. 2014లో నేషనల్ క్రైమ్ రికార్డ్స్ బ్యూరో నివేదిక ప్రకారం… తెలంగాణలో 898 మంది రైతులు ఆత్మహత్య చేసుకున్నారు. అంతకుముందు ఏడాది అంటే 2013లో 822 మంది రైతులు బలవన్మరణాలకు పాల్పడ్డారు. దేశంలోనే మనది రెండో స్థానం. ఆత్మహత్యలు చేసుకున్న రైతుల్లో 53.1 శాతం మంది చిన్నకారు, 14.5 శాతం మంది సన్నకారు రైతులే. ఇందులో 66 శాతం మంది కుటుంబ భారాన్ని మోసే 30-60 ఏండ్లవారే. ఇటువంటి విపత్కర పరిస్థితుల్లో ‘మా వనరులు మాగ్గావాలె’ అని కొట్లాడి తెలంగాణ తెచ్చిన సారే కొలువు కూటాల మీది కి వచ్చిండు. సాగు మీద, రైతుల సావుల మీద ఆలోచన చేసిండు. ఎక్కడ కరెంటు దొరుకుతుందో అన్వేషణ చేసిండు. రైతుల మోముల్లో వెలుగులు నింపిండు.
ఒక్క వ్యవసాయమే కాదు, నిన్న వరంగల్ ఎంజీఎం ఆసుపత్రిలో ఎక్స్రే, స్కానింగ్ వార్డుల్లో కరెంటు పోయినట్టే నాడు రాష్ట్రమంతటా కరెంటు కోతలుండేవి. కాన్పు చేస్తున్నప్పుడు, ఆపరేషన్లు చేస్తున్నప్పుడు కరెంటు పోయి అవస్థలు పడటం ప్రతి తెలంగాణ పౌరునికి అనుభవమే. పరిశ్రమల్లో పవర్ హాలీడే అని.. ఐటీ సెక్టార్లో పవర్ కట్ అని.. సింగిల్ ఫేజ్, డబుల్ ఫేజ్, త్రిబుల్ ఫేజ్ అని కరెంటులో ఎంత దరిద్రం ఉన్నదో అంత అనుభవించినం. అటువంటి గుడ్డికాలం నుంచి వార్ మోడ్లో తెలంగాణకు వెలుగుదారి చూపిన దార్శనికుడు కేసీఆర్. ఛత్తీస్గఢ్ కరెంటు యూనిట్కు రూ.3.90 లెక్కన ఒప్పందం చేసుకుంటే.. ట్రాన్స్మిషన్ లైన్ఛార్జీలు కలిపి యూనిట్కు రూ.5.64 దాకా ఖర్చయ్యిందట. ఇది అవినీతి అని విచారణ పూర్తి కాకముందే కమిషన్ తీర్పు లీకులు ఇస్తున్నది. ‘కొన్న కరెంటును చేత పట్టుకరాకుండా కరెంటు తీగల మీద ఎందుకు తెచ్చిండ్రు’ అన్నట్టుగా సాగుతున్నదీ విచారణ తీరు.
ఇదే కాలంలో పక్క రాష్ట్రం ముఖ్యమంత్రిగా ఉన్న చంద్రబాబు యూనిట్కు రూ 6.75 చొప్పున కొనుగోలు చేసినట్టు నివేదికలు చెప్తున్నాయి.
2023 ఆగస్టు నుంచి నవంబర్ వరకు ప్రపంచవ్యాప్తంగా బొగ్గు నిల్వలు పడిపోయినప్పుడు.. విద్యుత్తు ఉత్పత్తి స్తంభించింది. పొరుగు రాష్ర్టాల ముఖ్యమంత్రులు యూనిట్కు రూ.10 ధర కట్టిస్తమని డబ్బులు పట్టుకొని తిరిగిండ్రు. దొరికిన దగ్గర కొన్నరు. రూ.3కే దొరికే కరెంటును రూ.10కు కొన్నరు కాబట్టి రూ.7 అవినీతి జరిగిందంటే సమ్మతమేనా?
నేషనల్ క్రైమ్ రికార్డ్స్ బ్యూరో నివేదిక ప్రకారం 2022లో అత్యధికంగా 4,248 మంది రైతులు, రైతు కూలీల ఆత్మహత్యలతో మహారాష్ట్ర ముందు వరుసలోనే ఉండగా.. తెలంగాణ అతి తక్కువ రైతు ఆత్మహత్యలతో చిట్టచివరన నిలిచింది. అప్పులు తీరడంతో రైతులు ఆర్థికంగా నిలదొక్కుకున్నరు. వ్యవసాయిక విప్లవంతో ఏడాదికి సగటున 650 నుం చి 700 మంది రైతు ఆత్మహత్యలు కేసీఆర్ ఆపగలిగారు. కనిష్టంగా ఎనిమిదేండ్ల కాలా న్ని పరిగణనలోకి తీసుకుంటే 5400 మంది రైతుల ప్రాణాలు దక్కినయి. యూనిట్ ధర మీద లాభనష్టాల లెక్కలు కడుతున్న విచార ణ కమిషన్.. రైతు ప్రాణం ఖరీదుకు లెక్కలు వేయాలి కదా? ఒక్క రైతు ప్రాణం ఖరీదు ఎన్ని యూనిట్ల ధరకు సరిసమానమో తేల్చిచెప్పాలి కదా!
లెక్కకు మిక్కిలి ఐటీ కంపెనీలు వచ్చాయి. లక్షల్లో ఉద్యోగ కల్పన జరిగింది. 2014లో రూ.66,276 కోట్లుగా ఉన్న ఐటీ ఎగుమతు లు కేసీఆర్ దిగిపోయే నాటికి రూ.2,41,275 కోట్లకు ఎగబాకింది. నిరుద్యోగుల ఆత్మహత్యలు ఆగినయి. పల్లెలో జీవనం కోల్పోయిన జనం పట్నం వచ్చి బతుకు దారి వెతుక్కున్నరు. ఫలితంగా ఆకలిచావులు ఆగినయి. ఇప్పు డు చెప్పాలి.. పారగాన్ చెప్పుల పోరల షూటుబూటు జీవన నాణ్యతను ఏ కొలమానంతో కొలుస్తా రో! పెరిగిన జనజీవన ప్రమాణం ఎన్ని యూనిట్ల విద్యుత్తు ధరకు సరిసమానమో! అంచనా గట్టాలి. ప్రతి రంగంలో సాధించిన ప్రగతిని మదించి కేసీఆర్ ప్రభు త్వం కొనుగోలు చేసిన ప్రతి యూనిట్ ధరతో సరిపోల్చి లాభనష్టాలను బేరీజు వేయాలె. అప్పుడే విచారణకు అర్థం ఉంటుంది.
హైదరాబాద్ను కేంద్ర పాలిత ప్రాంతంగా ఉగ్గడించే కపటం తెరచాటున జరుగుతున్నది. క్రతుభంగం లేకుండా కార్యసిద్ధి జరగాలంటే కేసీఆర్ను దాటిరావాలి. కానీ అది అసాధ్యం. అందుకే కణిక నీతి సాగుతున్నది. అతని మీద అవినీతి ముద్రవేసి జాతీయస్థాయిలో ఆయన కీర్తికి మసిపూసి అచేతనున్ని చేసే కుట్ర జరుగుతున్నది.
ఈ తెలంగాణ కోటి గాయాల వేన వేల వంచనల నేల. ఈ ఏడెనిమిదేండ్లు మినహా కాలచక్రం ప్రతి మలుపులోనూ త్యాగాల చాళ్లు.. నెత్తుటి ఆనవాళ్లున్నయి. అయినా ఎప్పుడూ ఆకురాలే కాలమే ఉండదు. దాని తర్వాత శివ సత్తులు బోనమెత్తే కాలమొస్తది.. బతుకమ్మలు రూపం కట్టి పాటలై రాగమందుకునే కాలమొస్తది. ఆ పాటకు జమ్మి చెట్టు మీది మూట ఆయుధమై దిగుతది. అప్పుడు ‘చలో ధూమ్ ధామ్ తెలంగాణ జాతరొచ్చెరా’.. అని జనం కవాతు తొక్కే అస్సలు తెలంగాణ ప్రళయ గర్జనొస్తది జాగ్రత్త.
-వర్ధెల్లి వెంకటేశ్వర్లు