Telangana | వైద్యారోగ్యశాఖలో బదిలీలు గందరగోళంగా తయారయ్యాయి. రాష్ట్ర ప్రభుత్వం విడుదల చేసిన జీవో నెంబర్ 80 సాధారణ బదిలీలపై నిషేధం ఎత్తివేసింది. ఈ నిషేధం జూలై 21వ తేదీ వరకు కొనసాగుతుంది. దీంతో వైద్యారోగ్యశాఖ కమిషనర్ ఆఫ్ హెల్త్ అండ్ ఫ్యామిలీ వెల్ఫేర్ వైద్యారోగ్యశాఖ ప్రత్యేకమైన బదిలీల కోసం జీవో 209ను జారీచేసింది. సివిల్ సర్జన్లు, డిప్యూటీ సివిల్ సర్జన్లు, సివిల్ అసిస్టెంట్ సర్జన్ తదితర సిబ్బంది బదిలీల కోసం ఈ జీవో జారీ చేసింది. కానీ, ఆ జీవోలో 4 ఏండ్ల లోపు ఉన్నవారు బదిలీ కావలసిన అవసరం లేదని, నాలుగేండ్లు దాటిన వారే తప్పనిసరిగా బదిలీ కావాలని తెలియజేస్తూ మళ్లీ 40 శాతం మాత్రమే బదిలీ చేస్తామని చెప్పడం హాస్యాస్పదం.
ఇందులో బహుళార్థసాధక ఆరోగ్య కార్యకర్తలు అత్యధికంగా నష్టపోతున్నారు. వారికి వెకెన్సీ లిస్ట్లో క్లియర్ వెకెన్సీ పేరుతో ఈసీ ఏఎన్ఎం ఉన్న ఉపకేంద్రాలన్నీ క్లియర్ వెకెన్సీగా చూపిస్తూ నాలుగేండ్ల పైబడిన వారందరినీ సాధారణ వెకెన్సీగా చూపిస్తూ ఒక లిస్టు వచ్చింది. ఆ లిస్టుతో అందరికీ ఆందోళన మొదలైంది. ఎందుకంటే నాలుగేండ్లు పైబడిన వారందరూ ఆప్షన్లు పెట్టుకోవాలా లేదా వెకెన్సీ లిస్ట్ ఏదైతే ఉందో ఆ లిస్ట్ ఎంత ఉందో అంతవరకు కటాఫ్ ఉన్న 40 శాతం మంది మాత్రమే ఆప్షన్లు పెట్టుకోవాలా అనే సందేహం వారిలో ఉన్నది. అయితే ఆ సందేహాన్ని నివృత్తి చేయగల అధికారులు లేరు.
హడావుడిగా డైరెక్టర్ ఆఫ్ హెల్త్లో ఒక గ్రీవెన్స్ సెల్ ప్రారంభించి ఆ గ్రీవెన్స్ ఒకరోజు మాత్రమే సమయం ఇచ్చి జూలై 11 సాయంత్రం 5 గంటల లోపు మీకు ఎలాంటి సందేహాలున్నా నేరుగా ఫిర్యాదు చేయండని తెలిపారు. అయితే ఇంతవరకు కొన్ని క్యాడర్ల వెకెన్సీ లిస్ట్ కానీ, అర్హత గల వారి లిస్ట్ గాని పెట్టలేదు. అంటే లిస్టు 11న ఉదయం వస్తే సాయంత్రం 5 గంటల లోపు హైదరాబాద్లో గల డైరెక్టర్ ఆఫ్ హెల్త్ కార్యాలయానికి ఎలా చేరుకుని ఫిర్యాదు చేస్తారో ఒకసారి అధికారులు ఆలోచించాలి.
అంతేకాకుండా జూలై 12వ తేదీ సాయంత్రం 5 గంటల లోపే ఆప్షన్లు పెట్టుకునే అవకాశం ఇచ్చారు. లిస్ట్ 11న ఉదయం పెట్టి జూలై 12న సాయంత్రం 5 గంటల లోపు ఆప్షన్లు పెట్టుకోవాలనడం విడ్డూరం. ఎందుకంటే వారికి కనీసం ఆలోచించుకునే సమయం కూడా ఇవ్వకుండా హడావుడిగా బదిలీలు చేయడం సరైంది కాదు. దీనివల్ల తర్వాత ఎన్నో ఆర్థిక లావాదేవీలతో అక్రమాలు జరిగే అవకాశాలున్నాయి. కాబట్టి ప్రభుత్వం గమనించి వెకెన్సీ లిస్ట్, బదిలీలకు అర్హత గల ఉద్యోగుల లిస్టు ఆలస్యమైనా ఆష్షన్లు పెట్టుకోవడానికి సమయం ఇవ్వాల్సిన అవసరం ఉన్నది.
వైద్యారోగ్యశాఖ ఉన్నతాధికారులు జిల్లా అధికారులకు సరైన గైడ్లైన్స్ ఇచ్చి గ్రీవెన్స్ జిల్లా స్థాయిలోనే ఏర్పాటుచేస్తే బాగుంటుంది. రాష్ట్రం మొత్తానికి ఒకే గ్రీవెన్స్, అదికూడా ఒకరోజు మాత్రమే ఏర్పాటుచేయడం వలన గందరగోళ పరిస్థితి ఏర్పడుతున్నది. వెకెన్సీ లిస్ట్ కూడా ఒక్కో జోన్కు ఒక్కోరకంగా ఇస్తున్నారు. అంటే జోన్లో నాలుగేండ్లు దాటిన అందరి స్థానాలను వెకెన్సీ లిస్టులో సూచించారు. కొన్ని జోన్లలో 40 శాతం మాత్రమే వెకెన్సీ దిశలో చూపించారు. ఇది సరైంది కాదు. జూలై 11న వెలువడిన ఆరోగ్య విస్తరణాధికారుల సీనియారిటీ జాబితా తప్పుల తడకగా మారింది. ఎందుకంటే పన్నెండ్లేండ్ల సీనియారిటీ ఉన్న వ్యక్తుల పేర్లు లేకపోవడం ఆశ్చర్యకరం, సీనియారిటీ క్రమంలో పేర్లు లేకపోవడం ఇంకా విచిత్రం. రెండేండ్లు మాత్రమే సీనియారిటీ గల వ్యక్తుల పేర్లు ఉండటం మరీ విచిత్రం. మొత్తంగా రాష్ట్ర ప్రభుత్వం ఆన్లైన్లో బదిలీలు చేపడుతూ ఉద్యోగులకు చుక్కలు చూపిస్తున్నది.
– (వ్యాసకర్త: ఆరోగ్య విస్తరణాధికారి)
– యెనుగందుల శంకర్