దేశవ్యాప్తంగా జరుగుతున్న సార్వత్రిక ఎన్నికల్లో భాగంగా తెలుగు రాష్ర్టాల్లో 4వ దశలో జరిగిన పోలింగ్ ప్రశాంతంగా ముగిసింది. ఏపీలో పలుచోట్ల ఉద్రిక్తతలు చోటుచేసుకోగా పోటాపోటీగా సాగిన ఎన్నికల సమరం ముగిసినట్లయింది. తెలంగాణ రాష్ట్రంలో శాంతియుత వాతావరణంలో పోలింగ్ ప్రక్రియ పూర్తయింది. దీంతో ఎన్నికల అధికారులు ఊపిరి పీల్చుకున్నారు. తెలంగాణలో 17 లోక్సభ స్థానాలు, ఏపీలోని 175 అసెంబ్లీ, 25 పార్లమెంట్ స్థానాలకు పోలింగ్ జరిగింది. ఓట్ల లెక్కింపు కోసం నేతలు 20 రోజుల పాటు ఎదురుచూడాల్సిన పరిస్థితి నెలకొన్నది.
2019 ఎన్నికలతో పోల్చుకుంటే తెలంగాణలో పోలింగ్ శాతం పెరిగింది. ఆరు నెలల కిందటే ఓటు వేసిన ప్రజలు మరింత ఉత్సాహంగా పోలింగ్ బూత్లకు రావడంపై అధికారులు హర్షం వ్యక్తం చేస్తున్నారు. గత ఎన్నికల్లో 62.07 శాతం పోలింగ్ నమోదు కాగా ఈసారి 64 శాతం దాటేసింది. పూర్తి లెక్కలు వచ్చేసరికి ఇది 70 వరకు ఉంటుందని అధికారులు అంటున్నారు. దీంతో రాజకీయపార్టీల నేతలు గెలుపు ఓటములపై మల్లగుల్లాలు పడుతున్నారు.
గతేడాది నవంబర్లో జరిగిన అసెంబ్లీ ఎన్నికల కంటే తెలంగాణలో పార్లమెంట్ ఎన్నికలకు జరిగిన పోలింగ్ శాతం పెరగడంతో రాజకీయపార్టీల నేతలు రెండంకెల స్థానాలు సాధిస్తామన్న ధీమాతో ఉన్నారు. తెలంగాణలో అధికార కాంగ్రెస్ పార్టీ, ప్రధాన ప్రతిపక్షమైన బీఆర్ఎస్, బీజేపీల మధ్య తీవ్రమైన ముక్కోణపు పోటీ నెలకొనడంతో పాటు హైదరాబాద్ పార్లమెంట్ స్థానంలో ఎంఐఎం, బీజేపీ మధ్య ఉత్కంఠ భరితమైన పోటీ కొనసాగింది. అసెంబ్లీ ఎన్నికలతో పోలిస్తే.. పార్లమెంటుకు జరిగిన పోలింగ్ శాతం పెరగడంతో ఇక్కడ అధికారపార్టీపై ఓటర్లు తమ అసంతృప్తిని తెలియజేశారన్న అనుమానాలున్నాయి.
డిసెంబర్ నెల నుంచి కాంగ్రెస్ పార్టీ పనితీరుపై తెలంగాణ రాష్ట్రవ్యాప్తంగా ప్రజల్లో విశ్వాసం సన్నగిల్లిందన్న వాదనలు బలంగా వినిపిస్తున్నాయి. దీంతో పార్లమెంట్ ఎన్నికల్లో ఆ పార్టీ వెనుకబడే అవకాశాలు లేకపోలేదనే విషయాన్ని పోలింగ్ శాతం చూస్తే తెలుస్తోందని కాంగ్రెస్ పార్టీలోని మాజీ ఎంపీ ఒకరు వ్యాఖ్యానించడం గమనార్హం. బీఆర్ఎస్, బీజేపీ, కాంగ్రెస్ పార్టీలు తమకు రెండంకెల సీట్లు వస్తాయన్న ఆశలతో ఉండటం సహజమే అయినా.. ఫలితాలు మాత్రం తెలంగాణాలో తారుమారయ్యే అవకాశాలు లేకపోలేదని ఓటర్ల నాడిని బట్టి తెలుస్తున్నది.
కొన్నిచోట్ల బీజేపీ అభ్యర్థుల హడావుడి తప్ప అంతా ప్రశాంతంగా సాగింది. బీజేపీ అభ్యర్థులు అరవింద్, మాధవీలత ఇద్దరు పోలింగ్ కేంద్రాలకు తిరుగుతూ బురఖా వేసుకున్నవారిపై అభ్యంతరం వ్యక్తం చేశారు. వాళ్లు అలా వస్తే ఓటర్లను ఎలా గుర్తుపడతారంటూ అధికారులను నిలదీశారు. అధికారుల విధులకు ఆటంకం కలిగించడంతోపాటు ఓటర్లను ఇబ్బంది పెట్టారని వారిపై కేసులు నమోదయ్యాయి. ఆరు నెలల కిందటనే అసెంబ్లీ ఎన్నికల్లో ఓటు వేసిన ప్రజలు ఈసారి ఏం వస్తాంలే అన్నట్టు కాకుండా భారీగా తరలివచ్చి ఓట్లు వేశారు. రాత్రి 11 గంటల వరకు అధికారులు చెప్పిన లెక్కల ప్రకారం 64.74 శాతం తెలంగాణలో పోలింగ్ నమోదైంది.
ఏపీ పోలింగ్లో హైడ్రామా కనిపిస్తే తెలంగాణలో మాత్రం సైలెంట్గా ఓటింగ్ జరిగిపోయింది. తెలంగాణలో పోలింగ్ జరుగుతుండగా భారీగా ఫిర్యాదులు వచ్చాయి. వాటిలో నలభై ఫిర్యాదులకు సంబంధించి కేసులు రిజిష్టర్ చేసినట్టు రాష్ట్ర ఎన్నికల కమిషనర్ వికాస్రాజ్ ప్రకటించారు. తెలంగాణ వ్యాప్తంగా 44 స్ట్రాంగ్ రూమ్లలో ఈవీఎంలు భద్రపరిచారు. రాష్ట్రంలో 4,14,01,887 మంది ఓటర్లలో రెండు కోట్ల పది లక్షల 58 వేల 615 మంది మహిళలున్నారు. ఈ లెక్కన అభ్యర్థుల భవిష్యత్తును నిర్ణయించేది వీళ్లే. అందుకే వీరి ఓటింగ్ శాతం పెరగడం ఎవరి తలరాత మారుస్తుందో అన్న చర్చ రాజకీయ వర్గాల్లో జోరుగా సాగుతున్నది.
మరోవైపు ఏపీలో ఇటు అసెంబ్లీ, అటు పార్లమెంట్కు ఒకేసారి ఎన్నికలు జరగడంతో తీవ్ర ఉత్కంఠత ఏర్పడింది. మహిళలు, వృద్ధులు భారీ సంఖ్యలో పోలింగ్ కేంద్రాలకు వచ్చి తమ హక్కును వినియోగించుకున్నారు. ఇది అభ్యర్థులను ఏ తీరానికి చేరుస్తుందోనన్న టెన్షన్ పార్టీల్లో ఉన్నది. ఉదయం 6 గంటల నుంచి పోలింగ్ కేంద్రాల వద్ద మహిళలు పెద్ద ఎత్తున గుమిగూడారు. రాష్ట్రంలోని పలు పోలింగ్ కేంద్రాల్లో అర్ధరాత్రి వరకూ పోలింగ్ జరగడం ఒక రికార్డు. ఉదయం 7 గంటల నుంచే పోలింగ్ కేంద్రాల్లో ఓటర్లు బారులు తీరి ఉండటాన్ని బట్టి పోలింగ్ శాతం గణనీయంగా పెరిగిందని రాజకీయపార్టీలు లెక్కలు వేస్తున్నాయి. రాష్ట్రంలో ప్రధానంగా అధికార వైఎస్సార్సీపీ, ప్రతిపక్ష టీడీపీ దాని మిత్రపక్షాలైన జనసేన, బీజేపీ అభ్యర్థుల మధ్య తీవ్రమైన పోటీ ఏర్పడింది.
జాతీయస్థాయిలో బీజేపీకి గట్టిపోటీ?: దేశవ్యాప్తంగా మోదీకి వ్యతిరేక పవనాలు వీస్తున్నాయనే సంకేతాలు వెలువడుతున్నాయి. ప్రధానంగా మణిపూర్ మతకల్లోలాలు.. అక్కడ మహిళలపై జరిగిన ఘోరమైన దాడులే దీనికి ప్రధానకారణమని స్పష్టమవుతున్నది. అలాగే.. ఉత్తరాది రాష్ర్టాల్లో బీజేపీకి 2024 ఎన్నికల్లో గట్టి దెబ్బ తగిలే అవకాశాలున్నాయని రాజకీయ విశ్లేషకులు చెప్తున్నారు. అలాగే పలు జాతీయ, అంతర్జాతీయ మీడియా సంస్థలు కూడా 2024లో భారత్లో జరుగుతున్న ఎన్నికలపై సర్వేలు నిర్వహించడం గమనార్హం. అయితే మోదీ ప్రాబల్యంతో తాము వరుసగా మూడవ సారి కేంద్రంలో ప్రభుత్వాన్ని ఏర్పాటు చేస్తామన్న ధీమాను బీజేపీ నేతలు వ్యక్తం చేస్తున్నారు.
అలాగే ఇండియా కూటమిలోని భాగస్వామ్య పార్టీలు కూడా అధికారం తమదేనని అంచనాలు వేస్తున్నాయి. కానీ కూటమిలోని పలు పార్టీలు ఎన్నికల ముందు తొలగిపోవడంతో విజయావకాశాలపై ఆశలు సన్నగిల్లాయి. అయితే 2024 ఎన్నికల్లో గెలుపుపై ఎవరి ధీమా వాళ్లు వ్యక్తం చేస్తున్నారు. ఏదేమైనా దేశవ్యాప్తంగా జరుగుతున్న సార్వత్రిక ఎన్నికలు ప్రాంతీయ పార్టీల భవిష్యత్తుతో పాటు.. కేంద్రంలో కాంగ్రెస్ పార్టీకి సీట్లు ఎన్ని వస్తాయి? అధికార బీజేపీ ఆశించినవిధంగా 400కు పైగా సీట్లు వస్తాయా? అనే అంశంపై తర్జనభర్జనలు పడుతున్నారు. అయితే బీజేపీకి ఉత్తరాదిలో సీట్లు తగ్గుతున్నందునే ఈసారి దక్షిణాది రాష్ర్టాలపై పొత్తులు… సీట్లు పెంచుకోవడానికి ఆ పార్టీ అగ్రనేతలు పాట్లుపడినట్టు స్పష్టమైంది. ఏ రాజకీయ పార్టీ ఎన్ని పాట్లు పడినా… తమకు లభించే సీట్ల సంఖ్య కోసం.. జూన్ 4 వరకు ఎదురుచూడాల్సిందే.
వి.వి.వెంకటేశ్వరరావు
63008 66637