‘ఢిల్లీ లిక్కర్ పాలసీ అసలు కేసే కాదు, అది దర్యాప్తు సంస్థలు అల్లిన కేసు’ అని ఈ కేసుతో మొదటినుంచీ సంబంధమున్న సీనియర్ న్యాయవాది తన్వీర్ అహ్మద్ మీర్ చెప్పారు. మన దర్యాప్తు సంస్థలు ఈడీ, సీబీఐలు కేసు నమోదు కాకముందే, దర్యాప్తు పూర్తి కాకముందే ఒక నిర్ధారణ వస్తాయని, ఆ తర్వాత దాని చుట్టూ సాక్ష్యాలు అల్లుకుపోతాయని ఆయన పేర్కొన్నారు. అందువల్ల ఆ కేసు నిలబడదని, అందుకే ఇప్పటికీ విచారణ మొదలుపెట్టడం లేదని, పాడ్కాస్టర్ సిద్ధార్థకు ఇచ్చిన ఇంటర్వ్యూలో తెలిపారు. ఆ ఇంటర్వ్యూ సారాంశం…
అరవింద్ కేజ్రీవాల్ను అరెస్టు చేసిన ఢిల్లీ లిక్కర్ పాలసీ కేసులో సీబీఐ మొదటగా ఎంగేజ్ చేసి, ఆ తర్వాత బ్లాక్ చేయబడిన న్యాయవాదిని నేను. సీబీఐ ఎఫ్ఐఆర్ కూడా నమోదు చేయకముందే నన్ను ఎంగేజ్ చేసుకుంది. ఈ కేసును పరిశీలిస్తే.. మనకు ఓ పెద్ద ఎత్తుగడ కనిపిస్తుంది. ఇందులో ఏమైందంటే నిందితుల్లోనే ఒకరిని తీసుకుని సాక్షిగా మార్చేశారు. మరి ఆ నిందితునికి క్షమాభిక్ష ఎవరు పెట్టారు? ‘చూడు నిన్ను వదిలిపెడతాం.. నువ్వు మిగిలినవారికి వ్యతిరేకంగా సాక్ష్యం చెప్తావా?’ అనే ప్రాతిపదికన క్షమాభిక్ష మంజూరు చేశారా?
నిన్న నేను ఎక్స్ (ట్విట్టర్)లో ఓ ట్వీట్ చేశాను. కింది కోర్టులో బెయిల్ లభించడం, దానిపై హైకోర్టులో ఎదురుదెబ్బ తగలడంపై అదనపు సొలిసిటర్ జనరల్ మాటలకు సంబంధించింది ఆ ట్వీట్. నిందితునికి ఒక ‘లాలిపాప్’ ఇస్తే అతడు ఇతరుల గురించి సాక్ష్యం ఇస్తాడు.. ఇదే దర్యాప్తు కళ అన్నారు. కానీ, నిందితునికి ‘లాలిపాప్’ ఇవ్వడం దర్యాప్తు కళ కిందకు రాదని నేను కామెంట్ చేశాను. దర్యాప్తు బాధ్యత లేదా దమ్ము అనేది ఒక నిందితునికి లాలిపాప్ ఇచ్చి ఇతర నిందితులకు వ్యతిరేకంగా సాక్ష్యం చెప్పించడం కానే కాదన్నాను. మీరు ఒక పురావస్తు శాస్త్రవేత్తలా పని చేయాలని సూచించాను. సత్యశోధన కోసం సాక్ష్యాల పొరలను తవ్వి వెలికితీసి పెట్టాలి. వాటి ఆధారంగా ఒక నిర్ధారణకు రావాలని తెలిపాను.
మన దగ్గర, ముఖ్యంగా సీబీఐ, ఈడీ వంటి కేంద్ర దర్యాప్తు సంస్థల విషయంలో పెద్ద సమస్య ఏంటంటే ముందే నిర్ధారణకు రావడం జరుగుతుంది. ఇక దానిచుట్టూ సాక్ష్యాలను అల్లుకుపోతుంటారు. చివరకు రావాల్సిన నిర్ధారణకు ముందే వస్తారు. దాని చుట్టూ సాక్ష్యాలను ఒక స్వెటర్లా అల్లుకుంటూపోతారు. ఇలాంటి వైఖరి తీసుకుంటే మీ కేసు దానంతట అదే బలహీనపడుతుంది. ఎందుకంటే మంచి డిఫెన్స్ లాయర్ ఎవరైనా మీ కేసులో కొన్ని లొసుగులను చటుక్కున పట్టుకుంటాడు.
బెయిల్ రావడం, రాకపోవడం మీద ఆధారపడి కేసు నిలవదు. కేసులో దోషిత్వం నిరూపించిన రోజే దానిలో ఉన్న పస ఎంతో తేలిపోతుంది. అప్పుడే మీరు కేసు గెలుస్తారు. మీరు కేసు ఓడిపోయిన తర్వాత ఈ బెయిలుగియిలు ఏం పనిచేస్తాయి?
సీఎంను, డిప్యూటీ సీఎంను ఏడాదో, ఏడాదిన్నరో ఏదో జైలులో పెడితే ఏమవుతుంది? దీని వల్ల సమాజానికి ఉపయోగం ఏమిటి? ఎవరైనా నేరం చేస్తే మీరు నేర నిరూపణ చేసి చూపెడితే సమాజానికి మేలు జరుగుతుంది. మీ నేరనిరూపణ రేటు మరీ 8 శాతమైతే ఎలా? చట్టాన్ని అమలు చేసే ఏ సంస్థకైనా అరెస్టు చేసి దాని మీద పొదుగుతున్న కోడి గుడ్ల మీద కూర్చున్నట్టుగా కూర్చోమని సమాజం చెప్పదు. జాతక కుండలి గీస్తూ కూర్చోమని పురమాయించదు. మీ బాధ్యత ఏమిటి? నేర నిరూపణ. ఎవరైనా మనీలాండరింగ్కు పాల్పడితే ఆరునెలల్లో శిక్ష వేయించి చూపండి. లేదా సంవత్సర కాలంలో వేయించండి. మీ దగ్గర 8 వేల కేసులున్నాయి. ఇప్పటి దాకా 24 కేసుల్లో మాత్రమే విచారణలు జరిగాయి. అటునుంచి కూడినా, ఇటునుంచి కూడినా.. అన్నీ కలిపితే కేవలం 24, అంతే.
ఈడీ అయితే ప్రాసిక్యూషనే మొదలుపెట్టదు. సాక్ష్యాలు సమర్పించదు. ‘మనిషిని లోపల వేయండి. కేసు పెట్టండి. కానీ, విచారణ మొదలుపెట్టొద్ద’ని పైనుంచి ఆర్డరు వస్తుంది. అసలు విచారణ మొదలుపెడితే డిఫెన్స్ లాయర్ మిమ్మల్ని గుడ్డలిప్పదీసి నిలబెడతాడు. దాంతో కేసు ముగిసిపోతుంది. వాళ్ల దగ్గర గట్టి లాయర్లు లేరని కాదు.వారు పెట్టింది బూటకపు వండివార్చిన కేసు కావడమే అసలు సమస్య. ఎక్కడో అక్కడ అది చతికిలబడుతుంది.
బ్రిండ్ కో సేల్స్ ప్రైవేట్ లిమిటెడ్ మేనేజింగ్ డైరెక్టర్ అమన్ దీప్సింగ్ ఢల్ తరఫున ఈ కేసులో నేను వాదిస్తున్నాను. అతిపెద్ద విదేశీ మద్యం దిగుమతిదారుల్లో ఈ కంపెనీ ఒకటి. నా క్లయింట్ను జైలులో పెట్టారు. కానీ, నిజానికి కేసు ఏదీ లేదు. కుట్ర జరిగిందని ఇప్పుడు అందరి చుట్టూ వాళ్లు (దర్యాప్తు సంస్థలు) ఓ కేసు అల్లారు. ఇందులో ఆమ్ ఆద్మీ పార్టీవాళ్లు, సౌత్ గ్రూప్.. అంటే హైదరాబాద్ గ్రూప్, కవిత తదితరులు అందరూ జైలులో ఉన్నారు. ఆమె (కవిత) కూడా రాజకీయ కుటుంబం నుంచి వచ్చారు. శ్రీ అరబిందో ఫార్మా వంటి సంస్థలకు చెందిన కొందరు బిజినెస్ మాగ్నెట్స్ కూడా ఉన్నారు. శరత్రెడ్డి మొదట ఈ కేసులో కింగ్పిన్ అన్నారు. అప్పుడు నిందితుడు. కానీ, ఈ రోజు ఆయన సాక్షిగా ఉన్నారు. వందకోట్ల ఎలక్టోరల్ బాండ్లు తీసుకున్నారు. అందులో కొంత ముందు, కొంత తర్వాత కొన్నారు. ఈడీ లెక్క ప్రకారమే ప్రధానంగా ముడుపులు చెల్లించిన వ్యక్తే ఇప్పుడు సాక్షిగా మారాడని అంటున్నారు. అంటే తమరు ఇక్కడ ఏం న్యాయం జరిపిస్తున్నారు? ఇది ప్రస్తుతం న్యాయస్థానం ముందున్న కేసు కనుక నేను దీనిపై ఎక్కువగా మాట్లాడితే బాగుండదు. నేను కూడా పాల్గొంటున్నాను కనుక ఎంతోకొంత చెప్తానంతే.
ఇక కేసు వల్ల కేజ్రీవాల్కు నష్టం జరిగిందా? అనే విషయాన్ని తీసుకుంటే అరెస్టు చేస్తే ఎంతోకొంత నష్టం ఉంటుంది కదా.. ఇమేజ్ కొంత దెబ్బతింటుంది కదా. ఢిల్లీలో కేజ్రీవాల్ గురించి ఏమనుకుంటున్నారు అని ప్రజలను అడిగితే.. ఢిల్లీకి ఎంతో కొంత మంచే చేశారని అందరూ చెప్తారు. జనంలో ఈ అభిప్రాయం ఉంది. మళ్లీ సీఎంగా వస్తాడా? అంటే ఎందుకు జరగకూడదనే అంటాను. గెలుస్తాడా, లేదా అనేది కాదు. సెంటిమెంటైతే ఉంది. ఈ కేసులో మాత్రం ఏమీ లేదు. ఈ కేసు గాలిలో వేలాడుతున్నది. నిలుస్తుందా, తేలిపోతుందా అనేది తర్వాత సంగతి. ముందు విచారణ మొదలుపెట్టండి, దమ్ముంటే!
– ఎడిటోరియల్ డెస్క్