అస్తిత్వాన్ని ఆస్తిగా చేసుకొని బతికే మనుషులున్న రాయలసీమలో కరువు రాజ్యమేలుతున్నది. ఇప్పటివరకు దేశాన్ని, రాష్ర్టాన్ని పాలించిన ఏలికలెవ్వరూ రాయలసీమ దుస్థితిని మార్చలేకపోయారు. ఒకప్పుడు సీమలాగానే కరువుతో విలవిల్లాడిన తెలంగాణను సస్యశ్యామలం చేసిన బీఆర్ఎస్ అధినేత కేసీఆర్ ఇక్కడికి వస్తేనే సీమ అభివృద్ధి చెందుతుందనిపిస్తున్నది. తెలంగాణను ఆదర్శ రాష్ట్రంగా తీర్చిదిద్దిన కేసీఆర్ కావాలని, రావాలని దేశం అడుగుతున్నది. దేశంలో భాగమైన రాయలసీమ కూడా కేసీఆర్ రాక కోసం ఎదురుచూస్తున్నది.
ఘనమైన చరిత్ర కలిగిన రాయలసీమలో బానిసత్వం విరాజిల్లుతున్నది. పట్టెడు కూడు కోసం ఎవరివో పగలు, ప్రతీకారాల కోసం సామాన్యులు బలవుతున్నారు. రత్నాలు అమ్మిన నేలలో నేడు రక్తం పారుతున్నది. సీమ ఉన్నత స్థితికి వస్తే తరాల నుంచి కాపాడుకుంటూ వచ్చిన బానిస వ్యవస్థ బద్ధలవుతుందని ఆ వ్యవస్థను భద్రంగా కాపాడుకుంటూ వస్తున్నారు సీమ నాయకులు. కరువు రక్కసి ధాటికి పేదలు వలసబాట పట్టినా సీమ నాయకుల ఖద్దరు చొక్కాల ఇస్త్రీ మడత చెక్కు చెదరలేదు.
కృష్ణా, తుంగభద్ర, కుందూ, పెన్న, భవనాసి నదులు చెంతనే ఉన్నా సీమ ప్రజల గొంతులు తడవడం లేదు. బీడు బారిన నేలల్లో విత్తనాలు పురుడు పోసుకోవడం లేదు. దశాబ్దాల కరువు అంతానికి పరిష్కారం దొరకడం లేదు. శ్రీబాగ్ ఒడంబడిక, పెద్ద మనుషుల ఒప్పందంతో సీమలోని పెద్ద మనుషులకు న్యాయం జరిగింది కానీ సామాన్యులకు జరగలేదు. బ్రిటీష్వారు నిర్మించిన కేసీ కాలువ మినహాయించి ఇప్పటివరకు పాలకులెవరూ చెరువులు, రిజర్వాయర్ల నిర్మాణం చేపట్టలేదు. పోతిరెడ్డిపాడు నుంచి తెలుగు గంగ పేరుతో చెన్నైకు నీళ్లిస్తున్నారు కానీ కరువుకు పర్యాయ పదంగా మారిన సీమ అభివృద్ధి గురించి ఇప్పటివరకు ఏ ముఖ్యమంత్రి గానీ, ముఖ్య నాయకులు గానీ ఆలోచించ లేదు.
కరువుతో రాజకీయం చేస్తున్న రాజకీయ నాయకుల నుంచి రాయలసీమకు విముక్తి కావాలి. చిత్తశుద్ధి లేని రాజకీయం అభివృద్ధిని కోరుకోదు, అందుకే సీమకు కేసీఆర్ కావాలి. పాడి పంటలు ఉంటే సీమ పచ్చగా ఉంటుంది. బీడు భూములు పచ్చగా ఉండాలంటే నదులు వాటిని తడపాలి. ఒకప్పుడు వలసలకు నిలయమైన తెలంగాణలో ఎడారిని తలపించే బీడు భూముల్లో నేడు పచ్చని పైరులు మణిహారంగా ఉన్నాయి. ధాన్యం రాశులతో తెలంగాణ తులతూగుతున్నది. గోదావరి, కృష్ణా పరవళ్లతో బీడు భూములు సాగులోకి వచ్చాయి. రాష్ట్రంలోని ప్రతి గుంట భూమికీ సాగునీరు అందుతుండటంతో రైతు రాజుగా మారాడు.
తెలంగాణ రాష్ట్రం ఏర్పడిన ఐదేండ్ల తర్వాత నుంచి ఇతర రాష్ర్టాల ప్రజలు ఉపాధి కోసం తెలంగాణకు వలస వస్తున్నారు. దీన్ని బట్టి తెలంగాణ వృద్ధి రేటు ఎలా ఉందో అర్థమవుతున్నది. ప్రజలకు మేలు చేయాలనే చిత్తశుద్ధి కలిగిన నాయకుడి నాయకత్వంలో రాష్ట్రం ఉంటే భవిష్యత్తు బంగారుమయం అవుతుందని కేసీఆర్ను చూస్తే తెలుస్తుంది. పెద్దగా సారం లేని భూముల్లో సైతం సిరులు పండిస్తున్న అభివృద్ధిని తెలంగాణలో మాత్రమే చూస్తున్నాం.
అందుకే తెలంగాణ రాష్ట్ర అభివృద్ధి పితామహుడుగా కేసీఆర్ ప్రశంసలు అందుకుంటున్నారు. గతంలో తెలంగాణలో నదులు నడక దూరంలో ఉన్నా పొలాలకు సాగునీరు దరి చేరలేదు. పాలకులు సాగునీటి పేరుతో ఓటు బ్యాంకు రాజకీయాలు చేస్తూ ఎన్నికల అవసరాలను తీర్చుకొనేవారు. ప్రాజెక్టులు పూర్తి చేయడానికి కొన్ని దశాబ్దాలు పట్టేది. కాలువలు తవ్వినా నీటిని నిల్వచేసే రిజర్వాయర్లు, చెరువులు లేకపోవడంతో రైతులు వంతుల వారీగా పొలాలను తడుపుకొనేందుకు కుస్తీ పట్టేవారు.
ఇలాంటి రాష్ట్రంలో కేసీఆర్ రాకతో స్థితిగతులు సంపూర్ణంగా మారాయి. కేసీఆర్ కాకుండా మరెవరు అధికారంలోకి వచ్చినా తెలంగాణ అంధకారంలోనే ఉండి, అభివృద్ధి మసకబారేది. కేసీఆర్ ముందుచూపుతో చెరువుల పూడికలు తీయించి, కాలువలకు మరమ్మతులు చేయించి, పెండింగ్ ప్రాజెక్టులను వేగవంతంగా పూర్తి చేయడంతో వ్యవసాయానికి తగినంత సాగునీరు అందుబాటులోకి వచ్చింది. కాళేశ్వరం, పాలమూరు-రంగారెడ్డి ప్రాజెక్టులతో పాటు అతిపెద్ద రిజర్వాయర్ల నిర్మాణం చేపట్టి పదేండ్లలోనే తెలంగాణ దశ దిశను మార్చారు. అపర భగీరథుడిగా మారిన కేసీఆర్ ఇంటింటికీ తాగునీరందించి ప్రజల దాహం తీర్చుతున్నారు.
కేసీఆర్ కలల ప్రాజెక్టులకు కూత వేటు దూరంలో ఉన్న సీమలో కరువు కోరలు చాచింది. రాయలసీమలో సాగునీటి కోసం అధికార, ప్రతిపక్ష పార్టీలు పోటాపోటీగా ఫొటో ఎగ్జిబిషన్ పెట్టుకుంటున్నారంటే వారి చిత్తశుద్ధి ఏమిటో తెలుస్తున్నది. సీమవాసుల గొంతు తడపని, పొలాలకు సాగునీరు అందివ్వలేని కృష్ణా, తుంగభద్ర నదుల పరవళ్లు ఎక్కడికి వెళ్తున్నాయనేది వెయ్యి డాలర్ల ప్రశ్నగా మిగిలిపోయింది. గతంలో తెలంగాణ వెనుకుబాటుతనాన్ని రూపు మాపుతామని ప్రపంచ బ్యాంకులో అప్పులు తెచ్చిన పాలకులు, ఇప్పుడు రాయలసీమ వెనుకుబాటుతనాన్ని చూపించి అప్పులు తెస్తూ రాజకీయాలు చేస్తున్నారు. కరువుతో రాజకీయాలు చేసే నాయకులకు చిత్తశుద్ధి అంటే ఏమిటో తెలియాలంటే కేసీఆర్ రాయలసీమలో అడుగుపెట్టాలి. ఇక్కడి కరువు పోవాలంటే రాయలసీమకు కేసీఆర్ కావాలి. పుష్కలంగా ఉన్న వనరులను దోచుకోవడం కోసం ఫ్యాక్షన్ రాజకీయాలు చేస్తూ కరువును శాశ్వతంగా ఉంచాలనుకొనే నాయకుల చెర నుంచి సీమకు విముక్తి కావాలంటే కేసీఆర్ రావాలి.
(వ్యాసకర్త: ఎస్ఎఫ్ఐ మాజీ జిల్లా ప్రధాన కార్యదర్శి, కర్నూల్)
-సీపీ నాయుడు
85199 91515