రాష్ట్రంలో కొత్త ప్రభుత్వం ఏర్పడి ఏడు నెలలు పూర్తి కావస్తున్నప్పటికీ, ఆరు నెలల కాలం ఎన్నికల కోడ్తోనే గడిచిపోయింది. అయినా, ఇంకా ప్రజా ప్రతినిధులు, ప్రభుత్వ అధికారులు పరిపూర్ణంగా ప్రజా సమస్యల పరిష్కారంలో నిమగ్నమైనట్టు రాష్ట్రంలో పరిస్థితి కనిపించట్లేదు.
ప్రస్తుత కాంగ్రెస్ ప్రభుత్వం ఎన్నికల మ్యానిఫెస్టోలో ప్రజలకు ఇచ్చిన ముఖ్యమైన హామీ ఆరు గ్యారంటీలు. వీటిలో మహిళలకు ఉచిత బస్సు ప్రయాణం మాత్రమే అమలులో ఉన్నది. ఇక మిగతా పథకాలను కూడా ప్రజల వద్దకు చేరేట్టుగా చూసుకోవలసిన బాధ్యత ప్రభుత్వం, ప్రజా ప్రతినిధులు, అధికారులపై ఉన్నది.
ప్రజా సమస్యలపై దృష్టి సారించాల్సిన ప్రభుత్వం పత్రికల ప్రకటనలకు మాత్రమే పరిమితమైందని మేధావులు విశ్లేషిస్తున్నారు. అధికారంలోకి వచ్చి ఆరు నెలలు పూర్తయినా ఎంతసేపూ గత ప్రభుత్వం చేసిన అభివృద్ధి పనుల్లో అవినీతిని వెతికేందుకే తంటాలు పడుతున్నారు. అంతే తప్ప తాము ఎంతవరకు ప్రజా సమస్యలపై స్పందిస్తున్నామన్న సంగతిని మర్చిపోతున్నారు. గత ప్రభుత్వం పదేండ్లలో ప్రజలకు ఏం చేయగలిగింది, ఏం చేయలేకపోయింది? అని ప్రజల్లోకి వెళ్లి ఒక సర్వే నిర్వహించి మెజారిటీ ప్రజల ఆలోచనలను పరిగణనలోకి తీసుకోవాలి. ప్రభుత్వం ఆ దిశగా ముందుకు కొనసాగినప్పుడే ప్రజల మద్దతు లభిస్తుందన్న విషయాన్ని మరువరాదు.
పరిపాలన విధానంలో పెద్దగా కష్టపడాల్సిన పనేమీ లేదు, అంతా సిద్ధం చేసే ఉంచామని తెలంగాణ తొలి ముఖ్యమంత్రి కేసీఆర్ అంటున్నారు. ఇది నూటికి నూరుపాళ్లు నిజం. అరువై ఏండ్ల ఆంధ్రా పాలకుల పెత్తందారీ విధానంతో తెలంగాణ ప్రజలు విసిగి వేసారిపోయారు. తెలంగాణ రాష్ట్ర ఆవిర్భావం నుంచి 2023 శాసనసభ ఎన్నికల వరకు అన్ని శాఖల్లో జరిగిన ప్రక్షాళన, ప్రగతితో తెలంగాణ రాష్ట్రం కళకళలాడుతున్నది. ఈ నిజాన్ని 90 శాతం ప్రజలు కాదనలేరు. దాని ఆధారంగా ప్రస్తుత ప్రభుత్వం ఎన్నికల్లో ఇచ్చిన హామీలను వడివడిగా అమలుచేస్తూ ఎలాంటి ఇబ్బందులు లేకుండా పాలన చేయవచ్చు. కానీ, కాంగ్రెస్ నాయకులు దానికి విరుద్ధంగా వ్యవహరిస్తున్నారు. ప్రజలకు సేవ చేయాల్సిన ప్రభుత్వ ప్రజాప్రతినిధులు ప్రతిపక్ష నాయకులపై పగ, ప్రతీకారాలు పెంచుకుంటున్నారు. అది ప్రజాస్వామ్యానికి ప్రమాదకరం.
కొత్త ప్రభుత్వం ఏర్పడి చూస్తుండగానే ఆరు నెలలు గడిచిపోయాయి. మరో నాలుగున్నరేండ్లు మాత్రమే పాలించే అవకాశం కాంగ్రెస్ ప్రభుత్వానికి ఉన్నది. ఇందులో చివరి ఆరు నెలల్లో ఎన్నికల హడావుడే ఉంటుంది. ప్రజలకేం పని చేసినా మధ్యలో నాలుగేండ్లు మాత్రమే. కాబట్టి కాంగ్రెస్ ప్రభుత్వం పనికిరాని పనులను పట్టించుకోకుండా ప్రజా సమస్యల పరిష్కారం కోసం, వారు ఇచ్చిన హామీలను నెరవేర్చేందుకు సంసిద్ధులు కావాలి. క్షణం తీరిక లేకుండా కష్టపడితే కానీ, అనుకున్న స్థాయిలో ప్రజలకు న్యాయం చేయలేరు. ఇదిలా ఉంటే త్వరలోనే గ్రామ పంచాయతీలు, స్థానిక సంస్థలు, ఆ తర్వాత మున్సిపాలిటీల ఎన్నికలు నిర్వహించే అవకాశం ఉన్నది. కచ్చితంగా చెప్పాలంటే కాంగ్రెస్ ప్రభుత్వానికి మూడున్నరేండ్ల అవకాశం మాత్రమే ఉన్నదని విశ్లేషకులు చెప్తున్నారు. కాంగ్రెస్ నాయకులు ఈ విషయాన్ని దృష్టిలో పెట్టుకొని ప్రజా సమస్యల పరిష్కారం కోసం పూర్తిగా కంకణబద్ధులు కావాలని ప్రజలు భావిస్తున్నారు.
(వ్యాసకర్త: సీనియర్ పాత్రికేయులు)
-కందుకూరి యాదగిరి
96402 82050