అధికారం కోసమో, ఆధిపత్యం కోసమో అబద్ధాలాడేందుకు వెనుకాడట్లేదు నేటి పాలకులు. గొప్పల కోసం అలవికాని హామీలు, అబద్ధపు వాగ్దానాలతో గద్దెనెక్కి తీరా అధికారంలోకి వచ్చాక ప్రజలను మోసం చేస్తున్నారు. ‘వినాశకాలే విపరీత బుద్ధి’ అన్నట్టుగా వ్యవహరిస్తున్న కాంగ్రెస్ సర్కార్ తీరును చూస్తుంటే పురాణాల్లోని ఒక సంఘటన యాదికొస్తున్నది. భస్మాసురుడు అనే రాక్షసుడు శివభక్తుడు. శివుడి మెప్పు కోసం అతను చాలా కాలం పాటు తపస్సు చేశాడు. అతని తపస్సుకు మెచ్చిన శివుడు ప్రత్యక్షమయ్యాడు. ఏం వరం కావాలో కోరుకోమని చెప్పాడు. దీంతో అతను ‘తాను ఎవరి తలపై చేయిపెడితే వారు బూడిదైపోయే’ వరాన్ని ప్రసాదించాలని శివుడిని కోరుకుంటాడు. అందుకు సమ్మతించిన శివుడు అతను కోరుకున్నట్టే వరం ప్రసాదిస్తాడు. అయితే ‘వినాశకాలే విపరీత బుద్ధి’ అన్నట్టుగా భస్మాసురుడు వరమిచ్చిన శివుడి తలపైనే చెయ్యి పెట్టాలని ప్రయత్నిస్తాడు. దీంతో విష్ణుమూర్తి సహాయాన్ని శివుడు కోరుతాడు. మారువేషంలో ఆ రాక్షసుడి వద్దకు వెళ్లిన విష్ణువు అతని తలపైనే చెయ్యి పెట్టుకునేలా చేస్తాడు. దీంతో భస్మాసురుడు అంతమైపోతాడు.
అచ్చం ఇలాంటి ఘటన కలియుగంలోనూ జరిగిందంటే నమ్ముతారా? తప్పదు, నమ్మాల్సిందే. మాజీ మంత్రి హరీశ్రావు గీసిన పద్మవ్యూహంలో కాంగ్రెస్ ప్రభు త్వం చిక్కుకున్నది. అలవికాని అబద్ధపు హామీ లు ఇచ్చి అధికారంలోకి వచ్చిన కాంగ్రెస్ పార్టీ పరిపాలన చేతకాక ప్రతిపక్ష బీఆర్ఎస్ పార్టీపై బురదజల్లడంపైనే దృష్టిపెట్టింది. ప్రజలు నష్టపోతున్నారని భావించిన మాజీ మంత్రి తన్నీరు హరీశ్రావు.. సీఎం రేవంత్కు సవాల్ విసిరారు. ‘కాంగ్రెస్ ప్రభుత్వం ఇచ్చిన 6 గ్యారంటీలు, 13 హామీలతో పాటు రూ.2 లక్షల రుణమాఫీని ఒకేసారి పూర్తిచేస్తే తన ఎమ్మెల్యే పదవికి రాజీనామా చేస్తా’నని ప్రకటించారు. రాజీనామా లేఖను సైతం సిద్ధం చేసుకున్నారు.
ఇక్కడే అసలు కథ మొదలైంది. ఆలోచన తక్కువ, ఆవేశం ఎక్కువున్న సీఎం రేవంత్రెడ్డి ఆగమాగమైపోయి హరీశ్రావు ట్రాప్లో పడ్డారు. 6 గ్యారంటీలు, 13 హామీలను మర్చిపోయి, వాటికి సమకూర్చాల్సిన నిధులను దారి మళ్లించి.. రైతు రుణమాఫీ చేస్తానని ప్రతిసవాల్ విసిరారు. ఇటీవల రూ.6,098 కోట్ల నిధులను విడుదల చేసి సంబురాలు చేసుకున్నారు. రుణమాఫీ పూర్తయిపోయిందంటూ ‘హరీశ్రావు రాజీనామా చెయ్’ అని రేవంత్తో పాటు కాంగ్రెస్ శ్రేణులు మాట్లాడుతున్నారు.
కానీ, అసలు హరీశ్రావు విసిరిన సవాల్ ప్రకారం కాంగ్రెస్ పార్టీ మాఫీ పూర్తిచేస్తే కదా ఆయన రాజీనామా చేయడానికి? హరీశ్రావు సవాల్ కారణంగానే కాంగ్రెస్ ఇచ్చిన 6 గ్యారంటీలు, 13 హామీలను ఇప్పుడు అమలుచేయక తప్పనిసరి పరిస్థితి ఏర్పడింది. అది సాధ్యం కావాలంటే రాష్ట్ర ఆర్థిక పరిస్థితి సహకరిస్తుందా? అంటే చెప్పలేని పరిస్థితి. హరీశ్రావు సవాల్ కారణంగా కాంగ్రెస్ ప్రభుత్వం ఇరకాటంలో పడిపోయింది. దాంతో రుణమాఫీ అస్తవ్యస్తంగా మారిపోయింది. భస్మాసురుడు తన తలపై తాను చేయిపెట్టి అంతమైనట్టుగా.. కాంగ్రెస్ ప్రభుత్వం కూడా తన గొయ్యిని తానే తవ్వుకున్నదని రాజకీయ విశ్లేషకులు చెప్తున్నారు.
హరీశ్ గీసిన ఉచ్చులో రేవంత్రెడ్డి నేతృత్వంలోని కాంగ్రెస్ ప్రభుత్వం చిక్కుకున్నది. ఇప్పుడు ఆ పార్టీ పరిస్థితి ముందు నుయ్యి, వెనుక గొయ్యిలా తయారైంది. హరీశ్రావు సవాల్ విసిరినప్పుడు అందులో ఏ మర్మం దాగున్నదోనని రేవంత్ రెడ్డి ఒక్కసారైనా ఆలోచించారా? హరీశ్రావు సుదీర్ఘ అనుభవం కల నాయకుడు. కేసీఆర్ నాయకత్వంలో రాటుదేలిన వ్యక్తి. ప్రత్యర్థి ఎత్తులను చిత్తు చేయటంలో ఆయన దిట్ట. తెలంగాణ ట్రబుల్ షూటర్గా ఆయనకు పేరున్నది. అంతకుమించి అతను రాష్ట్ర ఆర్థికమంత్రిగా పనిచేసిన వ్యక్తి. రాష్ట్ర ఆర్థిక పరిస్థితి క్షణ్నంగా తెలిసిన వ్యక్తి. ఆర్థిక వ్యవహారాలను, పథకాల సాధ్యాసాధ్యాలను దగ్గర్నుంచి చూసిన వ్యక్తి. అతను సవాల్ విసురుతున్నాడంటే ఎంత ఆచితూచి ఆలోచించి విసురుతాడో అర్థం చేసుకోవాల్సిన సీఎం రేవంత్ అత్యుత్సాహానికి పోయి బొక్కబోర్లా పడ్డారు.
కాంగ్రెస్ను తన ట్రాప్లో పడేయడంలో హరీశ్ విజయవంతమయ్యారని ఘంటాపథంగా చెప్పవచ్చు. హరీశ్ విసిరిన సవాల్ వెనకున్న ఆంతర్యం అర్థం కాక రేవంత్రెడ్డి కనపడ్డ దేవుని మీదల్లా ప్రమాణాలు చేస్తూ పోయారు. నిజానికి రేవంత్ ప్రభుత్వం రైతు రుణమాఫీ పూర్తి చేయాలంటే సుమారుగా రూ.40-50 వేల కోట్లు అవసరం. బీఆర్ఎస్ ప్రభుత్వం మొదటి దఫా రూ.లక్షలోపు మాఫీ కోసం రూ.19 వేల కోట్ల నిధులను కేటాయించింది. కానీ, నేడు రేవంత్ ప్రభుత్వం రూ.6,098 కోట్ల నిధులను మాత్రమే రూ.లక్షలోపు రుణమాఫీ కోసం విడుదల చేసినట్టు ప్రకటించింది. అసలు విడుదల చేసిందెంతో, ఎంతమంది ఖాతాల్లో నగదు జమ అయిందో ఇప్పటికీ స్పష్టత లేదు. మరీ అంత తక్కువ నిధులతో రూ.లక్షలోపు రుణమాఫీ ఎలా సాధ్యమవుతుంది? అసలు రేవంత్ రెడ్డికి ఏ ఆర్థిక నిపుణుడు ఈ సలహా ఇచ్చారో?
దీని ప్రభావం రానున్న రెండు నెలల్లో రాష్ట్రంపై పడనున్నది. కల్యాణలక్ష్మి, ఆసరా పింఛన్ల వంటి సంక్షేమ పథకాలకు పంగనామాలు పెట్టి, ఇతర ప్రభుత్వ అభివృద్ధి కార్యక్రమాలను కొనసాగించకపోవడంతో ప్రజలు రోడ్ల మీదకు వచ్చే పరిస్థితి తలెత్తుతున్నది. రాష్ట్రంలో కాంగ్రెస్ ప్రభుత్వం కొలువుదీరాక రియల్ ఎస్టేట్ రంగం కుదేలైంది. నిర్మాణరంగం స్తంభించింది. ఇతర ప్రాంతాల నుంచి వలస వచ్చిన నిర్మాణరంగ కార్మికులు స్వస్థలాలకు తిరిగి వెళ్తున్నారు. సాగుకు సరిగా కరెంట్ ఇవ్వటం లేదు. యాసంగిలో నీళ్లివ్వకపోవడంతో పంటలు ఎండిపోయాయి. బోనస్ కాస్త బోగస్గా మారింది. కాంగ్రెస్ ప్రభుత్వం చేతకాని చేష్టల వల్ల రాష్ట్ర రైతాంగం, సామాన్య ప్రజానీకం విలవిలలాడుతున్నారు.
పరిపాలనా నైపుణ్యం, పథకాల అమలు సాధ్యాసాధ్యాలపై మాజీ మంత్రి హరీశ్రావుకు సుదీర్ఘ అనుభవం ఉన్నది. ఆ అవగాహనతోనే ఆయన సవాల్ విసిరారు. హరీశ్ సవాల్ను ఆవేశంతో స్వీకరించిన రేవంత్ ఆయన ట్రాప్లో పడ్డారు. ఇలాంటి ఒక అనివార్య పరిస్థితిని హరీశ్రావు కల్పించినప్పటికీ 6 గ్యారంటీల అమలు, 13 హామీల అమలు, సంపూర్ణ రుణమాఫీ చేయటం అసాధ్యమని ఆర్థికరంగ నిపుణులు అంటున్నారు. హరీశ్ సవాల్ విషయంలో రేవంత్రెడ్డి తొందరపడ్డారని కాంగ్రెస్ సీనియర్ నాయకులు చెవులు కొరుక్కుంటున్నారు. ఏదేమైనా ప్రత్యర్థుల ఎత్తులను చిత్తుచేయటంలో దిట్ట అయిన ట్రబుల్ షూటర్ మరోమారు తన మార్క్ను చాటుకొని కాంగ్రెస్ ప్రభుత్వాన్ని ఇరకాటంలోకి నెట్టారని ప్రజ లు, రైతులు చర్చించుకుంటున్నారు.
-తెలంగాణ విజయ్