చెమ్మగిల్లిన నేత్రాలు మావి
సొమ్మసిల్లిన దేహాలు మావి
దురదృష్టం కోరలతో రక్తసిక్తులం
దుర్భిక్షం కాటులతో రిక్త అస్తికలం
మా కష్టం సత్యం
మా నష్టం నిత్యం
మా ఇళ్లు దుర్భర స్థితిగతులకు నకళ్లు
మా వాకిళ్లు దయనీయావస్థలకు ఆనవాళ్లు
చదువుల్లేవ్
పదవుల్లేవ్
కంటక కాటక పరిస్థితుల్నెదిరించే
సామర్థ్య కొలువుల్లేవ్
బీళ్ల నేలతో సంసారం
రాళ్ల నేలతో సంపర్కం
ఆకాశం వైపు ఆశల చూపు
పవనాల పయనాలు
అనూహ్యమై అమేయ బలీయమై
నీరు లేక నారు లేక పైరు లేక
వాడు ముఖం పాడు ముఖం గోడు ముఖం
జలకళ మృగ్యమై
జీవకళ అదృశ్యమై
ఎండుడొక్కల ఎడ్లకు మేతలేక
గాదెలు నింపే వడ్లకు రాతలేక
పతనమే పరాకాష్ఠగా
ఉత్థానమే ఉపవిషగా
బతుకు బేజారు
చితికి దరి చేరు
కోటం చంద్రశేఖర్
94920 43348