జీఎస్టీ పేరుతో నిరుపేదల నడ్డి విరుస్తున్న కేంద్రప్రభుత్వం.. చేనేత కార్మికులపైనా 12 శాతం పన్ను మోపుతున్నది. దేశమంతటా దీనిపై వారు నిరసన తెలుపుతున్నా.. మొండిగా వ్యవహరిస్తున్నది. ఈ సందర్భంగా..
వినాశకాలే విపరీత బుద్ధిః
ఎవరైనా విదేశీ అగ్రదేశాధిపతులు అతిథులుగా వచ్చినపుడు
అతను వాళ్ళను సబర్మతి ఆశ్రమానికి తోడ్కొని వెళ్ళి
గాంధీ దారం వడికే రాట్నాన్ని పరిచయం చేసి
‘కండె ’ను వడికి చూపిస్తాడు
‘ఎందుకు ఈ కదురు.. ఈ కండె ’ అని అతిథి ప్రశ్నగా చూస్తే
బరిబాత మనిషిని నాగరికునిగా మార్చే
‘వస్ర్తాన్ని’ తయారు చేస్తారు దీంతో మా నేతన్నలు
అని ప్రసన్న వదనంతో నవ్వులు చిందిస్తూ చెబుతాడు
అప్పుడప్పుడు కళావేత్తలైన చేనేత వస్త్రకారులకు
ప్రతిభా పోషకునిలా ‘పద్మశ్రీ’లను కూడా ప్రదానం చేస్తాడు
ఐతే, ఉదయమే పక్షి సరస్సులో స్నానమాచరించినట్టు
బురదలో నుండే కమలం కడిగిన ముత్యమై వికసించినట్టు
ప్రతి నేతన్నా నేతమ్మా స్నానించి పావనమై
జీవితాయుధమైన మగ్గాన్ని మొక్కి, నుదుటఎర్రని కుంకుమతో
పాకోళ్ళ చెక్కల గుంతలోకి దిగుతారు
ఒంటిపై చినుగుల బట్టలతో
రాజులూ, రాణులూ ధరించే పట్టువస్ర్తాలను నేయడానికి!
ఇంటి నిండా ఇసిరెలే
రాట్నాలు, పంటెలు, ఆసుకర్రలు, అచ్చుదోనుగలు, ఊశెలు
తొక్కుడు పాకోళ్ళు, పింజర జోళ్ళు, సరికుంచెలు, నొగళ్ళు, గంజి కుండలు
పనిముట్లలో ఒక వట్టిబోయిన పాత పనిముట్టువలె
ప్రతి నేతన్న, ప్రతి నేతక్క
ఏ నేత కార్మికున్నయినా చూడు
ఒళ్ళంతా బొక్కలు తేలిన బక్క ప్రాణమే తప్ప
పెయ్యి మీద చటాకు మాంసం కనిపించదు
కేంద్రం చేయందించని శాశ్వత పేదరికం
మొన్నమొన్ననే.. జీవిత సమరంలో ఓడిపోయిన
ఒక నేతన్న.. ఈ ప్రభుత్వాలను ప్రశ్నిస్తూ
గుడిగంటకు బద్దెపేగుతో ఉరేసుకున్నడు
అతని చేతిలో ఒక ‘జోట’ (నాడె) ఉన్నది
మిసైల్ కడుపులో బాంబులా.. దారపు కండెను నింపుకొని
నాడె ఇరు కొసలూ మిసైల్ ముక్కులా మొనదేలి ఉంటై
దారాన్ని మోసుకుని ఉరికేటప్పుడు ఆ వస్త్ర ప్రదాత ‘టూల్ ’ శస్త్రమై విస్ఫోటిస్తుంది.. అటువంటి ఋషులు.. కోట్లాది నేతన్నల గొంతులను ‘జీఎస్టీ’ కత్తితో కోస్తూంటే..
‘అతన్ని’ వివస్ర్తుణ్ణి చేసి కదురును కాల్చి నాలుకపై, పిర్రలపై వాతలు పెట్టి
‘పదవీచ్యుతుడవై పో’ అని ఆగ్రహోదగ్రంగా శపిస్తారు.. జాగ్రత్త
వినాశకాలే విపరీత బుద్ధిః
-రామాచంద్రమౌళి
93901 09993