రైతుల కోసం పోరాడాలని బీఆర్ఎస్ అధినేత కేసీఆర్ ఇచ్చిన పిలుపు మేరకు గులాబీ శ్రేణులు రోడ్డెక్కారు. రాష్ట్రవ్యాప్తంగా ధర్నాలు, రాస్తారోకోలు నిర్వహించారు. ‘మేమున్నా’మంటూ రైతుకు వెన్నుదన్నుగా నిలిచారు. దీంతో భారత రాష్ట్ర సమితి అంటే భారత రైతు సమితి అని మరోసారి రుజువైంది.
బీఆర్ఎస్ అధికారంలో ఉన్నప్పుడు రైతుల పక్షాన నిలబడింది. దండుగన్న వ్యవసాయాన్ని కేసీఆర్ పండుగలా చేశారు. స్వరాష్ట్రం ఏర్పడిన తర్వాత తొలి ముఖ్యమంత్రిగా బాధ్యతలు చేపట్టిన కేసీఆర్ ఎన్నో సాహసోపేతమైన నిర్ణయాలు తీసుకున్నారు. వ్యవసాయ రంగానికి అధిక ప్రాధాన్యం ఇచ్చారు. నీళ్లు, కరెంట్, పెట్టుబడి సాయం ఈ మూడు వ్యవసాయానికి ప్రధాన వనరులని భావించిన కేసీఆర్ వాటిని రైతులకు సక్రమంగా అందించినప్పుడే వ్యవసాయ రంగం వృద్ధి చెందుతుందని గ్రహించారు.
తద్వారా రైతుకు మేలు జరుగుతుందని ఆకాంక్షించారు. వ్యవసాయ రంగం బాగుంటే రైతులు, రైతు కూలీలు, వ్యవసాయంతో ముడిపడి ఉన్న అనేక రంగాలు బాగుపడతాయని కేసీఆర్కు తెలుసు. ప్రత్యక్షంగా, పరోక్షంగా లక్షలాది మందికి ఉపాధి దొరుకుతుందని, కోట్లాది మందికి అన్నం దొరుకుతుందనే ఉద్దేశంతోనే ఆయన వ్యవసాయ రంగానికి పెద్దపీట వేశారు. బీఆర్ఎస్ ప్రభుత్వ హయాంలో వ్యవసాయం మూడు పువ్వులు ఆరు కాయలుగా వర్ధిల్లింది. కానీ, రేవంత్రెడ్డి పాలనలో వ్యవసాయం మళ్లీ మొదటికే వస్తున్నది.
రైతుకు భరోసా, వరికి బోనస్, రైతు సంక్షేమ కార్పొరేషన్ అంటూ అన్నదాతల పేరు చెప్పుకొని అధికారంలోకి వచ్చిన కాంగ్రెస్ నాయకులు అధికారంలోకి వచ్చినాక ఒడ్డెక్కినాక బోడ మల్లన్న తీరున వ్యవహరిస్తున్నారు. అందలమెక్కించిన రైతుల వైపు కనీసం కన్నెత్తి కూడా చూడటం లేదు. అరవై ఏండ్ల పాటు చేసిన దగా సరిపోదన్నట్టు మరోసారి ఆరు గ్యారంటీల పేరిట మోసం చేసిండ్రు. ఐదు నెలల కాంగ్రెస్ పాలన రైతన్నల పాలిట శాపంగా మారింది. కేసీఆర్ హయాంలో తొమ్మిదిన్నరేండ్ల పాటు సల్లగా బతికిన రైతన్నలు ఐదు నెలలకే కంట నీరు తీస్తున్నారు. ఆరుగాలం శ్రమించి పండించిన పంటకు గిట్టుబాటు ధర రాకపోతే, కనీసం పంటను కొనుగోలు చేయకపోతే రైతుల గుండె మండదా మరి? అందుకే రాష్ట్రవ్యాప్తంగా రైతులు కదం తొక్కిండ్రు.
రైతు భరోసా కింద పెట్టుబడి డబ్బులు ఇస్తానన్న కాంగ్రెస్ పార్టీ అధికారంలోకి వచ్చినాక చేతులెత్తేసింది. దీంతో ఎన్నో తిప్పలు పడి, అప్పులు చేసి రైతులు సాగు చేస్తే నీళ్లందక పంటలు ఎండిపోయాయి. కొద్దోగొప్పో వరి పంట పండితే వడగండ్ల వానతో రాలిపోయిన వడ్ల గింజలు మడిలోనే మొలకెత్తినయి. ఎన్నో వ్యయప్రయాసలకోర్చి రైతులు పండించిన కొద్దిపాటి పంటను మార్కెట్కు తీసుకుపోతే కాంగ్రెస్ సర్కార్ కొనడం లేదు. కొనుగోలు కేంద్రాల్లో నెల రోజులుగా పేరుకుపోయిన వడ్ల రాశులు అకాల వర్షాలతో తడిసి ముద్దవుతున్నయి. వరదల్లో కొట్టుకపోతున్నయి.
రైతు కంట నీరు వస్తే కేసీఆర్ గుం డె తడవుతుంది. రైతులకు అండగా కేసీఆర్, బీఆర్ఎస్ పార్టీ పొలికేక పెడుతుంది. ఇది తెలంగాణ రైతుల జీవన్మరణ సమస్య. రైతు పక్షపాతి అయిన కేసీఆర్ చూస్తూ ఊరుకుంటారా? కాంగ్రెస్ ప్రభుత్వం మెడలు వంచయినా సరే, రైతు పక్షాన పోరాడి చివరి గింజ వరకు కొనుగోలు చేయిస్తారు.
చిటుకుల మైసారెడ్డి
94905 24724