Kuwait | కువైట్లోని భారత రాయబార కార్యాలయంలో 78వ స్వాతంత్య్ర దినోత్సవాన్ని ఘనంగా నిర్వహించారు. కువైట్లో చాలా వేడి వాతావరణం ఉన్నప్పటికీ అన్ని వర్గాల భారతీయులు పెద్ద సంఖ్యలో ఈ వేడుకలో పాల్గొన్నారు. భారత రాయబారి H.E. డాక్టర్ ఆదర్శ్ స్వైకా త్రివర్ణ పతాకాన్ని ఆవిష్కరించారు. జాతినుద్దేశించి రాష్ట్రపతి చేసిన ప్రసంగాన్ని చదివి వినిపించారు.
భారత్-కువైట్ ద్వైపాక్షిక సంబంధాలను మరింత లోతుగా బలోపేతం చేయడంలో, కువైట్లోని భారతీయ సమాజంపై ప్రత్యేక శ్రద్ధ తీసుకుంటున్నందుకు స్నేహపూర్వక కువైట్ నాయకత్వానికి, ప్రభుత్వానికి రాయబారి H.E. డాక్టర్ ఆదర్శ్ స్వైకా కృతజ్ఞతలు తెలిపారు. ప్రతికూల వాతావరణంలో కూడా అధిక సంఖ్యలో పాల్గొన్న సంఘాల సభ్యులకు స్వాతంత్ర్య దినోత్సవ శుభాకాంక్షలు తెలిపారు.
భారతీయ కమ్యూనిటీ ఎదుర్కొంటున్న సమస్యలను పరిష్కరించడానికి మేం కువైట్ అధికారులతో నిరంతరం సంప్రదిస్తున్నామని పేర్కొన్నారు. అలాగే అనేక సమస్యలను పరిష్కరించగలిగామని, అనేక ఇతర సమస్యలపై చర్చలు కొనసాగుతున్నాయని రాయబారి చెప్పారు.
భారతీయ పౌరులందరూ కువైట్ నిబంధనలను అనుసరించాలని, ఎలాంటి చట్టపరమైన సమస్యలను నివారించడానికి రెసిడెన్సీ, పాస్పోర్ట్ మొదలైన వాటిని సకాలంలో పునరుద్ధరించాలని రాయబారి కోరారు. ఏదైనా సహాయం కోరి వచ్చే భారతీయ పౌరులకు సహాయం చేయడానికి ఎంబసీ ఎల్లప్పుడూ అందుబాటులో ఉంటుందని భారత రాయబారి చెప్పారు. కువైట్లో ఉన్న మిగతా భారతీయులందరికీ, భారత కమ్యూనిటీ ఆర్గనైజేషన్లు అందిస్తున్న సహాయానికి అంబాసిడర్ కృతజ్ఞతలు తెలిపి వారిని అభినందించారు.