నందిపేట్, నవంబర్ 16 : బీఆర్ఎస్తోనే ప్రగతి సాధ్యమని, కాంగ్రెస్, బీజేపీలతో దుర్గతి పడుతుందని ఆర్మూర్ బీఆర్ఎస్ అభ్యర్థి ఆశన్నగారి జీవన్రెడ్డి అన్నారు. మండలంలోని మాయపూర్, బజార్కొత్తూర్, డొంకేశ్వర్ గ్రామాల్లో గురువారం ప్రచారం నిర్వహించారు. అభివృద్ధి చేసిన తనను మరోసారి ఆశీర్వదించాలని కోరారు. ఈ సందర్భంగా ఆయన ఆయా గ్రామాల్లోని ప్రగతి నివేదికలను ప్రజల ముందుంచి ఇన్ని అభివృద్ధి, సంక్షేమ పథకాలు ఇచ్చింది కేసీఆర్.. తెచ్చింది తాను అవు నా ? కాదా? అని ప్రజలను అడిగారు. ఇప్పుడున్న వెలుగుజిలుగుల తెలంగాణలో మళ్లీ చిమ్మచీకట్లు ఎందుకని ప్రశ్నించారు. గులాబీ సైనికులు తెలంగాణ రక్షకులు. కాంగ్రెస్, బీజేపీలు తెలంగాణ భక్షకులని కారు గుర్తుకు ఓటు ప్రశాంత జీవితానికి రూటు అన్నారు. నిజామాబాద్, మాక్లూర్కు రోడ్లు నిర్మించానని, ఆలూర్, వెల్మల్, నందిపేట్ సహా తొమ్మిదికి పైగా బైపాస్ రోడ్లు వేయించానని తెలిపారు. ఆర్మూర్కు 100 పడకల దవాఖాన సాధించి ఆధునిక వైద్యాన్ని గడపగడపకూ చేరువ చేశానని వివరించారు. 5 లక్షల చొప్పున ఇంటింటికీ బీమా కేసీఆర్ ధీమా పథకం అమలు కానున్నదని తెలిపారు. కేసీఆర్ పాలనలోనే మనకు న్యా యం జరుగుతుందని జీవన్రెడ్డి పేర్కొన్నారు.
డొంకేశ్వర్, ఆలూర్ మండలాలు కావాలన్నది ప్రజల చిరకాలవాంఛ అని.. అది నెరవేర్చానని అన్నారు. కొత్త మండలాలు చేయాలని సీఎం కేసీఆర్ను అడిగితే.. అవసరమా అని తన మీద కోపడ్డారని గుర్తు చేశారు. అయినప్పటికీ పట్టు వీడలేదన్నారు. చివరకు ఏం కావాలో చూడాలని కేసీఆర్ అధికారులను ఆదేశించారని తెలిపారు. ఈ నేపథ్యంలో ఆలూర్, డొంకేశ్వర్ కొత్త మండలాలుగా ఏర్పాటయ్యాయని తెలిపారు. ఈ సందర్భంగా తనకు దైవ సమానులైన కేసీఆర్కు డొంకేశ్వర్ ప్రజల తరఫున మరోసారి పాదాభివందనం చేస్తున్నానన్నారు. డొంకేశ్వర్ మండలం కావడంతో ఎంపీడీవో, తహసీల్ కార్యాలయంతో పాటు పోలీస్స్టేషన్ ఇతర ప్రభుత్వ కార్యాలయాలు వచ్చాయన్నారు. డొంకేశ్వర్ మండల అభివృద్ధికి మరింత అవకాశం దొరికిందని జీవన్రెడ్డి అన్నారు.