నిజామాబాద్, జూలై 23 (నమస్తే తెలంగాణ ప్రతినిధి)/ రామారెడ్డి:పంట రుణాల మాఫీ ఏమో కానీ భారీ కుంభకోణం వెలుగులోకి వచ్చింది. అసలు రుణాలే తీసుకోని రైతులకు మాఫీ అయినట్లు ఫోన్లకు మెసేజ్లు రావడంతో అతిపెద్ద స్కామ్ బయటపడింది. అన్నదాతలకు తెలియకుండానే అక్రమంగా లోన్లు లేపుకున్న వ్యవహారం ఉమ్మడి జిల్లాలో కలకలం రేపుతున్నది. బైబ్యాక్ ఒప్పం దం పేరిట రైతుల సంతకాలు తీసుకుని వారి సమ్మతి లేకుండగానే రుణాలు తీసుకున్నట్లు వెల్లడైంది. రాష్ట్ర ప్రభుత్వం ఇటీవల రూ.లక్ష లోపు రుణాలు మాఫీ చేస్తున్నట్లు ప్రకటించిన సంగతి తెలిసిందే. ఈ నేపథ్యంలో మాఫీ వర్తించిన రైతుల ఫోన్లకు సీఎం పేరిట మెసేజ్లు వస్తున్నాయి.
రామారెడ్డి, సదాశివనగర్, మాచారెడ్డి, గాంధారి మండలాల్లోని రైతులకు వచ్చిన మెసేజ్లతో అక్రమ లోన్ల వ్యవహారం బయటపడింది. అసలు రుణ మే తీసుకోని తమకు మాఫీ వర్తించడమేమిటని అన్నదాతలు తలలు పట్టుకున్నారు. చివరకు ఫ్యాక్టరీ ని ర్వాహకులే తమ పేరిట లోన్లు లేపుకున్నట్లు తెలిసి అవాక్కయ్యారు. స్థానికంగా ఉన్న గా యత్రి షుగర్ ఫ్యాక్టరీతో రైతులకు చెరు కు పంట సాగు విషయంలో బైబ్యాక్ ఒప్పందాలు ఉన్నాయి. తమ పట్టాపా స్ పుస్తకాలు, ఇతర వివరాలు యాజమాన్యం వద్ద ఉన్నాయని, వాటితోనే నిర్వాహకులు తమ పేరిట రుణం తీసుకున్నారని ఆగ్రహం వ్యక్తం చేస్తున్నారు.
ఆగమాగమవుతున్న రైతులు
చెరుకు సాగు చేసేందుకు రైతులు ప్రైవేట్ షుగర్ ఫ్యాక్టరీతో ఒప్పందం చేసుకున్నారు. చెరుకు మొక్కలను, ఎరువులను, ఇతరత్రా సాంకేతిక సహకారాన్ని ఫ్యాక్టరీ అందిస్తుంది. పంట చేతికొచ్చిన తర్వాత యాజమాన్యమే సేకరిస్తుంది. బైబ్యాక్ ఒప్పందం ఇంత వరకు పరిమితం కాగా, రైతుల పేరిట రుణాలను తీసుకునే అవకాశం లేదు. అయితే, రైతులకు తెలియకుండా రుణాలు తీసుకోవడం ఇప్పుడు అనుమానాలకు తావిస్తున్నది. నాలుగు మండలాల్లోని 2,500 మంది పేరిట లోన్లు తీసుకున్నట్లు సమాచారం. ప్రభుత్వం మొదటి విడుతలో రూ.లక్షలోపు రుణాలను మంజూరు చేయగా, ఆయా మండలాల్లోని రైతులకు రుణమాఫీ అయినట్లు మెసేజ్లు వచ్చాయి.
కనిష్ఠంగా రూ.26 వేలు నుంచి మొదలు రూ.90 వేలు వరకు రుణాలు మాఫీ అయినట్లు నిజామాబాద్ నాందేవ్వాడలో గల యూనియన్ బ్యాంక్ నుంచి మెసేజ్లు వచ్చా యి. 400 మందికి సంబంధించి రూ.కోటిన్నర వరకు తొలి విడుతలో మాఫీ అయ్యిందని రూ.లక్షన్నర, రూ.2 లక్షలోపు రుణాలు రద్దు అయితే అప్పుడు బాధితుల సంఖ్యతో పాటు రుణాల మొత్తం మరింత పెరి గే అవకాశమున్నది. మరోవైపు, రుణాల మంజూరులో ఫ్యాక్టరీ ఉద్యోగుల పాత్రతో పాటు బ్యాంకర్ల సహకారం ఉండే ఉంటుందని అనుమానాలు వ్యక్తమవుతున్నాయి. బ్యాంకు అధికారులు, వ్యవసాయాధికారులతో కుమ్మక్కై అక్రమంగా రుణాలు తీసుకున్నట్లు సమాచారం. రైతుల సమ్మతి లేకుండానే బ్యాంకర్లు లోన్ ఎలా మం జూరు చేశారని అన్నదాతలు ప్రశ్నిస్తున్నారు. మరోవైపు, మంజూరైన రుణాలకు షుగర్ ఫ్యాక్టరీ బాధ్యులకు ఎలా ఆథరైజేషన్ కల్పిస్తారన్న ప్రశ్నలు ఉత్పన్నమవుతున్నాయి. ఇందులో నిబంధనలకు విరుద్ధంగా యథేచ్ఛగా రుణ మోసం జరిగిందనడానికి బలమైన కారణాలు వెలుగు చూస్తున్నాయి. మరోవైపు, రైతుల ఆందోళనతో షుగర్ ఫ్యాక్టరీ యాజమాన్యం కాళ్ల బేరానికి వచ్చినట్లు తెలిసింది. చెక్కుల రూపంలో తిరిగి చెల్లింపులు జరుపుతామంటూ బేరసారాలు సాగిస్తున్నట్లు సమాచారం.
మాఫీ డబ్బులు రైతులకే ఇవ్వాలి..
గాయత్రి ఫ్యాక్టరీ యాజమాన్యం రైతులకు తెలియకుండా రుణాలు తీసుకోవడం దారుణం. లోన్ డబ్బులతో పాటు మాఫీ సొమ్మును కూడా రైతులకే ఇవ్వాలి. లేకపోతో బాధితులతో కలిసి కలెక్టర్ కార్యాలయాన్ని ముట్టడిస్తాం.
– రాజేశ్వరరావు, మాజీ జడ్పీటీసీ, సదాశివనగర్
అగ్రిమెంట్ పేరిట లోన్లు లేపారు..
ఒప్పంద పత్రాలని చెప్పి రైతుల సంతకాలు తీసుకుని వారి పేరిట లోన్లు తీసుకోవడం ఎంతవరకు సమంజసం. ప్రభుత్వం రుణమాఫీ చేయడంతోనే అక్రమ రుణాల విషయం బయటకొచ్చింది. ఫ్యాక్టరీ అధికారులను అడిగితే సంస్థ తరఫున రైతుల పేర్లపై రుణం తీసుకున్నామని చెప్పిండ్రు. ఫ్యాక్టరీ వారే 2,500 మంది పేరిట లోన్లు లేపుకున్నారు. ఆ సొమ్మును రైతులకే ఇవ్వాలి.