బాన్సువాడ రూరల్, జూన్ 3: బాన్సువాడ మండలంలోని హన్మాజీపేట్ గ్రామస్తులు కీళ్లనొప్పులు, జ్వరాలతో మంచం పట్టారు. ఒకరిద్దరూ కాదు ఏకంగా వందలాది మంది ఈ వ్యాధులతో బాధపడుతున్నారు. ముఖ్యంగా గ్రామంలో ఒకటి, ఏడు, ఎనిమిది వార్డుల్లోని ప్రజలంతా జ్వరాలతో మంచానికే పరిమితమై.. నాణ్యమైన వైద్యం కోసం ఎదురుచూస్తున్నారు. తీవ్రమైన కీళ్లనొప్పులతో నడవడానికి, కూర్చోవడానికి చాలా ఇబ్బందిపడుతున్నారు. ప్రైవేటు దవాఖానలో వైద్యానికి బాగా ఖర్చు చేశామని ఆవేదన వ్యక్తంచేశారు. హన్మాజీపేట్ ప్రాథమిక ఆరోగ్య కేంద్రం ఆధ్వర్యంలో వారం రోజుల పాటు ఆరోగ్య శిబిరం ఏర్పాటు చేసి గ్రామస్తులకు వైద్య సేవలు అందించారు. అయినా కూడా సీజనల్ వ్యాధులు తగ్గుముఖం పట్టలేదు. జిల్లా ఉన్నతాధికారులు స్పందించి ప్రత్యేక వైద్య శిబిరాన్ని ఏర్పాటు చేసి రక్తపరీక్షలు, నాణ్యమైన వైద్యం అందించాలని గ్రామస్తులు కోరుతున్నారు.
నా కుమారుడు కీళ్లనొప్పులతో తీవ్ర ఇబ్బందులకు గురయ్యాడు. నడవడానికి రాలేదు. నిజామాబా ద్ తీసుకెళ్లి వైద్యం చేయిం చాం. ఇప్పుడిప్పుడే కోలుకున్నాడు. గ్రామంలో వ్యాధులు ప్రబలడం ఆందోళన కలిగిస్తున్నది.
గ్రామంలో చాలా మంది జ్వరం, కీళ్లనొప్పులతో బాధపడ్డారు. ఈ విషయమై గ్రామస్తులు తమ దృష్టికి తీసుకురావడంతో వారం రోజుల పాటు ప్రత్యేక వైద్య శిబిరం ఏర్పాటు చేసి వైద్యం అందించాం. అవసరమైన వారికి రక్తపరీక్షలు నిర్వహించాం. ఇప్పుడిప్పుడే కోలుకుంటున్నారు. మరోసారి శిబిరం ఏర్పాటు చేసి వైద్యం అందజేస్తాం.