భీమ్గల్, జూలై 19: అభివృద్ధి పనులు ఎప్పుడు పూర్తి చేస్తారని సోషల్ మీడియాలో ప్రశ్నించినందుకు ఠాణాకు పిలిచి నోటీసులు అందజేశారు నిజామాబాద్ జిల్లా భీమ్గల్ పోలీసులు. అసలేం జరిగిందంటే.. కార్పొరేషన్ చైర్మన్లుగా నియమితులైన జిల్లాకు చెందిన నేతలకు శుక్రవారం భీమ్గల్లో సన్మాన కార్యక్రమం ఏర్పాటు చేశారు. ఈ నేపథ్యంలో భీమ్గల్ పట్టణంలో నిర్మిస్తున్న ఇంటిగ్రెటేడ్ వెజ్, నాన్వెజ్ మార్కెట్ పనులను ఎప్పుడు పూర్తి చేస్తారని ప్రశ్నిస్తూ స్థానిక యువకుడు నీలం రవి కొంతమందితో కలిసి వీడియో తీసి సోషల్ మీడియాలో పోస్టు చేశాడు.
కార్పొరేషన్ చైర్మన్లుగా పట్టణానికి వస్తున్న ఈరవత్రి అనిల్, మానాల మోహన్రెడ్డి, అన్వేశ్రెడ్డి పనుల పూర్తిపై సన్మాన కార్యక్రమ వేదిక పైనుంచి స్పష్టత ఇవ్వాలని వీడియోలో కోరాడు. ఈ నేపథ్యంలో పోలీసులు రవితో పాటు వీడియోలో ఉన్న కర్నె మహేందర్, కర్నె నరేశ్, రావుట్ల హరీశ్, కర్నె అనిల్, గంగారపు రఘును ఎస్సై హరిబాబు ఠాణాకు తీసుకెళ్లి నోటీసులు జారీ చేశారు. అభివృద్ధి పనులపై ప్రశ్నించినందుకు పోలీసులతో నోటీసులు ఇప్పించడం కాంగ్రెస్ వారికే చెల్లిందని స్థానిక నేతలు మండిపడ్డారు.