డోంగ్లీ, జూన్ 22 ; ఆహ్లాదకర వాతావరణంలో చదవాల్సిన విద్యార్థులు అవస్థల మధ్య పాఠాలు నేర్చుకుంటున్నారు. శిథిలావస్థకు చేరిన తరగతి గదులు… ఎప్పుడు మీద కూలుతాయో తెలియని పైకప్పులు ఉండడంతో చెట్ల కిందే చదువులు సాగిస్తున్నారు డోంగ్లీ మండలం మారేపల్లి ప్రభుత్వ పాఠశాల విద్యార్థులు.
అమలుకు నోచుకోని అమ్మ ఆదర్శ పనులు..
పాఠశాలల పునఃప్రారంభానికి ముందే అమ్మ ఆదర్శ కమిటీల ఆధ్వర్యంలో పనులు పూర్తి చేసి మౌలిక సదుపాయాలు కల్పించాలని ప్రభుత్వం నిర్దేశించినా అమలుకు నోచుకోలేదు. మరుగుదొడ్ల రిపేర్లు, నీటి పైప్లైన్ తదితర మరమ్మతు పనులు చేసి మమ అనిపించారు. ప్రధాన సమస్య అయిన తరగతి గదుల నిర్మాణాన్ని పట్టించుకునే నాథుడే లేడు. శిథిల దశలో ఉన్న భవనాల కిటికీల బిగింపు, ఫ్లోర్ మరమ్మతులు చేపట్టడంపై సర్వత్రా విమర్శలు వ్యక్తమవుతున్నాయి. తరగతి గదులు సరిగా లేకపోవడంతో ఈ పాఠశాలకు వచ్చేందుకు విద్యార్థులు జంకుతున్నారని, దీంతో పేద పిల్లలు చదువుకు దూరమయ్యే అవకాశం ఉన్నదని గ్రామస్తులు ఆవేదన వ్యక్తంచేస్తున్నారు. అధికారులు, ప్రజాప్రతినిధులు వెంటనే స్పందించి పాఠశాలకు తరగతి గదులు నిర్మించాలని కోరుతున్నారు.
తరగతి గదుల్లోనే దేశ భవిష్యత్తు దాగి ఉంటుంది. ఉత్తమ పౌరులు తయారయ్యేది తరగతి గది నుంచే.. అలాంటి తరగతి గదులతోపాటు విద్యార్థులకు మౌలిక వసతులు కల్పించాల్సిన బాధ్యత ప్రభుత్వంపై ఉంటుంది. కానీ కామారెడ్డి జిల్లా డోంగ్లీ మండలం మారేపల్లి పాఠశాలలో పరిస్థితి ఇందుకు భిన్నంగా ఉన్నది. ప్రభుత్వ పాఠశాలలను కార్పొరేట్ స్థాయిలో తీర్చిదిద్దేందుకు కోట్లాది రూపాయలు వెచ్చిస్తున్నామని ప్రభుత్వం గొప్పలు చెబుతున్నా.. మారుమూల గ్రామాల్లోని పాఠశాలలను పట్టించుకోవడం లేదన్న విమర్శలు వెల్లువెత్తుతున్నాయి.
75మందికి ఒకే గది..
మారేపల్లి గ్రామంలోని మండల పరిషత్ ప్రాథమిక పాఠశాలలో మొత్తం 75మంది విద్యార్థులు ఉన్నారు. ఒకటి నుంచి ఐదు తరగతులుండగా ఇద్దరు ఉపాధ్యాయులు పాఠాలు బోధిస్తున్నారు. పాఠశాలకు సంబంధించిన భవనాలన్నీ శిథిలావస్థకు చేరుకున్నాయి. ఒకే ఒక్క గది(ఆఫీస్రూం) బాగున్నది. మిగిలిన గదులన్నీ పెచ్చులూడిన స్లాబ్, గోడలతో దర్శనమిస్తున్నాయి. అందులో తరగతుల నిర్వహణ కష్టంగా మారింది. దీంతో విద్యార్థులను ఆరుబయట చెట్ల కింద కూర్చొబెట్టి ఉపాధ్యాయులు పాఠాలు బోధిస్తున్నారు. పాఠశాల పక్కనే రోడ్డు ఉండడంతో ఆరుబయట చదివే విద్యార్థులకు వాహనాల శబ్దాలు ఇబ్బందికరంగా మారాయి. ఒకవేళ వర్షం కురిస్తే ఉన్న ఒకే గదిలో అందరినీ కూర్చోబెడుతున్నారు.