కామారెడ్డి, జూన్ 25: జాతీయ రహదారిపై ఆగి ఉన్న లారీని ప్రైవేటు ట్రావెల్స్ బస్సు ఢీకొన్న ఘటనలో ఒకరు మృతి చెందగా.. ప్రయాణికులకు తీవ్రగాయాలయ్యాయి. ఈ దుర్ఘటన కామారెడ్డి శివారులోని క్యాసంపల్లి వద్ద మంగళవారం తెల్లవారుజామున చోటుచేసుకున్నది. దేవునిపల్లి ఎస్సై రాజు తెలిపిన వివరాలు ఇలా ఉన్నాయి. ఆదిలాబాద్ నుంచి హైదరాబాద్కు డైమండ్ ట్రావెల్స్కు చెందిన బస్సు ప్రయాణికులతో వెళ్తున్నది. ఉదయం 3గంటల సమయంలో క్యాసంపల్లికి వద్ద జాతీయ రహదారిపై ఎలాంటి సూచికబోర్డు (ఇండికేటర్స్) పెట్టకుండా నిలిపి ఉంచిన లారీని ఢీకొట్టింది.
ప్రమాదంలో ఆదిలాబాద్లోని అంబేద్కర్నగర్ కాలనీకి చెందిన అప్సర్ఖాన్ అక్కడికక్కడే మృతి చెందాడు. బస్సు డ్రైవర్ షేక్ రఫత్కు కుడికాలు విరగగా.. మరో వ్యక్తి మోబిన్, బస్సు క్లీనర్ ఆయూబ్లతోపాటు మరికొంత మందికి తీవ్రగాయాలయ్యాయి. క్షతగాత్రులను 108అంబులెన్స్లో జిల్లా కేంద్రంలోని ఏరియా దవాఖానకు తరలించారు. ప్రమాద సమయంలో బస్సులో 34మంది ప్రయాణికులు ఉన్నారు. బాధితుల ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్లు ఎస్సై రాజు తెలిపారు.