పుస్తకాల అధిక బరువు పిల్లల పాలిట శాపంగా మారుతున్నది. చిన్నారులపై బండరాళ్లుగా మారుతున్న స్కూల్ బ్యాగులను చూస్తే భయమేస్తున్నది. అంతంత బరువులు ఎలా మోస్తారో ఒక్కోసారి తలుచుకుంటేనే బాధేస్తున్నది. అవసరం ఉన్నా లేకపోయినా వేలాది రూపాయలు వెచ్చించి కిలోల కొద్దీ బరువులను విద్యార్థుల వీపునకు తగిలిస్తున్నారు. ముఖ్యంగా ప్రైవేటు పాఠశాలల నిర్వాహకులు ఇష్టమొచ్చినట్లుగా పుస్తకాలు అంటగడుతున్నారు. ప్రభుత్వ నిబంధనలకు విరుద్ధంగా పుస్తకాలను మోయిస్తుండడంతో విద్యార్థులు రోగాలబారిన పడుతున్నారు.
ప్రైవేట్ పాఠశాలల్లో చదివే విద్యార్థులకు బ్యాగుల భారం తగ్గడం లేదు. వయస్సు, తరగతులకు మించి ప్రైవేట్, కార్పొరేట్ పాఠశాలలో పుస్తకాల భారం మోపుతున్నారు. దీంతో పిల్లలపై మానసికంగా, శారీరకంగా తీవ్ర ప్రభావం పడుతున్నది. ఈ భారం తగ్గించేందుకు రాష్ట్ర ప్రభుత్వ ఆదేశాల మేరకు విద్యాశాఖ 2017 జూలై 19 జీవో నంబర్ 22ను విడుదల చేసింది. జీవోను పకడ్బందీగా అమలు చేయాలంటూ జిల్లా విద్యాశాఖ అధికారులకు ఉత్తర్వులు సైతం జారీ చేసింది. మండలాల పరిధిలో ప్రాథమిక, ప్రాథమికోన్నత, ఉన్నత పాఠశాలల ప్రధానోపాధ్యాయులతోపాటు మండల విద్యాశాఖాధికారులతో సమావేశాలు నిర్వహించారు. కానీ ప్రైవేట్ పాఠశాలలు మాత్రం జీవోను తుంగలో తొక్కుతున్నాయి. విద్యను వ్యాపారంగా చేస్తూ విద్యార్థులపై అధిక భారం మోపుతూ పుస్తకాలను విక్రయిస్తూ సొమ్ము చేసుకుంటున్నారు. పుస్తకాలు విక్రయించే పాఠశాలలపై చర్యలు తీసుకోవాలని పలు విద్యార్థి సంఘాలు విన్నవించినా అధికారులు చర్యలు తీసుకోకపోవడంపై మండిపడుతున్నారు.
విద్యార్థుల బ్యాగు బరువుపై విద్యాశాఖ పలు నిబంధనలు జారీ చేసింది. 1, 2తరగతులు చదివే విద్యార్థుల స్కూల్ బ్యాగు బరువు 1.5 కిలోల లోపు, 3,4,5 తరగతులకు 2 నుంచి 3కిలోల వరకు, 6,7 తరగతులకు 4 కిలోలలోపు, 8,9,10 తరగతులకు 5కిలోల లోపు ఉండాలని ప్రభుత్వం నుంచి స్పష్టమైన ఆదేశాలున్నాయి. అయినప్పటికీ విద్యార్థులకు వివిధ రకాల మెటీరియల్, సిలబస్ల పేరుతో పిల్లల భుజాన మోయలేని భారం మోపుతున్నారు. కొన్ని కార్పొరేట్ పాఠశాలలు అపార్ట్మెంట్లలో నడుస్తున్నాయి. దీంతో ఆ బరువైన భారంతో పైకి వెళ్లేందుకు ఆపసోపాలు పడుతున్నారు. తమ పిల్లలు అధిక పుస్తకాల బరువుతో అలసిపోయి అనారోగ్యం పాలవుతున్నారని, భారం తగ్గించాలని విద్యార్థుల తల్లిదండ్రులు కోరుతున్నారు.
విద్యార్థి బరువులో బ్యాగు బరువు 10శాతం మించకూడదు. 30కిలోలు ఉన్న విద్యార్థికి 3కిలోల బరువుకు సమానంగా బ్యాగు ఉండాలి. కానీ ఒకటో తరగతి చదివే విద్యార్థి శరీర బరువు 15 కేజీలు ఉంటే పుస్తకాల బరువు 1.5 కిలోలకు బదులుగా 5కిలోల బరువు ఉంటుంది. ఎనిమిదో తరగతి చదువుతున్న విద్యార్థి పుస్తకాల బరువు 12 కిలోలు దాటుతున్నది. దాదాపు శారీర బరువు కన్నా 30నుంచి 40 శాతం ఎక్కువగా ఉండడంతో విద్యార్థుల వెన్ను విరుగుతుంది. బ్యాగు బరువు అధికంగా ఉండడంతో ఎముకలు, కండరాల ఎదుగుదలపై తీవ్ర ప్రభావం పడుతుంది. మెడ, భుజాలు, వెన్నెముక వంగిపోతున్నాయి. దీంతో చిన్నప్పటి నుంచే వెన్నునొప్పితో బాధపడుతున్నారు.
ప్రైవేట్ పాఠశాల విద్యార్థుల బ్యాగుల్లో రెగ్యులర్ సిలబస్తోపాటు అసైన్మెంట్, ప్రాజెక్టు వర్క్, స్లిప్ టెస్ట్లు, క్లాస్ వర్క్, హోం వర్క్, చిత్తు కాపీ, గైడ్, డైరీ, డ్రాయింగ్, క్రాప్ట్, ఆర్ట్, జీకే, కంప్యూటర్ పుస్తకాలు ఉంటున్నాయి. ప్రతి సబ్జెక్ట్కు 6 నుంచి 7నోటు బుక్స్ కేటాయిస్తూ విద్యార్థులపై అధిక భారం మోపుతున్నారు. ప్రతిరోజూ ఆయా సబ్జెక్టులు బోధించనప్పటికీ విద్యార్థులు అన్ని పుస్తకాలను మోయాల్సిన పరిస్థితి ఉన్నది.
ప్రైవేట్ పాఠశాలలో విద్యార్థులకు అధిక పుస్తకాలు అమ్మితే చర్యలు తీసుకుంటాం. గతంలోనే విద్యార్థులపై భారం వేయొద్దని సూచనలు కూడా చేశాం. ఏ తరగతి విద్యార్థికి ఎంత బరువు పుస్తకాలు ఉండాలో సూచించాం. నిబంధనలు పాటించని వారిపై చర్యలు తీసుకుంటాం.
అధిక బరువు మోయడంతో పిల్లలకు మానసికంగా,శారీరకంగా అనారోగ్య సమస్యలు తలెత్తే అవకాశం ఉన్నది. ముఖ్యంగా మెడ, వీపు, నడుముపై తీవ్ర ప్రభావం పడుతుంది. చిన్నారుల ఎదుగుదలపై ప్రభావం పడుతుంది. బరువు నిబంధనలకు లోబడి ఉండేలా విద్యాశాఖ అధికారులు చర్యలు తీసుకోవాలి.