Pocharam Project | నాగిరెడ్డిపేట, జూలై12: వేలాది ఎకరాలకు ఆయువుపట్టు అయిన పోచారం అడుగంటింది. వర్షాలు కురియక, చుక్కనీరు రాక బోసిపోయింది. ఓవైపు, కాలం కరిగిపోతుంటే చినుకు జాడ లేక రైతాంగం ఆందోళన చెందుతున్నది. నల్లటి మబ్బులతో కమ్ముకొస్తున్న ఆకాశం వైపు ఆశగా చూస్తున్నది. వానల్లేక, ప్రాజెక్టులో నీళ్లు లేక బోర్లు వట్టిపోతున్నాయి. దీంతో నారు పోసుకునే పరిస్థితి లేదు. ఇప్పటికే పోసిన నార్లను సంరక్షించుకునే పరిస్థితి లేదు. పోసుకున్న పరిస్థితీ లేదు. కాలం ఇలాగే ఉంటే రైతుల బతకులు ఆగమే. నలుగురికి అన్నంపెట్టే రైతు బతుకుదెరువు కోసం తిరిగి వలసపోయే పరిస్థితి వస్తుందని పోచారం ఆయకట్టు రైతులు వాపోతున్నారు. ఎల్లారెడ్డి, నాగిరెడ్డిపేట మండలాల రైతులకు సాగు, తాగునీరు అందిస్తున్న వరప్రదాయిని.. అన్నం పెట్టే అన్నపూర్ణ అని ఈ ప్రాంత ప్రజలు ఇష్టంగా పిలుచుకొంటారు. అలాంటి ప్రాజెక్టు నేడు చుక్క నీరు లేకుండా బోసిపోతున్నది. ప్రాజెక్టు పూర్తి స్థాయి నీటి మట్టం 1464 ఎంసీఎఫ్టీలు (1.83 టీఎంసీలు (ప్రధాన కాలువ వద్ద 20.6 అడుగులు)) కాగా ప్రస్తుతం జీరో లెవల్కు పడిపోయింది.
పోచారం ప్రాజెక్టు ప్రధాన కాలువ ఎల్లారెడ్డి, నాగిరెడ్డిపేట మండలాల్లో 53 కిలోమీటర్లు విస్తరించి ఉంది. 73 ప్రధాన డిస్ట్రిబ్యూటర్లతో పాటు మరో పది చిన్న డిస్ట్రిబ్యూటర్లు ఉన్నాయి. అధికారికంగా 13 వేల ఎకరాలు నీరందుతున్నా, వాస్తవంగా 30 వేల ఎకరాల ఆయకట్టుకు సాగునీరు అందుతుంది.
వర్షాలు లేక ప్రాజెక్టు అడుగంటిపోవడంతో నాగిరెడ్డిపేట, లింగంపేట మండలాల్లోని ఆయకట్టు కింద పంటల సాగు ప్రశ్నార్థకంగా మారింది. అలాగే మెదక్ జిల్లాలోని ఘన్పూర్ మండలం, రాజంపేట, తాడ్వాయి మండలాల్లో భూగర్భ జలాలు అడుగంటి బోర్లు వట్టిపోతున్నాయి. తొలకరి వర్షాలకు కోటి ఆశలతో అప్పులు చేసి వేసుకున్న పంటలు వరుణుడు ముఖం చాటేయడం, బోర్లు ఎత్తిపోతుండడంతో పంటలు ఎండిపోయే పరిస్థితి తలెత్తిందని రైతులు ఆవేదన వ్యక్తం చేస్తున్నారు.
పోచారం ప్రాజెక్టు పూర్తి స్థాయి నీటి మట్టం 1464 ఎంసీఎఫ్టీలు (1.82 టీఎంసీలు) కాగా, ప్రస్తుతం డెడ్ స్టోరేజ్కి చేరింది. గతేడాది ప్రారంభంలోనే వర్షాలు కురవడంతో..రైతులు ముందస్తుగా పంటలు వేసుకున్నారు. ఈసారి పరిస్థితి దారుణంగా ఉన్నది. ఇప్పటి వరకు ప్రాజెక్టులోకి కొత్తనీరు చేరలేదు. వర్షాలు సమృద్ధిగా కురిసి ప్రాజెక్టు పూర్తి స్థాయిలో నిండితే ఆయకట్టు రైతులకు రెండు పంటలకు నీరు అందుతుంది. ప్రతిసారి ప్రాజెక్టు ఆగస్టు నెలాఖరులోపు పూర్తి స్థాయిలో నిండుతుంది. దీనిని దృష్టిలో ఉంచుకొని రైతులు పంటలు వేసే విషయంపై ఆలోచించాలి.
ప్రాజెక్టు నిండకపోతే మా రైతుల బతుకులు ఆగమవుతాయి. మా గ్రామ శివారు మొత్తం ప్రాజెక్టులో పోవడంతో..ప్రాజెక్టు పైభాగాన భూములు ఉన్నాయి. బోరుబావుల ఆధారంగా పంటలు సాగు చేసుకుంటున్నాం. ప్రాజెక్టులో 15 అడుగుల నీరు ఉంటేనే బోర్ల నుంచి నీళ్లు వస్తాయి. లేకపోతే వట్టిపోతాయి. ప్రస్తుతం గ్రామంలోని 70 శాతం మంది రైతులందరం బోరుబావుల కింద పంటలు వరి పంటలు వేసుకున్నాం. ప్రాజెక్టులో ఇప్పటివరకు నీరు రాకపోవడంతో బోర్లలో నీళ్లు తగ్గి ఎత్తిపోతున్నాయి.