నిజాంసాగర్, జూన్ 23: మహ్మద్నగర్ మండలం గాలీపూర్ గ్రామంలో నిజాంసాగర్ ప్రాజెక్టు నుంచి విడుదల చేసిన నీరు ఇండ్లలోకి చేరింది. వివరాలు ఇలా ఉన్నాయి. వానాకాలం పంటల సాగు కోసం ఆదివారం బాన్సువాడ, జుక్కల్ ఎమ్మెల్యేలు పోచారం శ్రీనివాసరెడ్డి, లక్ష్మీకాంతారావు నిజాంసాగర్ ప్రాజెక్టు నుంచి మొదటి విడుత నీటిని విడుదల చేశారు. కాగా డిస్ట్రిబ్యూటరీ ద్వారా అధికారులు పరిమితికి మించి నీటిని విడుదల చేయడంతో గాలీపూర్ గ్రామంలోకి నీరు చేరుకున్నది. రోడ్డుపై, ఇండ్లలోకి నీళ్లు చేరాయి. కెనాల్ మరమ్మతులు చేపట్టకపోవడంతోపాటు అధికారుల నిర్లక్ష్యంతోనే నిజాంసాగర్ నీరు ఇండ్లలోకి చేరుతుందని బాధితులు ఆగ్రహం వ్యక్తంచేశారు. గతంలో సైతం పలుమార్లు కెనాల్ మరమ్మతులు చేపట్టాలని సంబంధిత శాఖ కార్యాలయాల చుట్టూ తిరిగినా పట్టించుకోలేదని ప్రజలు ఆవేదన వ్యక్తంచేశారు.