నిజామాబాద్ క్రైం, డిసెంబర్ 26 : ప్రత్యర్థిపై సివంగిలా విరుచుకుపడి.. పవర్ పంచ్లతో ఉక్కిరిబిక్కిరి చేసి మహిళల బాక్సింగ్ ప్రపంచ చాంపియన్గా నిలిచి ఇందూరు కీర్తిపతాకాన్ని విశ్వవ్యాప్తం చేసింది నిఖత్ జరీన్. ప్రపంచ మహిళల బాక్సింగ్ చాంపియన్ పోటీలో స్వర్ణభేరి మోగించింది నిజామాబాద్ ముద్దుబిడ్డ. కామన్వెల్త్ గేమ్స్లో స్వర్ణం, ప్రపంచ చాంపియన్షిప్ టైటిల్ సాధించిన నిఖత్ జరీన్ తాజాగా మధ్యప్రదేశ్లోని భోపాల్ జరిగిన 6వ జాతీయ ఎలైట్ మహిళల బాక్సింగ్ పోటీల్లోనూ చాంపియన్గా నిలిచింది. నిఖత్ చాంపియన్గా నిలవడంతో రాష్ట్ర రోడ్లు భవనాలు శాఖ మంత్రి వేముల ప్రశాంత్రెడ్డి హర్షం వ్యక్తం చేశారు. సోమవారం జరిగిన తుది పోరులో రైల్వేస్(ఆర్ఎస్పీబీ) బాక్సర్ అనామికతో తలపడి ఏకపక్ష విజయం నమోదు చేసింది. 50 కేజీల మహిళల ఫైనల్లో నిఖత్ 4-1 తో రైల్వేస్ బాక్సర్ అనామికపై గెలుపొందింది. పోరు ఆరంభం నుంచే వరుస పంచ్లతో విరుచుకుపడిన నిఖత్కు అనామిక కనీస పోటీనివ్వలేకపోయింది. నిజామాబాద్ కీర్తి ప్రతిష్టలు తెలంగాణ రాష్ట్ర గౌరవాన్ని చిరస్థాయిలో నిలిచిపోయేలా తన ప్రతిభను కనబరుస్తున్న నిఖత్ జరీన్కు మంత్రి వేముల అభినందనలు తెలిపారు. భవిష్యత్తులో మరిన్ని విజయాలు సాధించి తెలంగాణ ఖ్యాతిని చాటాలని ఆకాంక్షించారు.
నగరంలోని వినాయక్నగర్కు చెందిన జమీల్ హైమద్, సుల్తానా దంపతుల గారాలపట్టి నిఖత్ జరీన్. 1996 జూన్ 14న జన్మించింది. స్థానిక నిర్మల హృదయ పాఠశాలలో పదో తరగతి వరకు చదువుకున్నది. పాఠశాలలో నిర్వహించిన ఎస్టీఎఫ్ అథ్లెటిక్స్లో చాంపియన్గా నిలిచింది. ఇదే సమయంలో నిఖత్ అథ్లెటిక్స్లో రాణించడాన్ని చూసిన కోచ్ అన్వర్ మెరుగైన శిక్షణ ఇచ్చాడు. డీఎస్ఏ మైదానంలో అథ్లెటిక్స్ సాధన చేస్తున్న నిఖత్ దృష్టి బాక్సింగ్పై పడింది. ఈ విషయం తెలుసుకున్న తల్లిదండ్రులు బాక్సింగ్ నేర్చుకునేందుకు ఒప్పుకున్నారు. దీంతో 13ఏండ్ల వయస్సులో కోచ్ శంషొద్దీన్ వద్ద చేరింది. అక్కడి నుంచి మొదలైన నిఖత్ బాక్సింగ్ పంచ్ల వర్షం అప్రతిహతంగా కొనసాగుతున్నది. ప్రపంచ చాంపియన్షిప్లో స్వర్ణం గెలుచుకున్న ఐదో బాక్సర్గా నిఖత్ చరిత్ర సృష్టించింది.