కామారెడ్డి, జూలై 17 : కాంగ్రెస్ ప్రభుత్వం ఇచ్చిన హామీలను ఆరు నెలలు గడుస్తున్నా నెరవేర్చడం లేదని ఆర్మూర్ ఎమ్మెల్యే రాకేశ్రెడ్డి అన్నారు. కామారెడ్డి జిల్లా కేంద్రంలోని పార్టీ కార్యాలయంలో బీజేపీ జిల్లా అధ్యక్షురాలు అరుణతార అధ్యక్షతన రాష్ట్ర కార్యవర్గ సమావేశాన్ని బుధవారం నిర్వహించారు. ఈ సందర్భంగా ఎమ్మెల్యే రాకేశ్ రెడ్డి మాట్లాడుతూ.. 10 ఏండ్ల కాలంలో మోదీ చేసిన అభివృద్ధితోనే మరోసారి కేంద్రంలో బీజేపీ వచ్చిందని అన్నారు. క్షేత్రస్థాయిలో పార్టీ ఇంకా బలపడాల్సి ఉందని చెప్పారు. ప్రజల మధ్య ఉంటూ ప్రజల కోసం పని చేస్తే స్థానిక సంస్థలో బీజేపీ విజయం సాధిస్తుందని తెలిపారు.
రానున్న స్థానిక ఎన్నికలో వార్డు సభ్యుడిని మొదలుకొని జడ్పీ చైర్మన్ వరకు బీజేపీనే గెలుస్తుందన్నారు. ఉద్యోగాలు, మహాలక్ష్మి పథకం అమలు, రైతు రుణమాఫీ, రైతు భరోసా అమలు వంటి హామీల అమలు కోసం నిరుద్యోగులు, మహిళలు, రైతుల పక్షాన బీజేపీ రాష్ట్ర ప్రభుత్వంపై ఉద్యమం చేస్తుందని చెప్పారు. కామారెడ్డి ఎమ్మెల్యే కాటిపల్లి వెంకటరమణారెడ్డి మాట్లాడుతూ.. గత పార్లమెంట్ ఎన్నికల్లో జిల్లాలో బీజేపీ ఆధిక్యత ప్రదర్శించిందని అన్నారు. బీజేపీని క్షేత్రస్థాయిలో బలపర్చాలని సూచించారు. కార్యక్రమంలో మాజీ మంత్రి నేరళ్ల ఆంజనేయులు, మాజీ ఎమ్మెల్యే గంగారాం, బీజేపీ నాయకులు మురళీదర్గౌడ్, బాణాల లక్ష్మారెడ్డి, నాయకులు పాల్గొన్నారు.