బాన్సువాడ రూరల్, జూన్ 8: ప్రతి పేద విద్యార్థికి నాణ్యమైన విద్యను అందించాలనే గొప్ప సంకల్పంతో తెలంగాణ తొలి సీఎం కేసీఆర్ గురుకుల పాఠశాలల ఏర్పాటుకు కృషి చేశారని, రాష్ట్రంలో 230 ఉన్న గురుకుల పాఠశాలలను 1120కి పెంచిన ఘనత ఆయనకే దక్కిందని మాజీ స్పీకర్, ఎమ్మెల్యే పోచారం శ్రీనివాసరెడ్డి అన్నారు. బాన్సువాడ మండలంలోని కోనాపూర్ గ్రామంలో రూ.12 కోట్లతో నిర్మించే గిరిజన బాలికల గురుకుల పాఠశాల భవన నిర్మాణ పనులకు శనివారం భూమి పూజ చేశారు. ఈ సందర్భంగా పోచారం మాట్లాడుతూ ప్రపంచం చాలా వేగంగా పరుగెడుతుందని,
పరిగెత్తే ప్రపంచాన్ని అందుకోవాలంటే నాణ్యమైన విద్య చాలా అవసమరని అన్నారు. బాన్సువాడ నియోజకవర్గంలోని పేద విద్యార్థులకు నాణ్యమైన విద్యను అందించాలనే సంకల్పంతో పనిచేశానని అన్నారు. కేసీఆర్ కృషితో కోనాపూర్- హన్మాజీపేట్ గ్రామాల మధ్య గిరిజన గురుకుల పాఠశాల మంజూరైందని తెలిపారు. గత సంవత్సరం 11మందితో ప్రారంభమైన పాఠశాల నేడు 350మంది విద్యార్థులతో కొనసాగుతున్నదన్నారు. విద్యార్థినులకు శాశ్వత భవనం నిర్మాణం కోసం రూ.12 కోట్లు మంజూరు చేశామని, త్వరలోనే అందుబాటులోకి తీసుకొస్తామని చెప్పారు.
గట్టుమీది గ్రామాలైన హన్మాజీపేట్, కోనాపూర్, సంగోజీపేట్, కాద్లాపూర్ తదితర గ్రామాలకు సాగునీరు అందించేందుకు రూ.200కోట్లతో సిద్దాపూర్ రిజర్వాయర్ పనులు చేపట్టామన్నారు. ఎవరెన్ని అడ్డంకులు సృష్టించినా రిజర్వాయర్ పనులు పూర్తి చేయడమే తన సంకల్పమని అన్నారు. పనులు సజావుగా నడిచేందుకు గ్రామస్తులు సహకరించాలని కోరారు. కార్యక్రమంలో వైస్ ప్రిన్సిపాల్ మనీషా, వర్ని జడ్పీటీసీ హరిదాస్, బాన్సువాడ మున్సిపల్ చైర్మన్ జంగం గంగాధర్, రైతుబంధు సమితి జిల్లా అధ్యక్షుడు దుద్దాల అంజిరెడ్డి, డీసీసీబీ డైరెక్టర్ సంగ్రాం నాయక్, ఎంపీడీవో బషీరొద్దీన్, ఎంపీటీసీలు జెట్టి హన్మాండ్లు, సుధాకర్రెడ్డి, బీఆర్ఎస్ మండల అధ్యక్షుడు మోహన్నాయక్, నాయకులు పాల్గొన్నారు.
సార్ మీ కృషి, మీ కుమారుడు పోచారం భాస్కర్రెడ్డి సహకారంతో ఆర్మీ జవాన్ ఉద్యోగం సాధించానని ఓ యువకుడు ఆనందం వ్యక్తం చేశారు. సంగోజీపేట్ గ్రామానికి చెందిన రాసాలం మహేశ్.. ఆర్మీ జవాన్గా ఎంపికయ్యాడు. కోనాపూర్కు వచ్చిన పోచారంను మహేశ్ ఘనంగా సత్కరించారు. నిరుద్యోగుల కోసం బాన్సువాడలో పీబీఆర్ కోచింగ్ సెంటర్ ఏర్పాటు చేసి ఉచితంగా శిక్షణ ఇవ్వడం వల్లే తాను భారత ఆర్మీ జవాన్గా ఉద్యోగం సాధించానని చెప్పాడు. దేశానికి సేవ చేసే గొప్ప ఉద్యోగం సాధించావని ఎమ్మెల్యే పోచారం అతడ్ని అభినందించారు.