బీర్కూర్/బాన్సువాడ/ కోటగిరి, జనవరి 16: మహారాష్ట్రలోని దెగ్లూర్ కాంగ్రెస్ పార్టీకి చెందిన కౌన్సిలర్లు, ప్రజాప్రతినిధులు తెలంగాణ రాష్ట్రశాసన సభాపతి పోచారం శ్రీనివాసరెడ్డితో ఆదివారం మర్యాదపూర్వకంగా భేటీ అయ్యారు. ఈ సందర్భంగా వారు మాట్లాడుతూ..బీఆర్ఎస్ ప్రభు త్వం అమలుచేస్తున్న సంక్షేమ పథకాలు, చేపడు తున్న అభివృద్ధి కార్యక్రమాలకు తాము ఆకర్షితులమైనట్లు తెలిపారు. దేశమంతా తెలంగాణ పాలసీ అమలుచేయాలని కోరారు. మహారాష్ట్రలో బీఆర్ఎస్ పార్టీని బలోపేతం చేయాలని, ఇందుకోసం భారీ బహిరంగ ఏర్పాటు చేయాలని కోరారు.
బహిరంగ సభ వేదికగా తాము బీఆర్ఎస్లో చేరుతామని స్పష్టం చేశారు. తెలంగాణ పథకాలు కూడా మహారాష్ట్రలో అమలు చే స్తే బీఆర్ఎస్ విజయం ఖాయమని ధీమా వ్యక్తం చేశారు. కాంగ్రెస్ పార్టీతో పాటు శివసేన, మజ్లిస్, బీజేపీ ఇతరత్ర పార్టీల నాయకులు కూడా బీఆర్ఎస్ పార్టీలో చేరడానికి సిద్ధంగా ఉన్నారని తెలిపారు. దెగ్లూర్ మున్సిపల్ పాలకవర్గం గడువు ముగియనున్నదని, రాబోవు మున్సిపల్ ఎన్నికల్లో బీఆర్ఎస్ నుంచి పోటీ చేస్తామని చెప్పారు. తెలంగాణలో సీఎం కేసీఆర్ చేపడుతున్న అభివృద్ధి కార్యక్రమాలు, అమలుచేస్తున్న సంక్షేమ పథకాల కోసం మహారాష్ట్ర ప్రజలు ఎదురుచూస్తున్నారని తెలిపారు.
ఉచిత విద్యుత్తో పాటు ముఖ్యంగా రైతుబంధు, రైతుబీమా అద్భుతమైన పథకాలని పేర్కొన్నారు. బీర్కూర్ మండలం రైతునగర్లో స్పీకర్తో జరిగిన ఈ భేటీలో దెగ్లూర్ మున్సిపల్ హెల్త్ శానిటేషన్ చైర్మన్ షేక్ రసూల్ హైమద్, దెగ్లూర్ కౌన్సిలర్ గులాం రసూల్, కాంగ్రెస్ నాయకులు తాహిద్, అఫ్సర్బిన్ అలీ, కోటగిరి ఏఎంసీ చైర్మన్ అహ్మద్, కోటగిరి ఎంపీటీసీ సలీం, బీఆర్ఎస్ కోటగిరి అధ్యక్షుడు ఇలియాస్ఖాన్, మైనార్టీ సెల్ విభాగం నాయకుడు బాబూఖాన్ తదితరులు ఉన్నారు.