రాష్ట్ర సాధన కోసం తన ప్రాణాలను అర్పించిన అమరుడు కానిస్టేబుల్ కిష్టయ్య కుటుంబానికి బీఆర్ఎస్ అధినేత, తెలంగాణ తొలి సీఎం కేసీఆర్ మరోసారి అండగా నిలిచారు. కిష్టయ్య ప్రాణత్యాగంతో కుటుంబ పెద్దను కోల్పోయిన కుటుంబానికి తానున్నానని ఆనాడే మాట ఇచ్చిన కేసీఆర్.. తన మాటను నిలుపుకొంటూ వస్తున్నారు. కిష్టయ్య కొడుకు, కూతురు చదువుతో సహా కష్టకాలంలో అండగా నిలుస్తూ వచ్చారు. కిష్టయ్య బిడ్డ ఎంబీబీఎస్ చదువు కోసం అవసరమైన ఆర్థిక సహాయం అందించారు. ఎంబీబీఎస్ పూర్తిచేసుకున్న కిష్టయ్య బిడ్డ ప్రియాంక ప్రస్తుతం పీజీ చదువుతున్నది. అందుకు మెడికల్ కాలేజీలో కట్టాల్సిన ఫీజు కోసం కావాల్సిన రూ.24లక్షల చెక్కును ఆదివారం కిష్టయ్య కుటుంబానికి కేసీఆర్ అందజేశారు. అనంతరం వారితో కలిసి భోజనం చేశారు. కిష్టయ్య కొడుకు రాహుల్ చేస్తున్న ఉద్యోగం గురించి ఆరా తీశారు. ఈ సందర్భంగా తమ కుటుంబాన్ని ఇంటి పెద్దలా ఆదుకుంటున్న కేసీఆర్కు కిష్టయ్య కుటుంబం ధన్యవాదాలు తెలిపింది.
నాలుగు కోట్ల తెలంగాణ ప్రజల ఆకాంక్ష నెరవేరి పదేండ్లు పూర్తయ్యింది. మా నుంచి పోలీసు కానిస్టేబుల్ కిష్టయ్య (నా భర్త) దూరమై 15ఏండ్లు గడిచిపోయాయి. ఆనాడు చిన్నపిల్లలను పట్టుకొని నా తండ్రిలాంటి కేసీఆర్ దగ్గరికి వచ్చాను. మా కుటుంబానికి తానున్నానని ఆనాడు కేసీఆర్ మాట ఇచ్చాడు. నీవు బాధ పడకమ్మా.. నీ పిల్లలను నేను చూసుకుంటా అన్నారు. ఇచ్చిన మాట ప్రకారం మా పిల్లలకు, మా కుటుంబానికి అన్నివిధాలా అండగా ఉన్నారు. నా బిడ్డ మెడికల్ కాలేజీలో చదువుకు డబ్బులు ఇస్తున్నారు.
మేము ఆరో తరగతిలో ఉన్నప్పుడు మా నాన్న తెలంగాణ కోసం ప్రాణత్యాగం చేసిండు. మాకు ఊహ తెల్వని సమయంలోనే నాన్న చనిపోయాడు. ఆ సమయంలో బాధపడొద్దు.. మీ కుటుంబానికి తాను అండగా ఉంటానని అప్పటి సీఎం కేసీఆర్ మాట ఇచ్చారు. ఇచ్చినట్లుగానే మమ్ములను చూసుకుంటున్నారు. చెల్లిను మెడిసిన్ చేయించారు. ఇప్పుడు పీజీ కోసం మళ్లీ డబ్బులు ఇచ్చారు. మా అమ్మకు తండ్రిలా కేసీఆర్ అన్ని విధాలా అండగా ఉన్నారు. మా నాన్న కల నెరవేరింది. కానీ మా మధ్య నాన్న లేకపోవడం బాధగా ఉన్నది.