ఖలీల్వాడీ/ కామారెడ్డి, ఏప్రిల్ 11 : ఉమ్మడి నిజామాబాద్ జిల్లాలో వెనుకబడిన తరగతుల శాఖ ఆధ్వర్యంలో మహాత్మా జ్యోతిబా ఫూలే 197వ జయంతి వేడుకలను మంగళవారం ఘనంగా నిర్వహించారు. ఈ కార్యక్రమానికి ఎ మ్మెల్యేలు, కలెక్టర్లు, అధికారులు హాజరయ్యారు. ఈ సందర్భంగా ఫూలే చిత్రపటాలు, విగ్రహాలకు పూలమాలలు వేసి నివాళులు అర్పించారు. నిజామాబాద్ జిల్లా కేంద్రంలోని న్యూఅంబేద్కర్ భవన్లో నిర్వహించిన కార్యక్రమంలో ఎమ్మెల్యే బిగాల గణేశ్గుప్తా , జడ్పీచైర్మన్ దాదన్నగారి విఠల్రావు, కలెక్టర్ రాజీవ్గాంధీ హన్మంతు, ఉమెన్స్ ఫైనాన్స్ కార్పొరేషన్ చైర్పర్సన్ ఆకుల లలిత పాల్గొన్నారు.
ఈ సందర్భంగా అర్బన్ ఎమ్మెల్యే బిగాల మాట్లాడుతూ.. బడుగు, బలహీన వర్గాల అభ్యున్నతి కోసం కేసీఆర్ ప్రభుత్వం పనిచేస్తున్నదని అన్నారు. సమాజంలో కులవివక్షను, అన్యాయాన్ని రూపుమాపడానికి తన జీవితాన్ని ధారపోసిన మహాత్ముడు జ్యోతిబా ఫూలే అని కొనియాడారు. ఆయన సతీమణి సావిత్రీబాయి ఫూలే సమాజంలో మహిళలపై జరుగుతున్న వివక్షకు వ్యతిరేకంగా పోరాడిన మహిళా చైతన్యమూర్తి అని పేర్కొన్నారు. వారి ఆశయసాధనలో భాగం గా రాష్ట్ర ప్రభుత్వం బీసీ గురుకుల పాఠశాలలను ఏర్పాటు చేసి నిరుపేద విద్యార్థులకు ఉచితంగా కార్పొరేట్ విద్యనందిస్తుందన్నారు. ఫూలే ఆశయ సాధనకు ప్రతి ఒక్కరూ కృషి చేయాలని కోరారు. కార్యక్రమంలో నగర మేయర్ దండు నీతూకిరణ్, నుడా చైర్మన్ ప్రభాకర్రెడ్డి, రాష్ట్ర మహిళా కమిషన్ సభ్యురాలు సూదం లక్ష్మి, అదనపు కలెక్టర్ చంద్రశేఖర్, కో-ఆప్షన్ సభ్యురాలు చంద్రకళ, బీసీ అభివృద్ధిశాఖ అధికారులు, బీసీ సంఘాల నాయకులు పాల్గొన్నారు.
బాలికలను డిగ్రీ వరకు చదివించాలి:
కామారెడ్డి కలెక్టర్ జితేశ్ వీ పాటిల్
బాలికలను తప్పనిసరిగా డిగ్రీ వరకు చదివించాలని కామారెడ్డి కలెక్టర్ జితేశ్ వీ పాటిల్ అన్నారు. కామారెడ్డి మున్సిపల్ కార్యాలయ ఆవరణలో నిర్వహించిన మహాత్మా జ్యోతిబా ఫూలే జయంతి వేడుకల్లో కలెక్టర్ పాల్గొని మాట్లాడారు. బాలికలను చదివించాల్సిన బాధ్యత తల్లిదండ్రులపై ఉందని తెలిపారు.ఆస్తుల కన్నా ముఖ్యమైనది చదువని గుర్తించాలన్నారు. మహిళల విద్యాభివృద్ధి కోసం కృషి చేసిన గొప్ప సంఘ సంస్కర్త మహాత్మా జ్యోతిబా ఫూలే అని కొనియాడారు. అనంతరం విద్యార్థులు నిర్వహించిన సాంస్కృతిక కార్యక్రమాలు ఆకట్టుకున్నాయి. కార్యక్రమం లో జడ్పీ వైస్ చైర్మన్ ప్రేమ్ కుమార్, జిల్లా వెనుకబడిన తరగతుల సంక్షేమ అధికారి శ్రీనివాస్, బీబీపేట్ ఎంపీపీ బాలమణి, దోమకొండ జడ్పీటీసీ తిర్మల్ గౌడ్, బహుజన సంఘాల ప్రతినిధులు సిద్ధిరాములు, బలరాం, టీఎన్జీవోస్ జిల్లా అధ్యక్షుడు వెంకట్ రెడ్డి, కార్యదర్శి సాయిలు, ఆయా సంఘాల నాయకులు తదితరులు పాల్గొన్నారు.