ఖలీల్వాడి/కామారెడ్డి, జూన్ 8: ఉమ్మడి నిజామాబాద్ జిల్లాలో గ్రూప్-1 ప్రిలిమినరీ పరీక్షకు సర్వం సిద్ధమైంది. ఉదయం 10.30 నుంచి మధ్యాహ్నం 1 గంట వరకు పరీక్ష కొనసాగనున్నది. అరగంట ముందుగానే పరీక్షా కేంద్రానికి చేరుకోవాలని, అధికారులు స్పష్టం చేశారు. హాల్టికెట్పై ఇటీవల తీసుకున్న పాస్పోర్ట్ సైజ్ ఫొటోను కచ్చితంగా అతికించి తీసుకురావాలని సూచించారు.
నిజామాబాద్ జిల్లా వ్యాప్తంగా 41కేంద్రాలు ఏర్పాటు చేశామని, 12,833 మంది అభ్యర్థులు పరీక్ష రాయనున్నారని కలెక్టర్ రాజీవ్ గాంధీ హన్మంతు తెలిపారు. కేంద్రాల వద్ద 144 సెక్షన్ అమలులో ఉంటుందని, 160 మంది అభ్యర్థులకు ఒక బయోమెట్రిక్ యంత్రాన్ని అందుబాటులో ఉంచినట్లు వివరించారు.
కామారెడ్డిలో గ్రూప్-1ప్రిలిమినరీ పరీక్షకు ఏర్పాట్లు పూర్తిచేసినట్లు కోఆర్డినేటర్ విజయ్కుమార్ శనివారం తెలిపారు. జిల్లాలో 4797 మంది అభ్యర్థులు 12 కేంద్రాల్లో గ్రూప్-1 ప్రిలిమినరీ పరీక్ష రాయనున్నారని పేర్కొన్నారు. పరీక్ష పకడ్బందీగా నిర్వహించేందుకు పోలీసు బందోబస్తు ఏర్పాటు చేస్తున్నట్లు తెలిపారు. పరీక్ష పర్యవేక్షణకు ముగ్గురు రూట్ అధికారులు, ఫ్లైయింగ్ స్కాడ్ బృందాలు, అబ్జర్వర్లను నియమించినట్లు పేర్కొన్నారు.