డిచ్పల్లి/ఎడపల్లి/ముప్కాల్, జూన్25: రాష్ట్ర ప్రభుత్వం వానకాలం, యాసంగి సీజన్ ప్రారంభమయ్యే ముందు రైతుభరోసా ఇవ్వాలని రైతులు కోరారు. ‘రైతు భరోసా’పై రాష్ట్ర వ్యవసాయ శాఖ మంత్రి తుమ్మల నాగేశ్వర్రావు అధ్యక్షతన సబ్ కమిటీ రైతుల అభిప్రాయాలనుసేకరిస్తోంది. ఇందులో భాగంగా డిచ్పల్లి మండలంలోని మెంట్రాజ్పల్లితోపాటు ముప్కాల్, ఎడపల్లి మండల కేంద్రాల్లోని రైతువేదికల్లో మంగళవారం ఏర్పాటు చేసిన సమావేశాల్లో నియోజకవర్గాల రైతుల అభిప్రాయాలను సేకరించారు. కార్యక్రమంలో మెంట్రాజ్పల్లిలో ఏడీఏ ప్రదీప్కుమార్, ఏవో రాంబాబు, విండో చైర్మన్లు రామకృష్ణ, శ్రీనివాస్రెడ్డి పాల్గొన్నారు. రైతు భరోసా పథకంపై రైతుల అభిప్రాయాలు తెలుసుకునేందుకు ఎడపల్లి మండల కేంద్రంలోని రైతు వేదికలో రైతునేస్తం కార్యక్రమం ద్వారా మంగళవారం నిర్వహించారు.
రాష్ట్ర వ్యవసాయ శాఖ మంత్రి తుమ్ముల నాగేశ్వర్రావు రాష్ట్రవ్యాప్తంగా వీడియో కాన్ఫరెన్స్ నిర్వహించారు. కార్యక్రమంలో సుమారు 100 రైతులు పాల్గొన్నారు. కార్యక్రమానికి జిల్లా వ్యవసాయాధికారి వాజిద్ హుస్సేన్ హాజరై బోధన్ నియోజకవర్గ రైతుల అభిప్రాయాలను లిఖిత పూర్వకంగా స్వీకరించారు. కార్యక్రమంలో సొసైటీ చైర్మన్ పోలమల్కారెడ్డి, నాయకులు ఎల్లయ్య యాదవ్, జనగం మోహన్ రెడ్డి, ఏవో సిద్ది రామేశ్వర్ పాల్గొన్నారు. ముప్కాల్ మండల కేంద్రంలోని రైతు వేదిక ప్రాంగణంలో రైతు నేస్తం కార్యక్రమంలో రైతులు పాల్గొన్నట్లు భీమ్గల్ ఏడీఏ మల్లయ్య తెలిపారు. ఆయన మాట్లాడుతూ.. బాల్కొండ నియోజకవర్గ రైతులు వారి అభిప్రాయాలను తెలిపారని పేర్కొన్నారు.