కోటగిరి, జూలై 22 ; “నేను ఇరవై వేల లోన్ తీసుకున్న.. మాఫీ కాలేదు… నా లోన్ రూ.లక్షలోపే ఉన్నది.. లిస్టులో పేరు రాలేదు…లోన్ రెన్యువల్ చేస్తూ వస్తున్న.. అయినా మాఫీ కాలేదు..అన్ని కరెక్టుగా ఉన్నాయి…ఆఫీసర్లను అడిగితే మాకేం తెల్వదంటున్నారు…”ఇవన్నీ మూడు రోజులుగా బ్యాంకుల వద్ద రైతుల నుంచి వస్తున్న మాటలు. ప్రతి బ్యాంకు వద్ద నిత్యం రైతుల వెంట ఇవే వ్యాఖ్యలు. రాష్ట్ర ప్రభుత్వం అట్టహాసంగా ప్రారంభించిన రుణమాఫీ పథకం..అర్హులమైనా తమకు లబ్ధి చేకూరడం లేదంటూ చాలా మంది రైతులు ఆవేదన వ్యక్తంచేస్తున్నారు. పేరు గొప్ప.. ఊరు దిబ్బ అన్న చందంగా రూ.లక్ష లోపు ఉన్న రైతులందరికీ మాఫీ చేస్తామని ప్రభుత్వ పెద్దలు చెబుతున్నా.. అవి నోటి మాటలకే సరిపోవడం, అమలుకు నోచుకోకపోవడంతో అన్నదాతలు మండిపడుతున్నారు. అన్నీ సక్రమంగా ఉన్నా.. ఏదో ఒక సాకు చూపి మాఫీ రాలేదని చెబుతున్నారని, కొంతమంది అధికారులను అడిగితే మాకేం తెల్వదంటూ సమాధానమిస్తున్నారని ఆగ్రహం వ్యక్తంచేస్తున్నారు. –
అర్హత ఉన్నా లిస్టులో పేరు రాలే..
కోటగిరి, జూలై 22: నేను చిన్న రైతును. నాకు కొత్తపల్లి శివారులో 38 గుంటల వ్యవసాయ భూమి ఉన్నది. మూడేండ్ల కిందట కోటగిరి ఎస్బీఐ బ్యాంక్లో రూ.57,500 పంట రుణం తీసుకున్న. కాంగ్రెస్ సర్కారు ప్రతి రైతు కుటుంబానికి రూ. రెండు లక్షల రుణమాఫీ చేసినట్లు ప్రకటించింది. గురువారం రూ.లక్షలోపు క్రాప్లోన్ ఉన్న వాళ్లకు మాఫీ చేస్తామని చెప్పింది. కానీ సర్కారు ఇచ్చిన మొదటి జాబితాల నా పేరు లేదు. ఎందుకు రాలేదో అని అడిగితే ఎవరూ తెల్వదంటున్నారు.
– కోటగిరి పెద్ద సాయిలు, రైతు, కొత్తపల్లి, కోటగిరి మండలం
నాకెందుకు కాలేదో తెలుస్తలేదు..
కోటగిరి, జూలై 22: నాకు కొత్తపల్లి శివారులో 18 గుంటల వ్యవసాయ భూమి ఉన్నది. కోటగిరి సహకార బ్యాంకులో 10 నెలల కిందట రూ.19వేలు క్రాప్లోన్ తెచ్చుకున్న. లక్షలోపు రుణాలు అన్నీ మాఫీ అవుతాయ్ అన్నరు. నా అప్పు కూడా మాఫీ అయితదని సంబురపడ్డ కానీ, వాళ్లు ఇచ్చిన లిస్టుల నా పేరు లేదు. నా కన్నా ఎక్కువ ఉన్నోళ్లకు మాఫీ వచ్చింది. నాతోపాటు లోన్ తీసుకున్న ఇద్దరికీ మాఫీ వచ్చింది కానీ నాకెందుకు రాలేదో.. తెలుస్తలేదు. ఇట్లయితే ఎట్ల? నాకు మాఫీ అయ్యేటట్లు చూడాలె.
– సంగని గంగామణి, మహిళా రైతు,
కొత్తపల్లి, కోటగిరి మండలం రూ.36వేలకు మాఫీ రాలేదు..
సారంగాపూర్, జూలై 22: నాకు ఒక ఎకరం భూమి ఉన్నది. ఐడీబీఐ బ్యాంకులో పాసు పుస్తకం పెట్టి ఐదేండ్ల కిందట రూ.36 వేలు క్రాప్లోన్ తీసుకున్నాను. లోన్ మాఫీ లిస్ట్లో నా పేరు రాలేదు. బ్యాంకు, వ్యవసాయ అధికారులకు అడిగితే ఇప్పుడైతే లిస్టులో పేరు రాలేదు. తర్వాత వస్తదేమో జర ఆగుమని చెప్పిండ్రు. నాలాగా మా ఊళ్లో చాలా మంది రైతులకు మాఫీ రాలేదు. మాఫీ వస్తదేమోనని కండ్లు కాయలుకాసేలా ఎదురుచూసినా గానీ ఏం లాభం లేకుండా పోయింది. ఇప్పటికే ఈ కాంగ్రెస్ సర్కారు రైతుబంధు డబ్బులు ఇయ్యలేదు. అయినా అప్పు చేసి పంటలు వేసినం. అయినా కేసీఆర్ సారే బాగుండే. టైమ్కి రైతుబంధు డబ్బులు ఇచ్చిండు. గందరగోళం లేకుండా లోన్లు మాఫీ చేసిండు. కాంగ్రెసోళ్లు ఊరుకులాడుడు తప్ప రైతులకు మేలు చేసిందేమీ లేదు.
– బానోత్ సామ్యనాయక్, రైతు, మల్కాపూర్ తండా, నిజామాబాద్ రూరల్