కామారెడ్డి, జూలై 11: పెండింగ్లో ఉన్న వేతనాలను చెల్లించాలని డిమాండ్ చేస్తూ జిల్లా కేంద్రంలోని కలెక్టరేట్ ఎదుట తెలంగాణ ప్రగతిశీల గ్రామ పంచాయతీ వర్కర్స్ యూనియన్ ఆధ్వర్యంలో గురువారం ధర్నా నిర్వహించారు. ఈ సందర్భంగా వారు మాట్లాడుతూ జిల్లా వ్యాప్తంగా నెలలుగా జీతాలు రాక గ్రామ పంచాయతీ కార్మికులు అవస్థలు పడుతున్నారని అన్నారు. పంచాయతీరాజ్ శాఖ మంత్రి సీతక్క, సీఎం రేవంత్ రెడ్డి పట్టించుకోవడం లేదని అన్నారు. కార్మికులు ఆకలితో అలమటిస్తున్నారని ఆవేదన వ్యక్తంచేశారు. సమస్యను పరిష్కరించకపోతే పెద్ద ఎత్తున ఆందోళన చేపడతామని హెచ్చరించారు. జిల్లా అధికారులు సమస్యను ప్రభుత్వం దృష్టికి తీసుకెళ్లి పెండింగ్లో ఉన్న జీతాలు చెల్లించాలని డిమాండ్ చేశారు. కార్యక్రమంలో తెలంగాణ ప్రగతిశీల గ్రామ పంచాయతీ వర్కర్స్ యూనియన్ రాష్ట్ర నాయకుడు రమేశ్, కిశోర్, పీడీఎస్యూ జిల్లా అధ్యక్షుడు సురేశ్, నాయకులు దామోదర్, గోపాల్, వెంకట్, పాటిరాజాం, సైదులు, లక్ష్మణ్, బాల్ రాజవ్వ, రాజమణి, రాజన్న తదితరులు పాల్గొన్నారు.