నిజామాబాద్, జూలై 8(నమస్తే తెలంగాణ ప్రతినిధి) / మాక్లూర్: భార్యా ఇద్దరు పిల్లలతో సంసారాన్ని వెళ్లదీస్తున్న సురేశ్ది(పేరుమార్చాం) దిగువ మధ్యతరగతి సాధారణ కుటుంబం. అతనిది నెలకు రూ.20వేలు సంపాదించే ప్రైవేటు ఉద్యోగం. మద్యానికి బానిసకావడంతో నిత్యం రూ.100 నుంచి రూ.150 వరకు ఖర్చు చేస్తున్నాడు. నెలకు సరాసరి మద్యంపై పెడుతున్న వ్యయం రూ.3వేలు మించుతున్నది. అదే భార్యాపిల్లల అవసరాలకు రోజుకు అరలీటర్ నుంచి లీటర్ వరకు పాలను ఇంటికి తీసుకొస్తున్నాడు. లీటర్ పాలకు రూ.80 చొప్పున నెలకు సగటున రూ.2వేల వరకు వెచ్చిస్తున్నాడు. ఇలా ఒక సాధారణ కుటుంబంలో మద్యానికి బానిసైన ఇంటి పెద్దతో జరుగుతున్న నష్టం చాలా ఉంటున్నది. భారీగా సంపాదించే కుటుంబాల్లోనూ ఈ వ్యత్యాసం మరింత ఎక్కువగానే ఉంటుంది. మొత్తానికి మద్య నియంత్రణ లేమితో సాధారణ, మధ్యతరగతి కుటుంబాలే చితికిపోతున్నాయి. గతేడాది డిసెంబర్ నుంచి జూన్ ముగింపు వరకు ఉమ్మడి జిల్లాలో 10.11లక్షల బీర్ కేసులు, 17.96 లక్షల విస్కీ కేసులు అమ్ముడయ్యాయి. వీటి విలువ రూ.1053కోట్లుగా ఉండడం విశేషం.
మద్య నియంత్రణలో కాంగ్రెస్ ప్రభుత్వం వైఫల్యం చెందుతున్నది. అధికారంలోకి వచ్చిన ఏడు నెలల్లో మద్యం అమ్మకాలను పరిశీలిస్తే నియంత్రణ అన్నది మచ్చుకూ లేకుండా పోయిందని తెలుస్తున్నది. గణనీయమైన మద్యం అమ్మకాలు పెరుగుతుండడంతో ప్రభుత్వానికి లాభదాయకంగా మారింది. ఉమ్మడి జిల్లాలో మద్యం అమ్మకాలు పాలు, నీళ్లతో సమానంగా మారిందన్న వాదన వినిపిస్తున్నది. మద్యం విక్రయాల పెరుగుదల ప్రభావం సర్కారుకు కాసులు కురిపిస్తుండగా మరోవైపు సామన్య కుటుంబాల ఎదుగుదల, పొదుపు చర్యలను తగ్గిస్తున్నది. మద్యం విచ్చలవిడితనంతో మైకంలో పలువురు క్షణికావేశంలో నేరాలకు పాల్పడుతున్న ఘటనలు సైతం పెరుగుతున్నాయి. తమ వ్యాపారాలు మూడు పువ్వులు… ఆరుకాయలు అన్న చందంగా మార్చుకునేందుకు మద్యం దుకాణాల యాజమాన్యాలు అంతా కలిసి ఓ ప్రణాళికను అమలు చేస్తున్నారు. దీనికి స్థానిక పోలీసులు సైతం సంపూర్ణ మద్దతు ఇస్తున్నట్లుగా సమాచారం. తెర వెనుక ఆబ్కారీ శాఖ అధికారులు వంత పాడుతుండడంతో ఈ తంతు సాఫీగా సాగుతున్నది. వాస్తవానికి గ్రామీణ ప్రాంతాల్లోని మద్యం దుకాణాల్లో బాటిళ్ల కొరత అన్నదే ఎప్పుడూ కనిపించదు. నిజామాబాద్ జిల్లాలో ఈ మధ్య కాలంలోనే తరచూ మద్యం కొరత ఎదురవుతుండడం విడ్డూరంగా మారుతున్నది. కొన్ని డిమాండ్ ఉన్న బాటిళ్లను బెల్టు దుకాణాలకు సరఫరా చేసి రెట్టింపు వసూళ్లకు పాల్పడుతున్నారు. మద్యం దుకాణాల్లో ఎమ్మార్పీ ధరలకే విక్రయించాల్సి ఉంటున్నందున కుటిల ఆలోచనతో మద్యం వ్యాపారులు ఈ ఎత్తుగడకు పాల్పడుతున్నారు. లైసెన్స్ పొందిన వైన్స్ షాపుల్లో దొరకని మద్యం బాటిళ్లు యథేచ్ఛగా బెల్టు షాపుల్లో పగలు,రాత్రి తేడా లేకుండా లభిస్తుండడమే ఇందుకు ఉదాహరణ.
మద్యం అక్రమ అమ్మకాలకు అడ్డూ అదుపూ లేకుండా పోతున్నది. మద్యం దుకాణాల్లో కాకుండా విచ్చలవిడిగా సాగుతున్న క్రయ, విక్రయాలతో నిజామాబాద్, కామారెడ్డి జిల్లాలు గుప్పుమంటున్నాయి. మద్యం దుకాణాల సంఖ్య మండలానికి ఒకటి నుంచి రెండు వరకు విస్తరిస్తే… బెల్టు దుకాణాలు మాత్రం అందుకు రెట్టింపు స్థాయిలో పాకిపోయాయి. గ్రామాల్లో కొన్నేండ్లుగా మద్యం వ్యాపారంలో ఆరితేరిన వారు… ఇందులో ప్రధానపాత్రను పోషిస్తున్నారు. మద్యం దుకాణాల వేలంలో అవకాశం దక్కని వారంతా బెల్టు దుకాణాల ద్వారా అక్రమంగా అమ్మకాలు జరుపుతూ ప్రజలను నిలువు దోపిడీకి గురిచేస్తున్నారు. మద్యం బాటిల్ ధరకు 5 నుంచి 10 శాతం మేర అధికంగా ఆపాదించి విక్రయిస్తున్నారు. నిబంధనలకు విరుద్ధంగా పల్లెల్లో బెల్టు దుకాణాలన్నీ విచ్చలవిడిగా అమ్మకాలు జరుపుతున్నా.. పోలీసులు, ఆబ్కారీ శాఖ అధికారులు మాత్రం చూసీచూడనట్లుగా వ్యవహరిస్తున్నారనే ఆరోపణలు వినిపిస్తున్నాయి. అధికారుల నిర్లక్ష్య వైఖరితో పచ్చని పల్లెలన్నీ చీకటిపడితే… మద్యం బాటిళ్లతో సందడిగా మారుతుండడం పలు పేద, మధ్య తరగతి కుటుంబాల్లో చిచ్చు పెడుతున్నది.