స్వరాష్ట్రంలో సంతోషంగా బతుకుతున్న రైతులను కాంగ్రెస్ పార్టీ ఆగం జేస్తున్నది. ధరణి ఎత్తేస్తామని, కరెంట్ కట్ చేస్తామని అన్నదాతలను ఆందోళనకు గురిచేస్తున్నది. 24 గంటల కరెంట్ వృథా అని, మూడు గంటల కరెంట్ చాలని, 10హెచ్పీ మోటర్లు పెట్టుకోవాలన్నా కాంగ్రెస్ నేతల వ్యాఖ్యలపై రైతాంగం ఆగ్రహం వ్యక్తంచేస్తున్నది. ‘ఎద్దు, ఎవుసం తెల్వనోళ్లు ఏది వడితే అది మాట్లాడుతుండ్రు. ఒక్కడన్న నాగలి వట్టిండా..? నారు ఏసిండా..? తెలంగాణ అచ్చినంకనే ఎవుసం లైన్ల వడ్డది. ఇప్పుడిప్పుడే మా బతుకులు బాగువడ్తున్నాయ్. మేం సల్లగా బతుకుతుంటే కాంగ్రెస్ లీడర్లు కండ్లల్ల నిప్పులు పోసుకుంటున్నారని’ రైతులు మండిపడుతున్నారు. ‘అరే పది ఎస్పర్ల మోటర్లు పెట్టమంటున్న రేవంత్రెడ్డికి అసలు నెత్తి ఉన్నదా? కొత్త మోటర్లు పెట్టాలంటే ఎంత ఖర్చైతది. ఆ భారం ఎవరు మోస్తారు? కేసీఆర్ పాలనల రైతులకు ఏ రందీ లేదు. పంటలు ఏసేతందుకు ప్రభుత్వమే పైసలు ఇయ్యవట్టే. పండిన పంటలు ప్రభుత్వమే కొనవట్టే. గిదంత జూసి కాంగ్రెసోళ్లకు సోచయిస్తలేదు. అందుకే రైతులకు మంచి సౌలత్గా ఉన్న ధరణిని ఎత్తేస్తామంటున్నారు. కరెంట్ కోతలు పెడ్తామంటున్నారు. రైతులను ముంచుతామని అధికారంలకు రాకముందే ఖుల్లాం ఖుల్ల్లా చెబుతున్నారు. మరీ కాంగ్రెస్కు ఎందుకు ఓటెయ్యాలె’ అని రైతులు ప్రశ్నిస్తున్నారు. మమ్మల్ని కడుపుల పెట్టుకుని చూసుకుంటున్న కేసీఆర్ సారు వెంటే నడుస్తామని, కారు గుర్తుకే మా ఓటు అని స్పష్టంగా చెబుతున్నారు.
రైతే రాజు అన్న విషయాన్ని గుర్తించిన భారత రాష్ట్ర సమితి అధినేత కేసీఆర్ 2014లో అధికారంలోకి రాగానే మొట్టమొదటగా రైతు, వ్యవసాయాభివృద్ధిపైనే దృష్టి సారించారు. మిషన్ కాకతీయ ద్వారా చెరువులు, కుంటలను పునరుద్ధరించారు. తూములు మరమ్మతు చేయించారు. జలసిరులను ఒడిసి పట్టి సాగుపై ఆధారపడి జీవిస్తున్న వర్గాలను కంటికి రెప్పలా కాపాడారు. రైతుబంధు, రైతుబీమా, పంటల రుణమాఫీ, ధాన్యం కొనుగోళ్లు, ఉచిత విద్యుత్ వంటివి తీసుకువచ్చి బక్కపల్చని రైతు బలపడేలా మార్చారు. నాణ్యమైన విద్యుత్ను ఉచితంగా అందిస్తూ రైతులకు రక్షణగా నిలిచారు. రైతుకు ఇష్టమైన సమయంలో పొలానికి నీళ్లు పారించుకునే వెసులుబాటు కల్పించారు. విజయవంతంగా సాగుతున్న ఉచిత కరెంట్పై అసెంబ్లీ ఎన్నికల వేళ కాంగ్రెస్ పార్టీ కుట్రలకు పాల్పడుతున్నది. కేసీఆర్ అవలంబిస్తున్న విధానాలపై విషం చిమ్ముతూనే రైతుల జీవితాలతో చెలగాటం ఆడేలా ప్రయత్నిస్తోంది. 3గంటల కరెంట్ సరిపోతుందని, 10 హెచ్పీ మోటర్లతోనే పొలాలకు భూగర్భ జలాలను పారించుకోవచ్చంటూ ఉచిత సలహాలు అందిస్తూ రైతును ఆగమాగం చేస్తున్నది. మరోవైపు రైతుల భూములకు కొండంత ధైర్యంగా ఉన్న ధరణి పోర్టల్ను సైతం తీసేస్తామంటూ కర్షకుడి సాగు భూములకు కిరికిరి పంచాయితీలు పెడతామన్నట్లుగానే కాంగ్రెస్ నడుం బిగించింది. ఈ పరిస్థితుల్లో కాంగ్రెస్ నేతలు చెబుతున్న కల్లబొల్లి మాటలు, అసంబద్ధమైన హామీలపై రైతులతో “నమస్తే తెలంగాణ” మాట్లాడగా వారంతా దుమ్మెత్తి పోస్తున్నారు. 10హెచ్పీ మోటర్లతో బొక్కా బోర్ల పడుడే తప్పా ప్రయోజనం ఏమిటని రైతులు అంటున్నారు. ధరణి తీసేస్తే సామాన్యుల భూములకు రక్షణ ఏముంటుందని ఆందోళన చెందుతున్నారు.
మెడకాయ మీద తలకాయ ఉన్నోడెవడూ వ్యవసాయానికి 3గంటల కరెంట్ సరిపోతుందని మాట్లాడరంటూ రైతులు అంటున్నారు. కాంగ్రెస్ పార్టీ లీడర్లకు అసలు వ్యవసాయం గురించే తెల్వదంటున్నారు. 3గంటల కరెంట్ ఇస్తే రోజుకొక్క దొయ్య కూడా తడవదని వివరించి చెబుతున్నారు. 2004 నుంచి 2014 వరకు ఉమ్మడి రాష్ట్రంలో రైతులను ఆగం చేసిన కాంగ్రెస్ పార్టీ మళ్లీ అధికారంలోకి వస్తే రైతుల బాధలు వర్ణనాతీతంగా మారుతాయని అంటున్నారు. రైతు కష్టం తెలిసిన కేసీఆరే సీఎంగా ఉండడంతో దేశంలో మరెక్కడా లేనివిధంగా రైతుకు మేలు చేకూరే పథకాలు అనేకం అమలవుతున్నాయని చెబుతున్నారు. ఎన్నికల్లో గెలిచేందుకు కాంగ్రెస్ నేతలంతా గిమ్మిక్కులు చేస్తున్నారని వాటిని రైతులు నమ్మి మోస పోవద్దంటూ సూచనలు చేస్తున్నారు. రైతులను ఆదుకునే తెలివే ఉంటే కాంగ్రెస్ అధికారంలో ఉన్న రాష్ర్టాల్లో ఎందుకు 24గంటల కరెంట్ ఇస్తలేదో చెప్పాలంటూ డిమాండ్ చేస్తున్నారు. ఇక 10హెచ్పీ ఫార్ములా పేరుతో పీసీసీ చీఫ్ రేవంత్ రెడ్డి చెబుతున్న మాటలను రైతులు తప్పుబడుతున్నారు. సంతోషంగా ఉన్న రైతును రోడ్డు పాలు చేసేందుకు కాంగ్రెస్ ఆడుతోన్న నాటకాలంటూ కర్షకలోకం మండిపడుతున్నది. ఎన్నికల హామీల్లో ఎక్కడా 24గంటల కరెంట్పై స్పష్టమైన హామీ ఇవ్వకపోవడం, పదేపదే పీసీసీ చీఫ్ రేవంత్ రెడ్డి పలు సందర్భాల్లో సాగుకు 3గంటల కరెంట్ సరిపోతుందంటూ చెప్పుకోవడం కుట్రలో భాగంగానే జరుగుతున్న తంతుగానే అన్నదాతలు ఆలోచనలో పడ్డారు.