బోధన్, జూలై 12: ప్రభుత్వ దవాఖానల్లో విధులకు హాజరుకాని వైద్యులపై విచారణ చేపట్టి చర్యలు తీసుకోవాలని కలెక్టర్ రాజీవ్గాంధీ హన్మంతు ఆదేశించారు. జిల్లాలోని అన్ని ప్రభుత్వ దవాఖానల్లో బయోమెట్రిక్ హాజరు విధానాన్ని అమలుచేయాలని జిల్లా వైద్యాధికారికి ఆదేశాలు జారీ చేశారు. వర్నిలోని ప్రభుత్వ కమ్యూనిటీ హెల్త్ సెంటర్ను ఆయన శుక్రవారం తనిఖీ చేశారు. వార్డులను సందర్శించి రోగులకు అందుతున్న సేవలపై ఆరాతీశారు. ప్రతి శుక్రవారం నిర్వహించే ఆరోగ్యమేళాలో మధుమేహం, రక్త పరీక్షలు నిర్వహిస్తున్న తీరుపై వైద్యసిబ్బందిని వివరాలు అడిగి తెలుసుకున్నారు. వైద్యసిబ్బంది హాజరుపట్టికను పరిశీలించారు. ఈ సందర్భంగా దవాఖానకు వైద్యులు సక్రమంగా రావడంలేదని కొందరు ఫిర్యాదుచేయగా ..దీనిపై విచారణ జరిపి చర్యలు తీసుకోవాలని జిల్లా వైద్యాధికారి తుకారాం రాథోడ్ను కలెక్టర్ ఆదేశించారు. ప్రభుత్వ దవాఖానల్లో వైద్య సేవలపై రోగులు, ప్రజల్లో నమ్మకం పెంచాలని వైద్య సిబ్బందికి సూచించారు.
వర్నిలోని సత్యనారాయణపురం బాలికల జడ్పీ హైస్కూల్, మండలంలోని శ్రీనగర్ జడ్పీ హైస్కూల్ కలెక్టర్ సందర్శించి అక్కడ కొనసాగుతున్న అభివృద్ధి పనులను పరిశీలించారు. పనుల్లో నాణ్యతా ప్రమాణాలు పాటించాలని అధికారులకు సూచించారు. కలెక్టర్ వెంట డీఈవో దుర్గాప్రసాద్, అధికారులు ఉన్నారు.