వినాయక్నగర్, జూలై 20: నిజామాబాద్ జిల్లా కేంద్రంలోని ప్రభుత్వ జనరల్ దవాఖాన (జీజీహెచ్)లో శనివారం తెల్లవారుజామున కిడ్నాప్నకు గురైన మూడేండ్ల బాలుడిని పోలీసులు గుర్తించారు. గంటల వ్యవధిలోనే కేసు ను ఛేదించి నిందితులను అదుపులోకి తీసుకున్నారు. వివరాలు ఇలా ఉన్నాయి. మాక్లూర్ మం డలం మానిక్బండార్ గ్రామానికి చెందిన సాయినాథ్ భార్య గర్భిణి కాగా, ప్రసవం కోసం ఆమెను ప్రభుత్వ దవాఖానలో చేర్పించారు. ఆమె డెలివరీ వార్డులో ఉండగా, సాయినాథ్ తన మూడేండ్ల కుమారుడు అరుణ్తో కలిసి శుక్రవారం రాత్రి దవాఖాన కారిడార్లో పడుకున్నాడు.
శనివారం తెల్లవారుజామున 3.30గంటల సమయంలో వచ్చిన ఇద్దరు దుండగులు.. తండ్రి పక్కలో నిద్రిస్తున్న అరుణ్ని ఎత్తుకెళ్లారు. ఉదయం సాయినాథ్ లేచి చూడగా కొడుకు కనిపించకపోవడంతో దవాఖానలోని పోలీసు అవుట్ పోస్టు సిబ్బందికి ఫిర్యాదు చేశాడు. వారు ఎంత వెతికినా ఆచూకీ లేకపోవడంతో వన్టౌన్ ఎస్హెచ్వో విజయ్బాబుకు సమాచారమిచ్చారు. ఆయన వచ్చి దవాఖానలోని సీసీ కెమెరాల ఫుటేజ్ను పరిశీలించగా, అగంతకులు బాబును భుజాన వేసుకొని వెళ్తున్నట్లు గుర్తించారు. తండ్రి ఫిర్యాదు మేరకు కిడ్నాప్ కేసు నమోదు చేసిన పోలీసులు బాలుడి కోసం ప్రత్యేక బృందాలను రంగంలోకి దించారు.
సీసీ ఫుటేజీను పరిశీలించిన పోలీసులు బాలుడిని కిడ్నాపర్లు మెట్పల్లి వైపు తీసుకువెళ్తున్నట్లు గుర్తించి అక్కడికి వెళ్లారు. కిడ్నాపర్లను పట్టుకొని వారి నుంచి బాబును స్వాధీనం చేసుకున్నట్లు విశ్వసనీయ వర్గాల ద్వారా తెలిసింది. కాగా కిడ్నాపర్లలో ఒకరి సోదరికి సంతానం లేకపోవడంతోనే బాబును కిడ్నాప్ చేసి తీసుకెళ్లినట్లు సమాచారం. కిడ్నాపర్లు జిల్లాకు చెందిన వారిగా తెలిసింది. పోలీసులు బాలుడిని మెట్పల్లి నుంచి నిజామాబాద్కు తీసుకువచ్చినట్లు, నిందితులను సైతం అదుపులోకి తీసుకుని విచారిస్తున్నట్లు సమాచారం. గంటల వ్యవధిలోనే బాలుడి కిడ్నాప్ కేసును ఛేదించడంతో ఎస్హెచ్వో విజయ్బాబుతోపాటు ప్రత్యేక బృందాన్ని సీపీ అభినందించారు.