కంఠేశ్వర్/ డిచ్పల్లి, జూన్ 3: నిజామాబాద్ పార్లమెంట్ నియోజకవర్గంలోని 7 అసెంబ్లీ సెగ్మెంట్ల పరిధిలో పోలైన ఓట్ల లెక్కింపుకోసం అన్ని ఏర్పాట్లు పూర్తిచేశామని రిటర్నింగ్ అధికారి, కలెక్టర్ రాజీవ్గాంధీ హన్మంతు తెలిపారు. డిచ్పల్లి మండలం నడిపల్లిలోని సీఎంసీలో ఓట్ల లెక్కింపు నిర్వహిసున్నట్లు పేర్కొన్నారు. 2019 పార్లమెంట్ ఎన్నికల లెక్కింపు సైతం ఇక్కడే జరిగిందని, కోరుట్ల, జగిత్యాల అసెంబ్లీ నియోజకవర్గాల పరిధిలో పోలైన ఓట్లను జగిత్యాలలో లెక్కించగా ఈసారి మొత్తం ఏడు అసెంబ్లీ నియోజకవర్గాల కౌంటింగ్ సీఎంసీలోనే నిర్వహిస్తున్నామని తెలిపారు. ఉదయం 8 గంటలకు ఓట్ల లెక్కింపు ప్రారంభించేందుకు వీలుగా సిబ్బందిని అన్నివిధాలుగా సన్నద్ధం చేశామని పేర్కొన్నారు. 15రౌండ్లలో లెక్కింపు పూర్తవుతుందని, మధ్యాహ్నం 3 గంటలకు కౌంటింగ్ పూర్తయ్యే అవకాశం ఉన్నదని కలెక్టర్ అభిప్రాయపడ్డారు. అభ్యర్థులు, ఏజెంట్లు ఉదయం 6 గంటలకే కౌంటింగ్ సెంటర్ రావాలని, జారీచేసిన ఎంట్రీపాసులతోపాటు ఏదైనా గుర్తింపుకార్డును వెంట తెచ్చుకోవాలని సూచించారు. మొబైల్, ఇతర ఎలక్ట్రానిక్ ఉపకరణాలకు అనుమతిలేదని స్పష్టంచేశారు. కౌంటింగ్ కేంద్రం చుట్టూ ఐదు కిలోమీటర్ల పరిధిలో 144 సెక్షన్ అమలులో ఉంటుందని తెలిపారు.