బోధన్, జూన్ 12: విద్య, వైద్య రంగాలకు రాష్ట్ర ప్రభుత్వం అత్యున్నత ప్రాధాన్యమిస్తున్నదని బోధన్ ఎమ్మెల్యే సుదర్శన్రెడ్డి అన్నారు. ప్రభుత్వ పాఠశాలల్లో నాణ్యమైన విద్యాబోధనను అందించడంతోపాటు మౌళిక సదుపాయాలను మెరుగుపర్చుతున్నామని వివరించారు. ప్రొఫెసర్ జయశంకర్ బడిబాట కార్యక్రమంలో భాగంగా బోధన్ పట్టణంలోని రాకాసీపేట్ ప్రభుత్వ ఉన్నత పాఠశాలలో కలెక్టర్ రాజీవ్గాంధీ హన్మంతుతో కలిసి విద్యార్థులకు పాఠ్యపుస్తకాలు, ఏకరూప దుస్తులను బుధవారం అందజేశారు. ఈ సందర్భంగా ఎమ్మెల్యే మాట్లాడుతూ ప్రైవేట్ పాఠశాలలకు దీటుగా ప్రభుత్వ బడులను నిర్వహించాలని, ఉపాధ్యాయులు అంకితభావంతో పనిచేయాలని సూచించారు. చదువులో వెనుకబడ్డ విద్యార్థులకు ప్రత్యేకంగా తరగతులు నిర్వహించాలని తెలిపారు. జిల్లాలో 103 మంది ఎస్సెస్సీ విద్యార్థులు 10 జీపీఏ సాధించడంపై అభినందించారు. పాఠశాలల్లో పెండింగ్ పనులను త్వరలోనే పూర్తిచేస్తామని, ప్రభుత్వ బడుల్లో పిల్లలను చేర్పించాలని తల్లిదండ్రులను కోరారు. అనంతరం కలెక్టర్ రాజీవ్గాంధీ హన్మంతు మాట్లాడుతూ ప్రభుత్వ పాఠశాలల్లో విద్యార్థుల సంఖ్యను పెంచేందుకు ‘బడి బాట’ కార్యక్రమాన్ని విజయవంతం చేయాలని అన్నారు. అమ్మ ఆదర్శ పాఠశాలల కమిటీల ఆధ్వర్యంలో జిల్లాలోని 792 ప్రభుత్వ పాఠశాలల్లో టాయిలెట్స్ నిర్మాణం, తాగునీటి సరఫరా తదితర మౌలిక వసతుల కల్పన పనులు జరుగుతున్నాయని తెలిపారు. కార్యక్రమంలో డీఈవో దుర్గా ప్రసాద్, రాష్ట్ర సహకార సంఘాల యూనియన్ అధ్యక్షుడు మానాల మోహన్రెడ్డి, బోధన్ ఆర్డీవో అంబదాస్ రాజేశ్వర్, మున్సిపల్ కమిషనర్ వెంకటరమణ, ఎంఈవో నాగనాథ్, హెచ్ఎం బాలచంద్రం తదితరులు పాల్గొన్నారు.