కోటగిరి, జూలై 23 ; రైతులకు రుణమాఫీ రంది పట్టుకున్నది. క్రాప్లోన్ మాఫీ అయ్యిందా..? కాలేదా..? అనే స్పష్టత లేకపోవడంతో ఏం చేయాలో అర్థంకాక తలలు పట్టుకుంటున్నారు. రుణమాఫీ కాని రైతులు పట్టాపాస్ పుస్తకాల జిరాక్సులు, ఆధార్కార్డులను పట్టుకొని బ్యాంకులకు పరుగులు తీస్తున్నారు. గత శుక్రవారం నుంచి రైతులందరూ బ్యాంకుల వద్ద బారులు తీరుతున్నారు. ప్రతి రోజూ ఉదయం 10 నుంచి సాయంత్రం 4గంటల వరకు బ్యాంకుల వద్ద పడిగాపులు కాస్తూ రుణమాఫీ వివరాలు తెలియకపోవడంతో నిరాశతో ఇంటిబాట పడుతున్నారు. ఏం చేయాలో తెలియక సందిగ్ధంలో అన్నదాతలు ఆవేదన వ్యక్తంచేస్తున్నారు.
సరైన సమాధానం చెప్పట్లేదు..
నా పేరు శివరాజ్. నాకు కొడిచెర్ల శివారులో వ్యవసాయ భూమి ఉన్నది. నేను కల్లూర్లోని బ్యాంకులో రూ.62 వేలు క్రాప్లోన్ తీసుకున్న. రుణమాఫీ జాబితాలో నాపేరు లేకపోవడంతో ఆందోళనగా ఉన్నది. మాఫీ గురించి బ్యాంకుకు వెళ్లి అధికారులను అడిగితే సరైన సమాధానం చెప్పడం లేదు. ఎవరిని అడగాలో అర్థం కావడం లేదు.
కొద్దిరోజుల తర్వాత రమ్మంటున్నారు..
నా పేరు భూంగోండ. నాకు కోటగిరి శివారులో 2.8 ఎకరాల వ్యవసాయ భూమి ఉన్నది. కోటగిరి ఎస్బీఐలో రూ.90వేల క్రాప్లోన్ తీసుకున్న. ఏటా వడ్డీ కడుతున్న.. అయితే రుణమాఫీ జాబితాలో నా పేరు రాలేదు. బ్యాంకు అధికారులను అడిగితే బ్యాంకు ఖాతాలో రుణమాఫీ డబ్బులు ఇంకా జమ కాలేదని చెప్పారు. పరిస్థితి ఏమిటనేది అర్థం కావడం లేదు. బ్యాంకు అధికారులకు మరోసారి వెళ్లి అడిగితే కొద్ది రోజుల తర్వాత రమ్మని సమాధానం చెప్పి పంపించారు.
రూ. 50వేలు రుణమాఫీ కాలేదు..
నా పేరు కప్ప సాయన్న.. నాకు రాంపూర్ శివారులో ఎకరం వ్యవసాయ భూమి ఉన్నది. కోటగిరి ఎస్బీఐ లో నాకు క్రాప్లోన్ రూ.50వేలు ఉండే.. ప్రభుత్వం రుణమాఫీ చేస్తామని చెప్పడంతో చాలా సంతోషం అనిపించింది. ప్రభుత్వం రూ.లక్షలోపు రుణమాఫీ ప్రకటించింది కానీ నాకు రుణమాఫీ రాలేదు. బ్యాంకులో అధికారులను అడిగితే మాఫీ రాలేదని సమాధానం చెప్పారు. మరి మాఫీ అయ్యిందా.? లేదా? ఎందుకు కాలేదో అర్థం కావడం లేదు. జాబితాలో నా పేరులేదు..మాఫీ అయ్యేటట్లు నాకు న్యాయం చేయండి సారూ.