వేల్పూర్, జూన్ 24: వరద కాలువపై కారు రివర్స్ తీస్తుండగా అదుపుతప్పి పక్కనున్న కుంటలోకి దూసుకెళ్లింది. ఈ ఘటనలో ఓ రైతు మృతి చెందాడు. నిజామాబాద్ జిల్లా వేల్పూర్ మం డలం పడిగెల్ గ్రామానికి చెందిన రైతు గాదేపల్లి రమేశ్ (55)కు భార్య, కుమారుడు, కుమార్తె ఉన్నారు. రమేశ్కు పోచంపల్లి గ్రామ శివారులో పొలం ఉంది. అయితే, అక్కడి బం డరాయి వాగు మత్తడిలో మోటారు దించేందుకు ఆయన సోమవారం తన కారులో వెళ్లాడు. వరద కాలువపై కారు నిలిపి తన పని పూర్తి చేసుకున్నాడు. తిరిగి వస్తుండగా కారు రివర్స్ చేసే క్రమంలో అదుపు తప్పి పక్కనే ఉన్న కుంటలోకి దూసుకెళ్లింది. దీంతో కారుతో సహా ఆయన నీట మునిగిపోయాడు. అక్కడున్న వారు 100కు కాల్ చేయగా పోలీసులు, అగ్నిమాపక సిబ్బంది చేరుకున్నారు. చేపలు పట్టే అశోక్, ఠాకూర్, కిషన్ సహాయంతో కారును బయటికి తీసి చూడగా రమేశ్ చనిపోయి కనిపించాడు. మృతుడి భార్య ఫిర్యాదు మేరకు కేసు నమోదు చేసిన పోలీసులు మృతదేహాన్ని పోస్టుమార్టం నిమిత్తం దవాఖానకు తరలించారు.