YS Sharmila | ఏపీ సార్వత్రిక ఎన్నికల్లో కాంగ్రెస్ పార్టీకి ఒక్క సీటు కూడా రాకపోవడంపై ఏపీ పీసీసీ చీఫ్ వైఎస్ షర్మిల స్పందించారు. ఫర్ జగన్.. అగెనెస్ట్ జగన్ పేరుతో ఈ ఎన్నికలు జరిగాయని పేర్కొన్నారు. ఈసారి ప్రజలు ఒక నిర్ణయం తీసుకుని మార్పు కోసం వైసీపీని ఓడించారని తెలిపారు. అందుకే ప్రజల ఓటు వేస్ట్ అవ్వకూడదని, ఓట్లు చీలకూడదనే ఉద్దేశంతోనే కాంగ్రెస్ పార్టీకి ఓట్లు వేయలేదని పేర్కొన్నారు. దీనివల్ల అనుకున్న మేర కాంగ్రెస్ పార్టీ ఏపీలో పర్ఫార్మ్ చేయలేక పోయిందని తెలిపారు.
రాహుల్గాంధీ జన్మదినం సందర్భంగా విజయవాడలోని ఏఐసీసీ రాష్ట్ర కార్యాలయంలో వేడుకలు నిర్వహించారు. ఈ కార్యక్రమంలో వైఎస్ షర్మిల మాట్లాడుతూ.. ఏపీలో, కేంద్రంలో కాంగ్రెస్ పార్టీకి మంచి భవిష్యత్తు ఉందని తెలిపారు. ఎన్నికల ప్రచారానికి తగిన సమయం లేకపోవడం వల్లే కడపలో ఎంపీగా ఓడిపోయానని చెప్పారు. రాహుల్గాంధీ దెబ్బకు సార్వత్రిక ఎన్నికల్లో బీజేపీ చతికిలపడిందని షర్మిల అన్నారు. కేంద్రంలో అధికారంలో ఉన్నారన్న పేరే తప్ప.. బీజేపీ చేతిలో పవర్ లేదని విమర్శించారు. సీఎం చంద్రబాబు మద్దతు ఇవ్వకపోతే ఇప్పుడు బీజేపీ అధికారంలో ఉండేది కాదని ఆమె అభిప్రాయపడ్డారు.
ఏపీ ప్రజలను ప్రధాని మోదీ మోసం చేశారని షర్మిల ఆరోపించారు. పదేళ్లు హోదా ఇస్తామని చెప్పిన మాటను నిలబెట్టుకోలేదని గుర్తు చేశారు. చంద్రబాబు ఇచ్చిన ఎంపీల వల్లే బీజేపీ అధికారంలో ఉందని.. కాబట్టి చంద్రబాబు హోదా కోసం కేంద్రంపై ఒత్తిడి తీసుకురావాలని డిమాండ్ చేశారు.