న్యూఢిల్లీ: పంటలపై కరువు, కాటకాల ప్రభావాన్ని తగ్గించే డివైస్ను తుర్కియేలోని హైస్కూల్ స్టూడెంట్స్ అభివృద్ధి చేశారు. టీమ్ సెరెస్ అనే ఐదుగురు విద్యార్థుల బృందం తమ స్వస్థలాల్లోని పరిస్థితుల నుంచి స్ఫూర్తి పొంది, ప్లాంట్జ్మా అనే పరికరాన్ని తయారు చేశారు. ఈ బృందంలోని స్టూడెంట్ బెయ్జా తెలిపిన వివరాల ప్రకారం, ఈ పరికరం తక్కువ ఉష్ణోగ్రతలోని ప్లాస్మాను ఉపయోగించుకుని, పంటలు నిలదొక్కుకునే సామర్థ్యాన్ని పెంచుతుంది, సాగునీటిని మెరుగుపరుస్తుంది. సాగుకు ముందు విత్తనాలపై ప్లాస్మా ప్రభావం పడటం వల్ల అవి మొలకెత్తే రేటు, ఎదిగే సామర్థ్యం మెరుగుపడతాయి. అంతేకాకుండా తెగుళ్లు, పర్యావరణ ఒత్తిళ్లను తట్టుకునే సత్తా పెరుగుతుంది.
సాగు నీటిని ప్లాస్మాతో శుద్ధి చేయడం వల్ల పర్యావరణ హితకరమైన, నైట్రోజన్ పరిపుష్టమైన ఎరువుగా తయారవుతుంది. ఫలితంగా మొక్కల ఎదుగుదలకు అవసరమైన పోషకాలు లభిస్తాయి. తక్కువ ఉష్ణోగ్రత ప్లాస్మా పవర్ను ఈ ప్లాంట్జ్మా పరికరం రెండు విధాలుగా ఉపయోగించుకుంటుంది. అవి, విత్తనాలను నేరుగా శుద్ధి చేయడం, సాగు నీటిని పరోక్షంగా శుద్ధి చేయడం. దీనివల్ల రసాయన ఎరువులపై ఆధారపడటం 40 శాతం వరకు తగ్గుతుంది. పంట ఉత్పత్తులు పెరుగుతాయి. నిలకడైన సాగు పద్ధతులకు ప్రోత్సాహం లభిస్తుంది. గ్రామీణ రైతులు సులువుగా ఉపయోగించగలిగే ఈ ప్లాంట్జ్మా డివైస్ దాదాపు రూ.16,000కు అందుబాటులో ఉంటుంది.