న్యూఢిల్లీ, జూలై 15: తీహార్ జైల్లో ఉన్న ఢిల్లీ సీఎం కేజ్రీవాల్ ఆరోగ్య పరిస్థితి దిగజారుతున్నదని ఆమ్ ఆద్మీ పార్టీ (ఆప్) తీవ్ర ఆందోళన వ్యక్తం చేసింది. ఇలాగే ఉంటే.. ఆయన కోమాలోకి వెళ్లిపోయే ప్రమాదముందని ఆప్ ఎంపీ సంజయ్ సింగ్ సోమవారం ఆందోళన వ్యక్తం చేశారు. కేజ్రీవాల్ ప్రాణానికి హాని తలపెట్టే కుట్ర మొదలైందని ఆరోపించారు. అరెస్టుకు ముందు 70 కిలోలున్న కేజ్రీవాల్, ఇప్పుడు 61.5 కిలోలకు తగ్గారని చెప్పారు. దీనికంటే ముందు, కేజ్రీవాల్ ఆరోగ్య పరిస్థితిపై ఆప్ వ్యక్తం చేసిన ఆందోళనల్ని తీహార్ జైలు అధికారులు ఖండించారు. ఆయన ఆరోగ్యం బాగానే ఉందని, వైద్య నిపుణులు నిరంతం పరిశీలిస్తున్నారని తీహార్ జైలు అధికార వర్గాలు వెల్లడించాయి. కోర్టు ఆదేశాల ప్రకారం ఇంటి నుంచి తెప్పించిన ఆహారం అందజేస్తున్నట్టు జైలు సూపరింటెండెంట్ తెలిపారు. దీనిపై స్పందించిన ఎంపీ సంజయ్ సింగ్, కేజ్రీవాల్ ఆరోగ్యంపై తీహార్ జైలు అధికారులు చెబుతున్నదాన్ని కొట్టిపారేశారు. జైల్లో కేజ్రీవాల్ 8.5 కిలోల బరువు కోల్పోయారని, జూన్ 2 నుంచి 14 మధ్య 2 కిలోల బరువు తగ్గారని సంజయ్ సింగ్ తెలిపారు. కేజ్రీవాల్ షుగర్ స్థాయిలు 5 సార్లు పడిపోయినా, జైలు అధికారులు ఆ విషయాన్ని దాచిపెడుతున్నారని ఆరోపించారు.