న్యూఢిల్లీ, జూన్ 3: క్యాపిటల్ మార్కెట్స్ రెగ్యులేటర్ సెబీ.. సోమవారం ‘సాథీ 2.0’ మొబైల్ యాప్ను అందుబాటులోకి తెచ్చింది. పర్సనల్ ఫైనాన్స్లోని సంక్లిష్ట ఆర్థికాంశాలను సరళతరం చేయడమే లక్ష్యంగా సమగ్ర సాధనాలతో మదుపరుల కోసం ఈ నయా మొబైల్ అప్లికేషన్ను సెబీ తీసుకొచ్చింది. ‘ఆధునికీకరించిన ‘సాథీ’ యాప్ ఎంతో యూజర్ ఫ్రెండ్లీ’గా ఉంటుందని ఓ ప్రకటనలో సెబీ పేర్కొన్నది. ఇందులో ఫైనాన్షియల్ క్యాలిక్యులేటర్స్, మాడ్యుల్స్ ఉంటాయని, స్టాక్ ఎక్సేంజీల్లో షేర్ల క్రయవిక్రయాలు, మ్యూచువల్ ఫండ్స్, ఈటీఎఫ్ లావాదేవీలతోపాటు కేవైసీ నిబంధనల వివరణ వంటివన్నింటినీ పూర్తిస్థాయిలో తెలుసుకోవచ్చని సెబీ ఈ సందర్భంగా చెప్పింది. అంతేగాక మదుపరుల సమస్యలకు పరిష్కార వ్యవస్థ, ఆన్లైన్ డిస్పూట్ రిజల్యూషన్ (ఓడీఆర్) వేదిక కూడా ఉందన్నది. ఇన్వెస్టర్ల పర్సనల్ ఫైనాన్స్ ప్లానింగ్ కోసం అవగాహనను పెంచే వీడియోలు కూడా ఉంటాయి. కాగా, ఈ యాప్ను ఆండ్రాయిడ్ మొబైల్ యూజర్లు గూగుల్ ప్లే స్టోర్ నుంచి, యాపిల్ మొబైల్ వినియోగదారులు ఐవోఎస్ యాప్ స్టోర్ నుంచి డౌన్లోడ్ చేసుకోవచ్చు.