Microsoft Outage | ప్రపంచవ్యాప్తంగా మైక్రోసాఫ్ట్ ఆపరేటింగ్ సిస్టమ్లో సాంకేతిక సమస్యలు తలెత్తిన విషయం తెలిసిందే. దాని ప్రభావం శంషాబాద్లోని రాజీవ్ గాంధీ ఇంటర్నేషన్ ఎయిర్పోర్ట్పై సైతం పడింది. ఎయిర్పోర్ట్ పరిధిలో ఇప్పటి వరకు 35 విమానాలు రద్దయ్యాయి. అదే సమయంలో ఎయిర్పోర్టులో డిస్ప్లే బోర్డులు సైతం పని చేయడం లేదు. దాంతో అధికారులు మాన్యువల్ బోర్డులు ఏర్పాటు చేసి.. రద్దయిన విమానాల వివరాలను అందులో ప్రదర్శిస్తున్నారు. మరో వైపు బోర్డింగ్ పాసులను సైతం చేతితో రాసి ఇస్తున్నారు. మైక్రోసాఫ్ట్లో సాంకేతిక సమస్య ప్రభావం బోర్డింగ్ పాసుల జారీపై పడిందని.. విమానాలు ఆలస్యం కాకుండా ఉండేందుకు బోర్డింగ్ పాసులను చేతితో రాసి ఇస్తున్నట్లు ఎయిర్పోర్టు అధికారులు పేర్కొన్నారు.
అయితే, ప్రయాణికులు ఆయా విమానాలకు సంబంధించిన సమాచారం కోసం ఎయిర్లైన్స్ను సంప్రదించాలని అధికారులు సూచించారు. మరో వైపు ఏపీలోని విశాఖపట్నంలోనూ ప్రభావం పడింది. హైదరాబాద్, కోల్కతా, ఒడిశా, జయపుర వెళ్లాల్సిన నాలుగు ఇండిగో విమానాలు రద్దయ్యాయినట్లు ఎయిర్లైన్ పేర్కొంది. మరోపు ఆన్లైన్ సేవల్లో అంతరాయంపై ఆయా ఎయిర్లైన్స్ సంస్థలు స్పందించాయి. సాంకేతిక సమస్యల కారణంగా ఆన్లైన్ బుకింగ్తో పాటు చెక్ ఇన్ సేవలను తాత్కాలికంగా నిలిచిపోయాయని ఆయా ఎయిర్లైన్స్ సంస్థలు పేర్కొన్నాయి. ప్రయాణికులు వీలైనంత త్వరగా విమానాశ్రయానికి చేరుకొని చెక్ ఇన్ పూర్తి చేసుకోవాలని సూచించాయి. లేకపోతే ప్రయాణానికి ఆటంకం కలిగే అవకాశం ఉంటుందని పేర్కొన్నాయి. అసౌకర్యానికి చింతిస్తున్నామని.. త్వరలోనే సేవలను పునరుద్ధరించనున్నట్లు తెలిపాయి.