Mahua Moitra : మహారాష్ట్రలోని థానే జిల్లా బద్లాపూర్ స్కూల్లో చిన్నారులపై లైంగిక వేధింపుల ఘటన కలకలం రేపింది. ఈ ఘటనలో ఎఫ్ఐఆర్ నమోదు చేయడంలో జాప్యం జరుగుతోందని టీఎంసీ ఎంపీ మహువ మొయిత్ర మహారాష్ట్ర సర్కార్పై విమర్శలు గుప్పించారు. కోల్కతాలోని ఆర్జీ కార్ మెడికల్ కాలేజీ ఆస్పత్రిలో వైద్యురాలి హత్యాచార ఘటనలో నిందితుడిని కొద్దిగంటల్లోనే పోలీసులు అరెస్ట్ చేశారని, కానీ బద్లాపూర్ ఘటనలో రోజులు గడిచినా ఇంతవరకూ కేసు నమోదు చేయలేదని ఎక్స్ వేదికగా ఆమె పోస్ట్ చేశారు.
బద్లాపూర్ ఘటనలో ఎఫ్ఐఆర్ నమోదు చేసేందుకు మహారాష్ట్ర పోలీసులు నిరాకరించారని, ఆర్జీ కార్ ఘటనలో నిందితుడిని కోల్కతా పోలీసులు గంటల వ్యవధిలోనే అదుపులోకి తీసుకున్నారని ఆమె వివరించారు. మహారాష్ట్ర ప్రభుత్వం అసలైన ప్రజాస్వామ్యేతర కూటమి అని మహువ మొయిత్ర మండిపడ్డారు. కాగా, బద్లాపూర్ స్కూల్ వాష్రూంలో ఇద్దరు మూడేండ్ల, నాలుగేండ్ల చిన్నారులపై స్కూల్ క్లీనింగ్ సిబ్బంది లైంగిక వేధింపులకు పాల్పడిన ఘటన దుమారం రేపింది.
ఈ ఘటనపై ఆగ్రహంతో బాలికల తల్లితండ్రులు, స్ధానికులు స్కూల్పై దాడికి తెగబడ్డారు. స్ధానిక రైల్వేస్టేషన్కు చేరుకున్న ఆందోళనకారులు పలు రైళ్లను నిలిపివేశారు. రైల్వే ట్రాక్లపై బైఠాయించిన ఆందోళనకారులను చెదరగొట్టేందుకు పోలీసులు లాఠీచార్జీ చేశారు. ఈ కేసుపై విచారణ చేసేందుకు బద్లాపూర్కు జాతీయ బాలల హక్కుల పరిరక్షణ కమిషన్ (NCPCR) బృందాన్ని పంపింది.
Read More :